Sawi tur kan vãn tlang deuh aniang thui fe chu ngawirengin kan tlan mawp mawp a.
"I van khalh chak" Angela-i'n a tih chuan a hlau emaw ka ti hman zet a, a mitmengah erawh chuan a hmanhmawh loh vang lek a lo ni bawk si.
Chuta țang chuan Lalrova titi chu kan ngaithla a ni ta ber mai.
Chaw eia kan din zawk bak chu kan tlan tluang viau a, hmanhmawh vut vut kan ni lemlo bawk a Aizawl chu kan thleng hma lutuk lo.
Zemabawk kan thlen dawn ațang chuan kan be țawng zo tawh lo. Ka darah chuan beiin min kuah tlat a, thlamuan theitu mah ni ila atan thlamuanna țawngkam han chhahchhuah tur reng ka hre bawk silo.
Zarkawt kawnah a u pasal khan min lo nghak a, motor-ah chuan a rawn chuang ve mai a, an inlam pan chuan kan tlan zel a, han thlen dawn meuh chuan keipawhin ka huphurh ve tho mai. Lalrova hmuipuipu deuh a ni bawk a ring vek tawh mai ang. Keizawng țawnghmang thiamlo tih takah ka insawi awk mai mai palh ang.
An inbul chu kâr lovah kan thleng ta mai a. Kawngkam mai chu an in awmna a lo ni a, an In pawh a ropui thawkhat viau e. Cement in chhawng nga emaw lai a ni ang chu. Kawng ân chungah chhawngkhat leh kawng hnuai lamah chhawngthum lai niin ka hria, kawng ân leh a chung chiah chu an luah a nih hmel viau.
Chutia Sumo paw thêr thûr an kawta lo ding ta chu an hrethiam a ni teh chêk ang a pa chu a lo chhuak a, awze mi niawm tak, sa muk țilh țelh, hnar per thlir thler te hian a rawn zui chhuak bawk a.
Nu ropui tak hmel erawh a lang lo tlat!
An inchhungah chuan kan inzui lut ta țham țham a, Samkirnu bedroom-a a lut zuk lai chu ka va hmu hman rengah!!
A pa leh an mâkpa chu an țha viau a, an țawngkamah pawh mi han hmumawh awm ang zawng han hriattur a awm lem lo. Rilru chu nawmkhat chuan a nuam deuh e.
Chaw eitur te chuan min han sawm ve tak nain kan ei tak tak an rin hmelloh em a Lalrova nen chuan kal mai kan tum a, Angela-i chu inchung chhohna lamah chuan a tlanchho ta daih a. A hrilhhai thlak viau a ni.
Din reng thu awm heklo le, motor lam pan chuan kan chhuak dun ta kha a nia.
Motor ațanga ka hawilêt chuan inchunglam tukverh ațanga min lo thlir rengtu chu ka hmu thei a, kawngka biang nghengin...a mittui a tla tih hairual a ni lo asin.
Ka inluah țhin lam pan chuan kan tlan ta vang vang a, kan thleng chu kawngkhar chu a lo inkalh bãm mai a. Kan hawikual vellai chuan inchunglam ațanga 'Ã pute' ti a min koh lauh chu ka hria a, inchunglamah chuan kan lut zui ve mai a.
A luahtute an chhuah avangin remchang lain an lo insawn chho hi a lo ni a, inhnuai lam ai chuan a zau ta deuh e.
Kan intih felfai hnuah Chaw ei ka u ten min han siam a, kan eikham hnuah Lalrova innghahna țhin a ute inluah lam pan chuan a bai a baiin kan inphur chhuak leh lawp lawp a, chumi hnu chuan Angela-i te inlam pan chuan kan tlanchhuak leh ta a.
An kawngkhar hmehrik kan hmeh meuh kha chuan dar 8 a pel ruai tawhin ka ring. 'Lo lut rawh u' an tih ri awm pawh kan hre lo, kawngka chu hawngin 'In awm em?' ka'n ti dâk dâk a.
TV a Korean film lo en mek sam kir bep bup nu chu a lo hawi hruk a, "Awm e, lo lut rawh u," a ti a.
"E, midang an awm nange, khawnge Angela-i?" Lalrova chuan a lo ti zung zung a, "A mu tawh nge maw ni le" a ti duh chauh ka ti.
Ka phone top up thun thar diai mai chuan ka han phone a, a lo mu ngei a, 'ka lo chhuk ang' a tih kha. Tunge thunun thei zawk chu kan fiah chhoh zel a ngaih hmel e.
Inchunglam ațang chuan Angela-i chu a lo chhuk thla ri thlarh thlarh a, a hmelah beiseina eng hmuh tur a awm hauh lo.
A nu hmuikawhin a țhu ve vuau reng bawk sia titi boruak pawh a kal hleithei meuh lo. Ruah thimpui lo thawktur inmûng vut vut hi ka chan ber mai.
Chutiang boruak ințam țeuh mai chu a puak chhuak ta! Lalrova a chesual ta hlauh mai a, Ani thawpik, sawitur hre bik silo chuan ngaihtuah mang hlei lovin zial an țan khu luih mai a leh! Remchang zawnga lo in up ngar ngar chu a tawn keh ta!
A ânhla chu mumang a hmuh leh atan pawh ka la duh lo, a rapthlak tih piahlam a ni. Lalrova chuan 'ka tihpalh a ni' a tih hnuah pawh Bible-a Ruthi bu chen zet tur chu a la chham hial ang chu mawle.
"Ka nu, em em a che" Angela-i'n a lo ti pawh chu a chhaihkawlhtu mai a ni.
"Nang kha lo ngawirawh, engmah lo sawi ve suh. A zah pawh i zak lawmi, i nikhua loh vanga kan mualpho zia hi i hria em? Țik pawh lo ti ve suh, zaka indawm kun tlawk tlawk tur i nia sin" a sawi duah mai..Inrinni zana Sermon tawi chen zet tur a belh!
"Ngawiteh ka pi min lo hrethiam hram hram dawn nia, engpawh nise kan va țin phawt ange" pangai hmel takin ka tichhuak thei hram a.
Meng kaw kaw chungin min han en a, a kutzungchal ngei maia min kawkin "Rina hei hi lo hre rawh, Lalmuanpuii nen hian in inneih hi beisei duh suh. In innei chuang lovang. Heti khawpa mualphona min thlentu hi kan mâkpa i ni anga maw...A teuh lo mai! Nang neihtir ai chuan pasal neilo hian awm mahse a pawi therte lo. A kal pawh rawn kal tawh suh, he in rap tur hian kan duh lo che" ka ding sai ngar ngar a ni.
Ka tiang chuan ka hlap dawn nge, țawngkain ka chhang ang tih ka bûk laitak chuan Lalrova'n "Ti teh, kan kal a țha zawk e" a rawn ti hman ta hlauh a.
A him phah ta.
Kan kal tur Angela-i'n ka ban a dawm chu a rawn phihthlak sak a, keipawh ka pai khat khat a, Angela-i phone chhuata tla chu a nu chuan chharin bang vawm nan a'n hmang teh reng a nih kha...Angela-i chu inhup chungin a țap tlawk tlawk ringawt a. Han hruai chhuak ngawt dawn ila keia ke țhalo bawk nen kan ropui lua dawn silo, rilru a buai tak zet a ni.
"Kal ang" tiin ka pen chhuak a, ka keah chuan Angela-i'n a lo dawm bawk si. A nu chuan "Lalmuanpui thlah rang mai rawh" tiin a dârah chuan a kuai lawp a, Lalrova chuan a hmuthei ta ngang lo a niang, Angela-i chu a zu dawm vat a, muangchanga rawn dingchhuakin Nu hruanghrau napui mai chu a en ang ren rawn a "Ramhuai a mi i nih?" a'n ti nghek maiah! Chhân ngaihna zuk hre der lova mawle.
"I room-ah han chho rawh" Lalrova'n a tih chuan a duh ka rinloh teh reng nen Angela-i chu inhup chan chan chung chuan a chho hna hna a, a mak ka ti kher mai, min zui a tum ve turah ka ngai deuh asin!
Chhuah tumin ngawirengin kawngka lam kan pan a, ka pang a za deuh tlat! Kawngka bulah chuan ka ding det a, "I fanu nei tur hian ka lo kir leh ang" ka'n ti zet chu a alh mai ang tih hlauhawm khawp a ni, mi vawmna remchang melh niawm takin a hawi kual a, kawngka ka khar fel chiah chu eng emaw a rawn vawm a ni ngei ang kawngkhar a ri bur mai.
Motor-ah chuan ngawirengin boruak ngaichangin kan han țhu ren rawn a, thildanglam vak awma kan hriat loh vang chuan kan tlan haw ta a.
"Kan hruai haw nghal ang chu ka lo ti rilru hman deuh asin.. Room lamah i kal tir leh ta daih bawk sia.." țhianpa bulah chuan ka han ti a. "A ni khawp mai țhianpa, mahse khatiang hunah kha chuan kan duh zawng anga awm a fuh ber lo țhin alawm, hmeichhia pakhat lek hmatawnga dahin khatiang taka min hmachhawn ngam chuan thildang eng emaw a awm tel ang tih kha rin thiam tur a ni ngai. Ti khan remchang dang a awm mai ang, lungngai reng reng suh" a ti a.
"Kan kal ngam tawh dawn silo, a phone lah kha a nuin a paihchhiatsak der bawk si. Khatianga an tih kha chuan pawna a chhuah an phallo ngei ang a, biakna tur awm bawk silo chu tihdan tur avang viau a ni" ka ti a.
"Lungngai mah ta che ar talhdan chikhat chauh a awm hleinem, rilru fim hman a pawimawh țhin alawm" a ti awlsam et a.
"Inbe thei tal ila chuan tihdan a ngaihtuah theih tur a nia"
"Ka phone a kawl alawm" a tih chuan phawk zetin ka han melh a, lu búk nghat pahin "A dik alawm, ka zu dawm khan ka phone ka pe a, thluak fim tlem ka lo la nei a..." a tih meuh chuan ka mittui ka khap hnam sawk mai! A motor khalh lai chu ka va kuah ti tih a.. ka hnuk a ti ulh tak zet. A va hlu em ka tan hian..
Ani driver ta chuan phone a mamawh asin. Bungraw phurh chung chang chu sawiloh a passenger tur te rawn biakna tur te, kawnglakah chhiat te pawh tawk thei an ni asin. Chung zawng zawng dahțha chuan keimah vangin a phone alo chân der mai bawk si. 'Ka phone hi kawl la ka lei leh mai nge keichuan' ka tih lah chuan 'Awmzia awm lo, ka tih chu ka tih a ni mai, min pekbuai tum duh suh' a ti hmak mai bawk si.
In kan thlen veleh Angela-i chu Lalrova numberah chuan ka han message a, a reh vang vang mai.
Lalrova chuan kan inah min dah zet hnu chuan a riahna tur lam panin a haw ta a. Ka ngai ngawih ngawih maiin ka hria Lalrova tak pawh chu. Ngaihtuahna mumal put a har ka ti hle mai.
Ka chhungte lah chu an hnâr kûk kûk mai bawk sia, an ngeiawm thei lek lek dawn mai ka ti.
Hetiang a nih rau rau chuan rûk chhuah leh mai a ngai dawn a nih hi. Chuti a nih loh chuan ka thlah hlen a ngai dawn tihna.
Duhthlan tur pahnih chiah ka nei.
Dar 11:00 velah chuan ka phone chu a rawn nghawr det a, bengkhawn reng ta chuan ka hailo kher mai.
"Rin, min ngaihtuah suh aw ka țha a nia, ka ngaihtuah awmloh..ka ngai che" tiin.
"I chhungte rilru chu ka beisei phak bak a ni"
"Ka nu hian ro a rel vek a, ka pa hi chuan thil hi a hrethiam mai țhin a, ka nu hi a buaithlak ber, ka pa lah hian a hnial ngai bawk silo.."
"I lengchhuak thei angem?" tih ka han zawt zet chu ka tifuh lo tih ka inhre chhuak chiang kher mai, ka thawn hman tawh bawk si.
"Theih ka ring chiah lo, min mitmei reng ni hian ka hria" a ti a
Reitak thleng chu kan inbia a, anchhe tinreng nena țim a, room a kalhkhum em a tawk lemlo bawk a rilru luah ngut ngut tur a zia viau.
Ka muhil har deuh bawk nen zinga ka thawh chuan dar 9:00 a lo ri hawlh tawh mai a, inngaihtuah buai pawh awm map lovin ka tho chhuak a, ka inphih fai hnuah tukțhuan ka kil chhunzawm nghal a.
Lalrova phone thlakna tur ka leisak loh te chuan..
Chaweikhamah chuan bazar lampanin ka in hawlchhuak ta kha a nia, kan awmdan chu mumang te pawh a ang rum rum mai alawm mawle.
Whats app hman theihna țawk țawk tur phone manto lo tak mai chu ka lei a, kawngkam simcard nen chuan ka tifel a ni zui nghal mai. Mahse, engtinnge Angela-i nen chuan kan inpek tâk ang le?
Ngaihtuahna a buai riau mai. Amah lahin 'chu chu rawn thawn rawh' han tih tur a hre mai bawk silo. A țhianteho lah a chhungten an ringhlel rûm vek tawh dawn bawk si. Thlunglu a hai e chawltui ningzu dawn silo hian..
Tihdan a awm mai ang tiin ka veivah awlsamna tur Sikuti thlithlai tur chuan ka kal leh ta a.
A thlen thar lai a nih vangin inziahlawk pawh a lo ngai lem lova, laknghal mai theih tur a ni. Mahse keilah chuan thil pawimawhtur engmah ka lo keng lêm silova, Pawisa takngial pawh ka u in a la tãivawn daih pek ang chu mawle.
Lianhminga nen chawhnu lamah kn inhmu a, 'Sikuti chu tifel law law ang, i tan nihrana chhuah kual leh a buaithlak' a ti teh tlat a, kan inlamah tlanhawin mamawh te chu kan han la leh rih a, ani min phurhkuala min buaipui zarah reipawh buaipui lovin kan lachhuak fel thei mai a, a thawven thlak țhin teh e țhianțha neih hi chu.
'Kan inlamah vawiin chu chaw lo eirawh' a tih teh tlat avang chuan Sikuti thar nen chuan a hnungah ka tlan ve dat dat a. Bike khalhthei sa ka nih vangin harsatna lutuk ka nei hran lem lo. Clutch leh brake ka hriatpawlh zeuh zeuh tih mai loh chu.
Lianhminga chhung te nen hian kan inpawh ve viau a, inkawm a, inzui rawt kan nih vang hian ka duh hun hunah ka riakin chaw ka lam mai a, anni pawh hian min enhrang lemlo viauin ka hria.
"Eh..Hminga'n i haw chho a ti emaw tia?" a nu chuan a lo ti hluai a, "Nia, nimin khan ka lo chhuk leh a" ka ti ve mai a.
"I țha zel a maw, kha ka rin aidaihin i kal pawh a pangai tawh kha mawle tiraw.."
"Nia, ka țha lutuk, ka pangai a ni ber tawh e, khawnge Ramtei te ho hi.."
"A nau tarmit lei a ngai a, ka chhuahpui hman silova an pahnihin an kal ta nih kha, chaw ka chhum kep dawn che em?" a ti zui zat a.
"Umh..kep rawh, vawksa rép ka eichak a ania aw.."
"Ham ham che chuan a... Arsa chhum hân țhing a awm, chu chu i inhmeh tawk chiah" a'n ti kherah!
Lianhminga room lamah chuan ka lut zui ve ta daih a.
Computer on ruk ruk pah chuan "Engtin chiah maw in awmdan chu ni a, inkhawlamah a rawn chho tih te kha chu chianglo ruaiin ka hria a.." a ti a.
Kan chanchin chu ka'n hrilh zar zar a, "A buin siam ang hmiang!" a'n lo ti leh hmanhmawh pek a!
"Tak taka ava mak teh nuaih ve mawle, a chhungte pawh chu an timak ve hle mai. Mipa takin kan che țiap anga nimai lawm le, mai mai salaa..."
"A hrim hrimah i chî te chu i kûi ve hman em ang chu maw..!" a ti zui a.
"Ka ke alawm nâ, thildang a na hleinem" ka tih chuan a nui hak a.
"A țhat chu, chutiang te a nih phei chuan engmah huphurhawm a awm loh chu. A rilru a chhungten an lo hmin mai ang tih a hlauhawm ve a, chutia i khenbur chat tawh te chuan ani pawh a țang ngam nang..Kan ru leh anga nimai lawm"
"Phone hi pek hmasak a ngai, engtinnge maw kan tih dawn ni, phone neilo chuan kan țhianpa hi a buai lutuk ang, neilo chi pawh a ni lo" ka ti a.
"Ka va kal mai dawn mi, ka hlau ve hleinem" a ti thar thar a.
"Kan hlau pawh a ni bik chiah lo, thil tih su kuk kan duhlo a lawm,"
"Ni viau bawk si" a ti ve mai a.
"I phone lei zawk chu i țhianpa chuan hmang sela nimai lawm.." a ti et a.
"A number zawk kha a pawimawh chu nia, a phone ai mah chuan" ka tih sak a.
"Tihdan 'awm ve leh mai ang... " a'n ti liam leh puat mai a..
Chaweikham chuan kan inlamah kan lut chho leh a, chuta țang chuan Lianhminga bialnu rim tumin kan chhuak leh a, a dik tak chuan ka peihlo hle a ni. Angela-i lo chu ka rilruah midang an awm theilo, engmah ka ngaihtuahnaah a leng lo. 'I leng thei chuang lo' tih țanchhanin min kar tlat mai bawk si. Phone pek dan tur te hi ngaihtuah a ngai asin mawle.
Kan veng kan pel fel awrh tih chuan bike pahnih hian min rawn umpha a, kan hnungah chuan mi lehpel duh silovin thawm an nei sek mai a, Lianhminga chuan a ning deuh nge ni kawngsirah chuan a ding zui a. Pakhat chuan min rawn tlanpelin kan hmaah chuan a ding ve chat a. Pakhat kan hnunglamah a ding bawk.
Lianhminga nen inphur kan nih vang chuan ka chhuk bik chuang lova, kan hma lama bike ding zawk chu ka en reng a, țhian te, college lama kan kalpuite uang mai mai a nih ka ring deuh a, mahse an bike number chu ka hriatzawng a ni tlat lo.
'Tute nge niang aw' ti a ngaihtuah paha an bike number ka chhiar mual mual lai chuan ka koki veilamah chuan thachak zet hian min rawn kuai nawk mai a, remlo zet chuan bike ațang chuan tuiluankawrah chuan ka tla thla nawk a, Lianhminga pawh a thum zui nghal țawk a, a bike a tlu zui bawk a, keilah ka kena lam delh zawng ber kherin ka tla bawk nen tho leh tur chuang ka awm tlat lo.
Lianhminga chu an din chilh a, "Vawikhatmah Lalmuanpuii saw lo tibuai tawh suh ang che u" tih pahin an paihthal leh tawp a, motor lo tlan a awm tak avangin an bike-ah chuangin motor a dinfel rual chuan an tlan chhuak nghal a..
Motor ațang chuan nutling leh patling hi an rawn chhuk a, Lianhminga chu an han kaithova, na lutuk chu a neih hmel loh, a hnar chu a thi deuh a nih hmel. Keipawh engtin tin emaw ka thochhuak ve thei mai a.
A bike-ah chuan a lawn thurh a, "Țhianpa, lo awm rawh aw tikhan.." a'n ti chheu mai a nih kha!
"A chiloh" tih pah chuan a chabi chu ka va dawm sak a, nupa niawm tak te pawh chuan min kalsan ve leh mai a.
Kan din vang vang hnuah a thinrim lutuk tihngaihna hre bawk silo chuan "Ka thi dawnin ka hria" a'n ti ringawtah.
"Bike number lah kha chhinchhiah nachang ka hre lo lehnghal...va'n zialo thei e..." a ti bai bai a.
Ka chhinchhiah tih sawi ila chuan a zan a zanin zawnchhuah a duh leh rum rum mai dawn si a, ka hrilh duh ta lo mai.
Kan inbeng fai thuak thuak a, kan tumna lam pan bawk chuan kan kal lui leh ta thova, a nuihzatthlak viau lo khawp mai.
A bialnu chu tê fel ren rawn, hmaifang țha zet mai hi a ni reuh a. A mah a pumraw tet ang angin a mawng a zan hmel phian bawk sia, bialnu a nei țha ve khawp alawm le.
Lianhminga chuan a hmai te chu a'n phih țha sawk sawk a, a nghawngah chuan hamna hnuhma niawmtak hi a inrin ruak mai bawk a, a bialnu ngaih chu a țha chiahlo tih a hriat reng, amah lah chuan a sawi duh der bawk silova. Keilah ka bal deuh nuau mai bawk si.
"Sawlai kawiah khan kan tlu a" a ti ta nge nge a, a rilru a dam deuh a niang chhanna dang a beisei zui ta bik em lo.
Thingpui no hnih zet kan in hnu chuan kan țin ve thei ta hram a, zeihmel fe in an hmaah ka chhuah ve vau vau kha mawle, in pedâk dun tak maw..
Lianhminga'n kan ina min thlah hnu chuan chhuah leh mai ka tum a, "Dar 10:00 a pel tawh a nia, khawiah nge kal ila tum?" ka u chuan a lo ti a. Chhuaklo thei niin ka inhre bawk silo.
"Chhuahlawk angai, min lo ngaihtuah suh, țhiante nen thil kan ti laklawh deuh a, ka rei deuh leh min lo mutthilhsan mai la.." tiin ka chhuahsan ta a.
Angela-i te in thlenhma kawngkawi kual zau laiah chuan Sikuti chu dahin an in lam chu ka pan phei a, a chhungte an mut tawh thu message a min rawn hrilh chuan thla a timuang ve deuh.
Ka hnaih phei zel a, Angela-i room chu a thim țhiap a, a room tukverh erawh ala inhawng thung.
"Le ka in ring e" tih ka thawn hnu lawkah chuan a tukverh ațang chuan puan zawmsei niawmtak hi a rawn thlak thla a, a hmawra phone a suih bâwk chu lain ka ah lai ka dah ve hma chuan inhnuai lam, a nu te room light chu a rawn eng thut mai a, hlauthawng renga awm tih takah a engamah hma chuan ka'n tlanchhe ngawt pek a!
Phone ka dah ve hman silo, inbiak dan chu a buaithlak ta viau mai, puan lah chu a khaichho zet a, a rawn thlak thla leh mai bawk si, an rawn hmuh teh chuan aw..An inbula motor phen ațang chuan light thim hun chu ka thlir kar a, zun zung emaw lek a ni ngei ang rei pawh nghah ngailovin a thim zui ve leh mai a.
Chu veleh chuan a rang a rangin ka kal phei a, puanhmawrah chuan phone chu ka va bâwk ve ta sawk sawk a, ka phihdet hnu chuan a hrethiam a niang a khai chho ta a.
An in chu ka kalsan thei ta. Ka thaw huai mai.
"Engatinge khati em em a i rei a?" tih message chu ka dawn hmasak ber a ni.
Ka hrilh hnuchuan a pawm ve leh mai a, min vautu an awm thu leh Bike number te chu ka han hrilh a, Bike number chu a hriatngailoh thu sawiin kan khawlama haw rih mai tur leh boruak sârhu a reh huna lo chhuk leh maiturin min ngen a.
A hlawhchham chiang hle.
Tute nge min vau a, kut min thlaktu te kha kan zawng chhuak ngei tur a ni. An phutawk lawmman an hmuh ve ngei theihna turin.
A tukah chuan Lianhminga class kal hlanin Transport Department lamah Licence buaipui turin ka kal a, anni lah chuan 'a hmain ila neih ngai loh chuan Learner la phawt rawh' an lo ti teh tlat a, hnialbuai lêm lovin ka nghak ve ta ran a.
Chutia ka nghahlaia ka ngaihtuahna ka kawm veng veng lai chuan a hma zana bike number kha ka hrechhuak zawk a, 'Tranport Department-ah an chhinchhiah vek ang chu mawle' tiin ka zawt kual ta zung zung a, Darkar chanve dawn kalkuala ka zawh hnuah chu number neitu hming leh chenna hmun chu ka hre thei ta a.
Ka bitum hmasak ber tur chu.
Ka Learner pawh chu ngaihsak lo chuan ka tlanchhuak ta daih a, kha bike number neitute in kha zawnchhuah ngei ka ngai si a ni.
A hming ka hriat tho vang chuan rei pawh ka zawng hman lo, pitar pakhat hian min lo kawhhmuh thuai a, an in vel ka chian hnu chuan hlawhtling inti takin ka hawsan ta kha a nia.
Lianhminga a rawn lut kawi a, chaweiah ka sawm tlat vang chuan mi hnial duh ta bik lova, 'zânah kan leng dawn nia' ka ti chu chhuanlam a siam deuh. A țangrei hauh lovang.
Zanriah kan eițan tih chuan Lalrova a lo lut ve leh chiah bawk a, tumlawk sa ang hrimin, a mak zawk hle mai.
Chawei khamah zanlama chhuah ka duhthu ka sawi chu an phur teh chiam lo. Mumal deuh taka ka hrilhfiah hnuah chuan kei ai aiin an hman hmawh leh lawi bawk sia!
Lalrova leh Lianhminga pawh inhresa ang hlauh an ni. An mizia a lo in ang bawk nen phûr tak tein zu phûr dun a mawle.
"Kal ang kal ang, ka motor-in a mi?" Lalrova chuan a ti ruai tawh mai a, a'n han insehruh leh rih țhin chu pui tak a ni.
Ka tiang hawl țhin zinga rit leh chhah țha ber chu lain Lalrova leh Lianhminga chu ka zui chhuak ta a...