HMANGAIHNA NGE BARULHNA
P.C Malsawmzuala
1.8.2016- 19.9.2016
College ațangin chawhmeh leihaw tumin bazar lam hmanhmawh fahran lo hian ka pan a, mahnia khawsak ninawmna ber chu insuk leh ei leh in tur buaipui hi a ni mai awm asin mawle.
Bazar ka luh hma fe-ah chuan kan khaw pa, Pu Zatluanga ka hmu hlawl mai a. A rawksai a sawirem hnu chuan kan han inchibai ngial a, chanchinte kan inzawh hnu chuan insak tum a châk rawn lamkhawm a nih thu a sawi mai a.
"Enteh maw Rina, Mawbâl fawn han lei ve ka duh a, a țha leh țha lo ka hre silova bakah han tih vel dan ka thiam dawn silova mi han enpui lawk hman angem?" a tih chuan "Hman mai awm tak, engzat man vel nge kan en anga?" ka ti ve mai a.
"Romawii pa khan engzat man bawr nge maw a tih tak kha le, black & white te kha a ti maiin ka hria, Airtel a țha te kha tia,..nangni khawpui lama awm chuan chinchang in hre zawk ang chu" a'n ti mai pekah! Leipui ngei chu a ngai dawn a nih hi.
Mobile zawrhna dawrah chuan a man tlawmber ațang chuan kan han enchho dan dan a. Black & white, Romawii pa ta ang ngei mai chu lungsi takin ka han leipui ta a. A lawm thiam kher asin aw...Kan khawlam a mite number ka neih remchan ang chu ka han thunsak nghal nual bawk a, a kâ pawh zensak ila min seh lovang tihtur a ni, a khi reng mai.. Airtel ngei mai kha kan han vuahsak bawk kha a nia.
Dawr ațanga kan chhuak, kawng kan kân fel awrh tihah chuan țe țhawt ri ka hriat rual chuan a ri bur a, ka tlu zui ta niin ka hria, a thim nghal mup mai.
Ka harh hlawl ni berin a lang. Ka taksa an cherkhawng tlat avang chuan ka che theilo. Thil pît chuah chuah te ka hriat avang chuan ICU-ah ka awm a nih ka ring ta ber a. Inchunglam ceiling bawr vel chu ka melh ngawt ngawt ringawt a, thildang han tihtheih awmnghal hek lo.
Engtia hetianga awm ta mai nge maw ka nih le? tih chu ka in zawt nawn fo va. Chhanna erawh ka ngaihtuahchhuak zo bik hauh lo. Pen ri thlek thlek thawm ka hre zeuh zeuh a, mahse khawilamah nge a awm pawh ka hrethiam lo. Ka hmuh tur lamah a lo kal ngai bawk si lo.
Ka muhil a, ka harh leh a, ka muhil leh ka harh leh a... chutiang hlir mai chuan ka awm a. Nurse takngial pawh ka hmu ngailo chu a mak ka ti viau mai. A ninawm takzet tawh a ni. Chhun nge zan a nih pawh hre lova han awm ngawt mai chu a mangan thlak hle mai.
"Tunge awm?" tia țawng tum ka niin ka hria. Ka benga a rik dan chuan "Tu gu gu" tih ang vel hi a ni. Ka țawng pawh a chiang hauh lo. Kei hi eng ka ti nge ni ta a!?
Chutia thawm ka chhuah chu an hria a ni ngei ang. Pen ri thlak thlak thawm ka hre zui nghal a, a rin tial tial avang chuan min rawn pan a nih tih hairual a ni lo. Mihring hmel ka hmu hrim hrim tur chu ka lawm a ni tawp mai.
Nurse hmaihlai phuk mai hian min rawn en a, "I harh ti raw, na i nei em, i eng nge na?" min be luam nain ka chhan leh chhan loh pawh chu ka hre mumal chuang lo. Ka chhang ve zel chuan ka hria a, engtinnge ka chhan erawh ka hre hauh lo thung. Ka BP te a check a hnu chuan ani pawh chu a reh zui leh vawng vawng a.
Engtia rei nge chutia ka awm ka hrethiamlova, engvanga awm nge ka nih phei chu ka ngaihtuah thiam lo lehzual. Ka inluahna te, ka pa te, țhian țhenkhatte hmel ka hmu zeuh zeuh. Duh angin ka țawng thei bawk silo. Huihammm.. Ninawm lutuk.
Engtinnge ka pa te hmel te a lo lan tak hial! Ka na viau a ni ngei ang le. Dammawh hritlan nikhua pawha min ngaihven tura lo zin țha duh mang lo kha a nia, ani hmel meuh a lo lan takah chuan ka dinhmun hi a țha lo tawp a nih dawn hi le. Ka nu erawh ka la hmu lo.
Ka lu vel an tuamna an phelh ațang chuan ka thawpik lutuk pawh a ziaawm ta viau a. Ka ke dinglam erawh chu ka tiche thei map lo. Ka rilru a harh phian bawk si avang chuan a thawpik ka ti hle a ni.
"Be rih suh aw, țawng a la harsat deuh a.." Nurse in a tih ri-ah chuan ka harh zawk mai, ka lo chhingsek ningei tur hi a nia. Ka lam pana nula lo kal phei chu ka ngaihtuah ngial pawhin ka hriat zawng a ni ta hauhlo mai le. Ka maimitchhing a, ka'n ennawn leh ngial pawhin ani nena kan inlaichinna awm reng reng chu ka ngaihtuah chhuak theilo mai ka ti.
ICU room dai duk maiah chuan a kephah no zet mai chu dam thlap hian a rawn phah phei thlep thlep a, a ke panthler thlawr hmawra a ketin, rawng senlar angreng tak a hnawih chu hmuh hmaih chi pawh a ni lo. A mawi ngang mai. Pu Rûma te zawngin sawi se chuan 'khawlnuai ngei a ni' an ti leh pekin ka ring.
Awmhmun rawt kekawr niawm tak hi a ha a, kawr lah chuti bawk. T-shirt var a ni tlawng mai. A khawsa zia lah chu a inrintawk hmel khawp mai leh nghal vei nen. Chung zawng zawng timawitu erawh chu a hmelber mai chu a lo ni.
A sam chu a ngil siau a, han tih tur a ni hauh lo. A dar chen vel, ngil si lo, kir si lo niberin ka hria. A hmai a bial deuh lek lek a, a mitmeng a fiah țha kek kawk viau. A hnarngul chu tlangmi niawm lo hial a mawi a ni. A hmui chu a chhah deuh emawni le aw..mahse, pan deuh hlek se chu ka ti chuang hauh bawk si lo. A khabe kual pawh vuahluih ang hlauh a ni.
A hmel erawh a mitmeng hmuhnawn leh hlauh vang nimaw ka ennawn leh ta lo!
Min be lova, keilahin ka be bawk hek lo. Ngawireng chuan min en veng veng ringawt a, keilah chu chesawn theinghal hek lo awmhmunah muchung chuan ka lo lai ve em em ringawt a. A hahthlak ka va'n ti teh kher ve le.
"Hma a sawn lutuk ringawt, a vûng pawh kha a phai duak tawh kha, khawsik a la nei zeuh zeuh a, han reh fel se ward lamah kan indah chhuak dawn nia" Doctor kawrfual ha chuan a rawn ti a. "Ward-ah chuan a ziaawm deuh ang, ICU chu hlauthawng reng renga awm reng a angai a.." a ti ve mai a. Tu nge maw ni dawn le aw...
A rei a reiah chuan ICU ațang chuan min nawrchhuak ve ta kha a nia. Kha nula hmelhriatloh bawk kha a rawn phusa leh ber pek a! Ka pa nen, țhian țhenkhat te leh ka inluah neitute nen chuan min buaipui laih laih a, ward pangaiah pawh awm ta lo chuan Cabin-ah min suanlut a, mahni in thleng ang maiin ka thawl huai ta mai.
Ka châk ber chu darthlalanga ka hmel en a ni! Kuta ka khawih chuan hmelhem a awm pawhin ka hre lo. Ka hmuchak em em ringawt mai a ni. Ka mobile phone ve te pawh kha khawnge maw a awm tak daih le.
College a ka țhutpui leh ka kawmber Lianhminga hnenah chuan nula chu tunge a nih mitmeiin ka zawt a, ani lah pek chuan ring lenglawng hian "I bialnu" a'n ti mai pekah! Thei leh thei lo chuan ka nui sawng sawng a..
Tlailam dar 3:00 bawr velah chuan Lianhminga chuan min hawsan a, Nu Ruati (Ka inluahna te) pawh an hawzui deuh mai a, nula kha a hawlai awm reng reng reng ka hrelo thung. Kan pafa chuan kan awmdun ta rak rak a. A ni'n chanchinbu a chhiar a, keiin thil thlen dan ngaihtuahchhuah tumin ka ngaihtuahna ka lo seng ve bawk a.
Sana lah chu a tui a ral nge mawni a'n kal muang beuh beuh khawp leh nghal a. Darkarkhatah darkarhnih an belh zel emaw tih mai tur a ni. Engmah lah chu ka ngaihtuah chhuak thei lawi bawk si lo. Muchungin ka hah ve em em ringawt mai a ni.
Dar 4 vela Nurse lo kal chuan khawsik a awm leh awmloh te rawn enin min rawn chiu nghal bawk a. A kut a dam fahran lo hle mai. Zakkha nei hmel te pawh a pu deuh roh! Khaini a heh hmel bawk sia mawm..
Ka pa thawm emaw ti a kawngka lam ka melhphei lai chuan kha nula bawk kha a lo lang leh pek a! A mak zozai ta. Tu tak chu niang maw le? Ka pa nen chuan inhresa awm hrim hian an inbe hlut a, kan chhungte tu emaw ka hriat ve vak loh a nih ka ring ta ber a. Chutiang chuan ka pawm ta ngawt mai kha a nia.
Dar 5 pelh deuhah chuan ka pa chuan ka luchunga kutnghatin țawngțaina a hmang a, min riahpui dawn emaw ka tihlaiin 'Kan haw thla a nge aw' a ti ta daih si a! Kan nula hmelhriatthar chuan min riahpui dawn a va nih hmel ve le. Pawn thleng chuan ava thlah ngei a, a rawn luh leh lai pawh chuan uluk fe hian ka lo thlek a, a nui seih a..
A bag a zen rak rak a, "Kha hei i phone aw." Tih pah chuan ka mobile phone ngei mai chu min rawn pe a, "Ka hawng miahlo a nia aw.., password te kha ring ngam la" nui ver ver chung chuan a'n ti zui zat a.
Kut khawng țhum chuan ka phone lock chu phelh mai ka han tum a, "am.. ka switch off daih tak e.." tih pah chuan alo ban leh a. Amah ngei chuan a on ta kha a nia, "I țhiante call kha chu ka chhang zeuh zeuh a nia..a ri ngun lutuk a.." a kutțang sei leh nalh seng sawng tak mai hlir kha ka lo en pek a! Engmah a hnawih lo, a fai sar mai.
Ka han lut fel chiah chu whats app message luh inchuh chu a nghawr ta cher cher mai. Han khawih mai ngaihna pawh a awm lo, a tang tlat nia mawle.
Ka en theih hnua ka luh chuan alo tam reng lah tak a, phone puar awlh na tham tur alawm lo lut hman le.. Group message ho chu ka clear zung zung a, a muang zualpui pawh a ti reh ta deuh a. Inbox a awm mumal hran lo. Pali panga vel chu a awm. Ka en rei ta deuh a niang ka lu a hai miai miai mai...
Ka han harh leh chuan bangkil lam hawiin saisir deuh hian ka lo mu a, mipa țawng awmtak te pawh ka hria. Mahse ka lehhawi peih chiah bawk si lo.
"A thluak hi chu a che lo a niang a, engtinnge doctorin an sawi?" Mipa aw chuan a han ti a. "A țha, a harhfim vek, țawng pawh a hrevek ang an tia, a lei a lo seh kak a, chumi vang chuan a țawng an phal chiah lova, an cher sak deuh nge mawni, a nakruh a auh bawk" nula khan a lo ti a.
"A ninawm tawh e, dam vat vat sela ka ti. Heti ringawt chuan ka tan hun pawh i nei thei hleinem" lungawi vaklo tih hriatreng chuan a mipa chuan a han ti a. "Ani khawp mai tiraw, mahse hei chu ka kut a ni miau mai bawk sia, i hriatthiam a ngai a ni" damthlap chuan nula khan a lo ti leh a.
"Ka hrethiam lutuk che lawm, mahse a chang hi chuan i ti lutuk deuh hian ka hre țhin. Min ngaihsak bok silova.." E hele.. a bialpa a ni ngei ang. Keimah vangin an inhau chu a ni awm phawtah! "Ka sawi tawh kha, ka mawhphurhna a ni. I hrethiam duh lo a nih chuan hrethiam tura ngen luih țalh che ka tum hran lo. Keimah vanga hetianga awm hi a nia, a thilova vannei kan intih tawh naklaia a damlo ka buaipui leh zel i hriatthiam duh siloh chuan..sawitur ka nei lo viau ang" a ti hul hak a.
"Chutiang te chu ka hrethiam ve tho va..." a ti nang nang a, chhanna a dawng lo nge ka muhil zawk ni.
Ka khelbawr kham lutuk chuan min ti harh leh a, bangkil lam hawi chuan ka lo la mureng chu niin. Thei leh thei lo chuan inleh ka han tum a, nula khan min lo pui thuai a, a lo mengreng a nih awm hi mawle aw. A va zahawm reuh ve mawle.
Na ka neih leh neih loh te chu min zawt siam siam a, ka lu ka thing mai a. Ka tui erawh a hal viau thung. Tui Bottle chu ka kawk a, a hrethiam a ni chek ang no ah chuan a thli kar kar a. "Ang rawh le" tihpah chuan ka hmuibulah chuan a rawn lek kang a. Ka ang zau hleitheilo chu amah zawk chu a hmuhnawm, a ang ziau ziau mai!
Ka muhil thei tawh silo. Ani lah mut tum hmel a pu bawk silo. Ngawireng chuan kan awmdun ran mai a. Chutia tunge a nih pawh hre lova zankhuaa han awmpui ngawt mai chu dik dawn lo hian ka hre ta tlat a. Ka lama chuan ka hui phei a, ka phone a message plate ah chuan 'tunge i hming?' kan ti tawng mai a. A nui leh ver ver a.
Ka phone chu lain 'Angela Lalmuanpuii' tih chu a han type ve mai bawk a. Chutiang chhungte kan neih reng reng ka hre hauhlo mai ka ti. 'Number plizz' ka han ti ngawt a, chu pawh nui ver ver chungin a type ve leh mai bawk a. Ka save ta than a. Whats app contact list te ka refresh hnu chuan Angela tih chu ka hmu ta kalh a.
"Engatinge hetia ka awm?"
"I accident a"
"Engtin?"
"I hmanhmawh hret..nakinah muangchangin le, i taksa a la chak lo emai"
"Ka hre chak viau asin"
"A la hun lo deuh e"
"Naa...."
"Naaa lo"
Khumah chuan a rawn țhu phei a, "Tun ațanga thil zawng zawng i hriat vek chuan i thluak a buai palh ang, i taksa chak lo emai..lo dawh hram hram teh, i la hre em em ang" hlim hmel pu sang chuan a ti leh a.
"A nih tunge i nih?" Whats app-ah bawk chuan ka'n ti leh a. Țawngka chuan "Ka hmingpum ka hrilh zo chiah che emaw ka tia" a ti a.
"Kan chhungte i ni nge, ka hre lo em che a hehe" ka ti leh a. "Inchhungte ni e, i la naupang em a min hre phak vak lo ang" a nui pawt pawt a. Ka awih chiahlo nachungin rindan dang ka nei hauh bawk silo.
"I ril a țam ve em? Ka ril a țam deuh, eitur kan dap ange aw.." a ti a.
Bawnghnute chu flask ațangin a rawn thli a, tlem tlem chuan min han tulh pah bawk a. A nuam țan riau mai a. Kan chhungte a ni tak tak angem le..? Amah pawh chuan balhla nen chuan a ei pang pang a. Hrehawm a tih hmel bikloh e.
Mahse, bialpa niawm tak a neih kha mawle. A pawi zo leh si.
"Mu la, i chau lutuk ang" tiin ka va text a, " I mamawh zawk daih alawm" a ti awlsam et a. Mut tum hmel pawh a pu hran lo.
Zing dar 6 vela ka harh chuan a țhutna țhutthleng seiah chuan puankawp sin hian a lo muhil bam a, thawhphana hmuh atan chuan iaiawm loh ve tak mai a ni. Ka thlir char char ti ila dawt ka sawi pawh ka ring hran lo. A diktak sawi chuan mi bialnu atan chuan ka ui!
Reingial ka thlir hnu chuan a zi țiah țiah a, a meng diar diar a, thawhphan neilo awm fahran chuan a țhuchhuak hlawl mai a. Ka khum lamah chuan a lo kal phei a, "I harhna rei tawh em? Nâ i nei em?" a rawn ti zung zung a, damdawi lam thiam mi niawm tak chuan ka chal te chu a han dek vel a. Toilet lamah a lut zui nghal a.
Parda vel a haikian mawlh mawlh lai chuan Nurse a lo lut a, Ka BP te a rawn check a, "Nang hi hma i sawn ber a nih hi mawle, I mal engnge an? I lei a la na em? Han angchhin teh" tih pah chuan mi rawn keusak deuh tituai a, "A híl vek tawh alawm hei, Doctor round hunah ka lo sawi dawn nia, țawngtheilo bula awm chu a hahthlak awm emai" tiin a nui chhuak vur vur a. Chhân pawh ka chhang hman lo!! Bawrh bawrh chuan e.
"I țawng ve hman meuh nange" a rawn ti a.
"Cake hi kan chiah ange aw, nizanah thil i ei mang bawk silova, drip ringawt rin chu.." tih pah chuan khumlua bawm chu a hai rawk rawk a. No ah chuan cake zaisa lêp hnih chu hnawhin bawnghnute nen chuan a chawk rak rak a.
Ka khumah a rawn țhu kai leh a, mi barh leh a tum chu ka lo man sak a, a fiante ken chu chhuhsak ka han tum a, a țang nasa mai. "Ka barh ve chak che lawmmm, i dam hunah chuan kan barh phak awm silo che.." a tih chuan chhuh ka tumlui duh ta bik lova, a hrehawm mawlh lo e.
Min eitir zawh chuan facetowel(ka neih pawh ka hrelo, a ta niang) a chiah huh chuan ka hmai leh ban vel a hru leh a, ka pum em chu hruk ka phalsak ta lo va, theih ang ang chuan ka han ban ve sa sawi a, " I tih țhat theih loh kha aw, han la mai mai teh" tih pah chuan min chhuhsak leh a. Amah bawk chuan ka kawr hlimin a theih ang ang chu a'n hru leh thuak thuak a, ka ke dam lam te pawh mawle..
Min han hru zo chu ka harh hawkin ka hria. Zai kawr ka la hak hnuang avang chuan ka ning deuh a, phoneah chuan "Ka kawr thlakna a awm chuan thlak ang" tih ka'n chhu leh nauh nauh a. Ka zun an siak paih tura a lo kunhniam laitak chuan ka lo hmuh a. "I zun hi kan paih phawt ang e aw, a nalhlo leng luang emai" a ti leh mai a.
Zankhat chiah kan la inhria a ni ber a, chuti chung chuan ka mit a tlung a ni satliah lo. Ka thinlung hi a hneh a ni. Thlâwt mai a. Kan chhungte chu a ni tak tak angem le!? Chuan a bialpa nen khan inhmuthiamlo zel ta bawk se...
"Hei hi i ha mai dawn mi?" Tih pahin t-shirt pakhat hi a rawn lek chhuak a, a'n keng pharh deuh chu thisen te a lo la awm nuaih a. Rangtaka khung leh pahin "Hei chu a bal a nih hi" a ti zaih a. Ka hmu hman reng sia.
"Tawnzau chiah a awm a nih hi, i pa phone mai ila" a tih chuan ka pa number ka hmetchhuak a, ka phone chu ka han pe a.
"A la tho lo emawni reuh le..ee Pa Zar, Keimah Angela-i. Inthlakna tur hi a lo awm miah lova, haknuam deuh awm chi ilo keng chho mai dawn mi, a kawr hi a ning deuh a niang. Aw.....aw.....awle, rawn hmanhmawh duh suh aw amah pawh hei a țha lutuk a nia"
A tawnzau ken chu zaizirin hak ka duhthu ka han hrilh a, a'n hnim hmasa phawt pekah! "A rimtui lo asin, thlanrim te a nam, i pa lo kal chu nghak law law mai rawh. A reitawh chuang nang tiraw" a tih chuan hnial tur chuang ka awm leh pek lo ka ti. A sawi a piang ka lem duak duak a ni ber alawm.
Toilet lamah chuan a va pilbo leh vang vang a, a thâwm ațang chuan ka thawmhnaw kha a su ngei a nih ka ring. Ka rin ang ngeiin a thilsûk nen chuan a rawn chhuak mai reng a. Pawnlamah zar turin a chhuahpui nghal daih a.
Zingkar rei viau tur pawh Angela-i bulah chuan a lo rei hauh lo mai. Ani țhutthlengah a țhu mu a, kei khumah, kan in message tukpum a ni ber e. Ka hriatduh ber ka chetsualdan erawh chu ka zawt chhuak thei chuanglo. Thildang a sawikual thiam lutuk tlat.