Motor-ah chuan ka u mipa leh ka nu chuan min nawr lut rawk rawk a, tang turin chakna ka nei tawh lova, tha lah ka nei tawh hek lo.
Ka fanu kum 3 mi lek hlau lutuk avanga min lo ban tawk tawk chu banin ka pawm a, ka kuah hle hle a.
Ka rilru erawh a tawp mai lo, ka nu leh ka u chu ka sir ve veah an thu a, kan in, ka pasal leh fanu te nena hlim taka kan lo awm thinna chu ka va hawi phei tawk tawk a. Ka pasal nu chuan mittui hru zauh zauh pahin min lo thir a, ka pasal hmel erawh ka hmu lo.
Ni e, ka pasal chu min thlir liam tur chuan a lo dak lul lovang.
A chhan chu mahni pawha kal thei lo khawp a piangsual/zeng a ni tawh tlat a ni.
Ka fanu chu ka kuah a, "Bawihte, tap suh, kan kir leh ang, i pa bulah kan let leh ngei tur a ni.. kan haw leh ang a, hlim takin kan awm ho leh ang" ka ti rilru mawlh mawlh a, ka mittui chu a far fap a, mahse, ka tap thei tawh lo.
Tah vak hian sawtna min pe ni se,tunah pawh ka pasal bulah awmin ka kuah ang a, lungchim taka fawpin ka hmangaihzia ka hrilh ngei ang.
Mahse, tah hian sawtna min pe lova, ka tap hman lo. Ka pasal bula kir leh turin rilru nghet tak siamin ka inhum ruh teuh zawk a ni..
Motor chu a tlan a, kan in chu hawi let tawk tawkin ka tlir a, a hla telh telh a, a te telh telh bawk a, ka lungchhe hle mai, ka mittui a tling kiau a.
Ni e, he inah hian ka khawvel bul chu a in tan a, ka pasal nen, ka fanu nen kum nga zet chu tudang mah awt bik lovin hlim takin kan khawvel chu kan lo hmang ve a. Kan inhau ngai lova, kan khawvel chu a nuamin beiseina tam tak nen kan lo khawsa ve thin kha a nia.
Ka mit ka khap sak a, ka mittui chu a per sawk a.
Ka rilru na lutuk chu ka inseh ruh a, ka inhum ruh a, ka thaw kawk kawk a.
Ka nu tawngri chuan ka ngaihtuahna atangin min tiharh zawk mai. Ka nu hi tawng duh tak, nui duh tak leh tawng siam siam thin, tu pawh be thaa kawm thei vek chi a ni a; mahse, a duhloh zawng leh a pawisawi palh chuan nu rapthlaka an sawi, tumah zahpah lem lo, Nu pakhat chu a tling ve a ni.
"Mami, (ka chhungte min koh duat na) ti khan a fel a ni mai.. i tana tha tur bak i chhungte hian kan duh ngai lova, fa pakhat chauh in la nei bawk a, i inti nula ang a, i hmel te a tha a, pasal tha tak i nei leh dawn alawm. Zuala (ka pasal) hi zawng, tunah chuan piangsual a ni tawh a, i tan phurrit mai a ni.. kan khawngaih vang che a nih hi hetia kan tih"
Ka nu tawngkam chuan min tina lutuk a, ka chhang thei lo, tawngchhuak turin chakna ka nei lova, tap tur pawn chakna ka nei hek lo.
Ka thinlung na lutuk hi thih daih mai ka chak a, mahse, ka fanu muhil bem hmel chuan dam min tichak hliah hliah bawk si.. Ka pasal chu piangsual tiin a sawi a maw? Ka nu mah nise, khatih laia ka huatzia leh ka tenzia kha.
Ni e, ka pasal chu piangsual a ni mahna; mahse, ka tan chuan piangsual a ni ngai lo, ka pasal a ni a, ka hmangaihna a pung sawt zawk asin..
A duh vanga piangsual a ni bik lo, a vanduai palh a, a tawng palh a ni mai.
Motor chu a speed ngaiin a tlan zel a, ka mut chu a chhuak takzet a ni mahna, ka muthlu lap lap mai a..
Tlai dar 4 velah chuan kan in(ka nu leh pate in) chu kan thleng a, chaw pawh ka ei peih lo, ka inbual peih bawk lova, roomah chuan ka lut a, khumah ka mu hlawm ta tawp a. Ka mutchhuak lah a reh telh telh a, ka pasal ka ngaihtuah a, eng tin tak awm ang maw?
A rilru nat dan tur ka hre vek a, tih theih a nei der si lo!!!
Ka pain ka nu bula 'in lo hruai theih pawh ka ring lova, Zuala chuan kaltir a lo phal ve mai bawk em ni?' tia ka nu a zawh laia ka nu tawngkam chuan min tina hle mai "Zuala chu kan vau lawk nasa bawk a, a hlau ve a niang, engmah buaina awm em em lovin kan lo haw thei nih hi".
Ka mittui chu a lo luang ngiai ngiai a, nep ka va inti tak em!! Ka pasal ka kalsan mai kha.. mahse, tih theih kan nei lo ve ve a, thapui hmanga min nawr kha a ni miau si a, ka rilru na lutuk chu ka rum chhuak hial a.
Ka nu bawk chuan,"hun a ral ang a, kan chungah a la lawm telh telh mai ang, pasal tha deuh nei se, tun hun te zawng a ngai teuh lo " a la ti ta deuh deuh a.
Pasal dang ka nei ang a, ka pasal ka phatsan ang maw? Ka pasal hi Kohhran dan puitling ngata ka neih leh, Pathian hmaa thu meuh tiama ka neih asin. Chu chu bawhchhiain Pathian pawh zah zo lovin ka phatsan thei dawn em ni?
Ni e, ka pasal hi ka chhungte lungtlu zan lo khan Kohhran dan puitling ngatin ka nei kha a nia, a nuam ah pawh a hreawmah pawh vuan tlat turin ka intiam tak asin.. Tunah kan thutiam chu ka bawhchhe ta si, mahse, eng nge tih theih ka neih chuan?
Hun a ral a, ni aliam zel a, ka rilru hreawmna chuan min kiansan ngai si lo. Ka pasal ka phone a, switch off ti reng si, kan chhungte ka phone thin, switch off tih loh leh tuman phone an pick up ngai si lo.
Ka beidawnna chu a zualin ka chau ta em em a, ka chhungte lah chuan ka che hlek hi jail tang ven ang mai hian min vengin min enthla reng mai si.
Hun a ral zel a, ka phone hial te min dahbo sak a, ka beidawng lutuk chu thih mai ka chak thin. Ka pasal ka ngai em em a, minute tin hian ka ngaihtuah a, he khawvelah hian ka hmu leh ang em?
Ka tel lovin adam zo angem?
Min mamawh a, keiin ka mamawh bawk a, mahse, kan inthen chu a ni si....
Ka kalsan dawn tih kha a ni chuan kar khat hma lam khan a lo hre lawk vek tawh a, tinge engmah min hrilh loh? min hrilh ta se, ka theihna zawng zawng nen ka tlanbopui mai tur tih ten ka ngaihtuah thin.
Awww....... kha zan lungchhiatthlak tak kha, Ka nuin an thutlukna min hrilh laia ka hamhaihzia leh mak ka tihzia kha.
Kei chuan, ka pasal hi ka then thei lo, Pathian hmaah thu meuh tiamin a nuamah pawh a hreawmah pawh tiin ka tiam a, ka vuan tlat dawn ka tih lai a, ka u-in na taka ka hmaia a ben khan tinge ka lo dawh mai mai le...?
Zuala chu wheelchair-in a lo in nawr kal a, ka nu chuan "kha, Zuala lo hrilhfiah rawh' tiin ka u nen khan room atangin min chhuahsan a, khata Zuala thusawi khan min va deng na em!!!
Linda, ka hmangaih loh vang che a ni lo tih i hriatthiam ka ring, ka hmangaih vang zawk chein min kalsan la, nun thar tan tha rawh, kei chu piangsual ka ni tawh a, i tan phurrit mai ka ni.""
A ngawi vang vang a, a thaw hak a. A kut erawh a hum ruh hle tih ka hria.
"Ni lo, Zuala, ka kalsan thei lo che, ka pasal i ni a, Pathian hmaah Kohhran te hriatpuiin thu kan tiam kha.. ka tan hian piangsual i ni lo, ka pasal, ka hmangaih leh ka damchhan i ni, ka kalsan dawn lo che.."
Kan ngawi vang vang a, kan thaw ri leh lungphu erawh a ring hle.
"Zuala" ka titham riak a.
Min chhang lo... a inseh ruh a, min en hek lo..
"Duhtak"
"Ni lo, Linda, naktukah i nu te rualin haw ang che, ka mamawh tawh lo che" a ti ta khawl mai a!!!
Ka pasal lam pan chuan ka tawlh phei ruak a.... "Ni lo, duhtak, chutiang chu sawi suh... ka kalsan thei lo che, i ti tak tak lo tiraw?" ka kuah a, ka inhnit hlawp hlawp a,
"Zuala, i ti der tiraw?"
Ka pasal chu ngawi rengin a inher a, min chhuahsan a, ka tap hlawp hlawp a. Ka nu(ka pasal nu) chu lo lutin min lo kuah a, "Mami, thil thlen dan hi a mak ka ti khawp mai, ka hrethiam lo a ni, tih theih ka nei si lo a, min dem suh aw"..
'Ka nu, tinge i neih loh? ka nu te hi dang la, min pui hram rawh" tiin ka ngen chiam a, mahse, tih theih kha a nei tlem em tak a ni.
Ka nu chuan Zuala'n a phone a, a lo kal thu leh ka pasalin min dang lo tura a tih thu te, ka nu ten ka pasal an vau thu te chu min hrilh ta a.
"Mahse, Linda, ka fapa hian a hmangaih lo ngai lo che asin, chu chu hre reng rawh aw.... i haw ang a, nang pawh tha taka nungin pasal thatak i nei ang a, tun hun hi i ngai lovang. Fanu ang tak takin ka en che a, min enkawl dan leh ka fapa i enkawl danah te hian vuina tur ka hre ngai lova, ka fakin ka chhuang thin che a, i chhungte thil tih dan hi duh lo hle mahila, keini chuan tih theih kan nei lo a ni, chan chhe zawk kan ni a, tunah chuan piangsual mai a ni tawh a, mahni pawh a kal thei lo, buaipui ngai reng a ni a, i tan phurrit mai a ni tawh, i nu te ngaihdan pawh hi dem lutuk suh"
Chu thu ka hriat tirha ka nat dan leh ka tah nasatzia kha.
Mahse, tih theih a tam si lo. A tuka duh lo teh mah ila, thapui nen meuh Motor ah min nawr lut kha a ni si a.
Chu'ng thil ka ngaihtuah let avang chuan ka mittui chu dan rual lohvin a lo luang a, ka thawmhnaw suk chu ka dah a, ka mu tlawrh a, ka chau takzet a ni.
Hun a liam a, ka fanu pawh school an kal tir a, nitinin a putea hian a va hruai thin..
Ka pasal ka ngaihna chu a reh ngai lova, a zual telh telh a, eng tin nge a awm ang tih ka ngaihtuah reng thin.. Zan tam ka mu lova, chaw ka ei thei hek lo.
Kan chhungkua a hlim taka hun kan hman lai nite ka dawn kir a, mihring te hian kan hma lam hunah hian eng nge kan tawn dawn tih hre lawk thei ila, tuma'n vanduaina hi kan duh bik lovang, pumpelh dan zawngin mitin hi kan phu buai viau dawn si.
Mahse, Pathian hian kan tana tha lo turin rem min ruatsak ngai lova, lesson min pek apiang hi zirtirna vek a lo ni si.
Malsawmna zawng zawng min vur ta se, amah kan hriat rengna a ral tial tial ang a, kan boral dawn si. Chu chu a phal lova, kan hringnunah hian Lesson min pe a, zir thiam turin min duh a lo ni.
Tuna ka pasal nena kan chungchangah pawh hian lesson tha tak min zirtir a duh vang a ni ngei ang tih ka hria a, mahse, hrethiam turin chakna ka mamawh si.
Ka pasal ka hmangaihna hi fiah a duh a ni mahna... a fiahna hmuhtir ngei turin eng tin nge hma ka lak ang...? A hmaa ka thu tiamte min hlentir tur hian engtia ti turin nge min duh?
Ka beidawng a ni.. mahse, beidawng thei ka ni lo, hmangaihna thinlung chuan min nawr ut ut a, bul tan dan min hrilh si lovin, min nawr nasa viau si.
Ka pasal te nen chhungkaw hlim taka awmin, a office kal tur ka thlah a, a ban hun nghaka ka lo hmuah lai te, accident a tawh hmaa motor khalh min zirtir lai te, khang zawng zawngah khan ka hlim lutuk a, Pathian ka hre chang lo pawh a ni thei. Chu chu Pathian hian a lo thik ang a, lesson thar min pe a ni tih ka hrethiam ta..
Ka pasalin accident a tawh ni a, hospitala hlauthawng em em leh thlabar taka ka tlan hlawk hlawk lai a, damdawi In khuma a lo mut a, amah zawk tlaphan hmel taka a lo mu ka hmuh a, ka zamzia leh mangan rukzia kha. Mahse, ka ti lang ngam lova, ka hnem a, ka kuah a, ka fawp a.
Hun a liam a, hma a sawn hlei thei lova, a lo rei a, a ke chu a lo zeng ta hial a. Buaipui ngai leh awmpui ngai reng a nih vangin hrehawm a ti em em a, a zam a, hreawm a tihzia a sawichhuak hial thin.
Mahse, ka beidawng ngai lova, ka hmelah ka manganna ka tilang ngai lo. Hneh takin, midang puih ngai hauh lovin ka pasal chu hmangaihna nen ka enkawl a, ka zam ngai lo a nih kha.. Ngati nge tuna taka ka chauh a, ka zam a, ka tlukchhiat dawn tak mai?
Hetiang hian ka awm tur a ni lo... ka pasalin min mamawh a, kei paw'n ka mamawh a, Pathian hmaa kan thutiam ti hlawhtling nawn turin ka penchhuah a ngai a, chak taka ka awm a ngai.
Ka sam chu ka hui pap pap a, ka tho va, chaw ka ei a, ka che malh malh mai.
Ka nu te bulah chuan thla hnih dawn kan awm a, ka mizia ka her danglam hret hret a, tunah chuan min ring ve tan ta.
Hun a liam zel a, kei pawh ka inenkawl uluk deuh deuh a; mahse, thil tum pakhat chiah ka nei, chu chu ka thinlung zawm a, ka pasal hnena kir a ni.
Ka fanu school bang hruai tur chuan ka chhuak a, ka nu chuan lo bazar nghal la tiin pawisa min kentir bawk a. Ka fanu school bang chu hmanhmawh takin ka pawm a, sumo counter lam pan chuan ka phei hlawk hlawk a. Ticket cut sa ka ni lo naa a lo la full lo hlauh. Ka lawm lutuk chu ka mittui a tla hial a.
Motor ah chuan ka fanu pawm chuan ka thu ta vang mai... tlanchhuak har ka ti khawp mai a, ka thin a phu zawih zawih a, ka fanu chuan "Anu, khawnge kan kal dawn?"
"Bawihte, i pa bulah" ka ti sap a.
Kan tlanchhuak ta. Ka lawm lutuk chu ka nui sak a, ka thaw hiam hiam a..
Kan chhungkua hlim taka kan lo chen thinna chu tlai dar 4 velah kan thleng a, ka thaw huai mai. Ka helhhawlh lutuk a, ka fanu chu ka pawm a, ka tlan hi a ni ber mai.
Min hmutu lo awm se chu naupang rukbo tum emaw min ti hial ta ve ang.
Mahse, kan in chu tala lianpui hian a lo inkalh bam mai. Ka zawi hnawk a, ka tlu thelh a ni.
Ka beidawng lutuk chu ka mittui a far fap fap a, ka thu hnawk a, mahse, chutianga awm hman ka ni lo. Ka tho va, thenawm inah ka lut a, ka hmel an hmu chu mak an ti hlawm khawp mai a, chanchin te ka sawi a, min lo khawngaih khawp a, kan pa chu anu te in lamah a lo awm daih tih te ka hre ta a, ka thaw huai mai.
Chaw kan eikham a, a tuk lama kal turin min ti naa ka pasal ka hmuh chak lutuk avang chuan zanah motor hmangin kan thlenna nu nen, ka fanu nen chuan kan chhuak ta a. Ka zauthauin ka helhhawlh hle a. Kan pa te awmna tleng tur hian darkar 4 bak a ngai tawh lova, dar 6 ah kan chhuak a, tluang takin zan dar 10 pelh hret ah kan thleng ta a.
Kawngka chu ka pawt hawng rawk a, ka lut ruak ruak a, ka pasal nu chuan mak ti leh hamhaih takin min lo en ka ho mai a, tawng nachang a hre mai bik lo..
"Ka nu, khawnge ka pasal, khawnge zuala?"
Ka nu chu a harh zawk a, ka kalpuinu khan chanchin a lo hrilh malh malh a, ka nu chu a mittui a tla zawih zawih a, "Khawnge Zuala?
"Linda, helamah" tiin zuala room pan chu kawkin a pan a, ka um dawr dawr a, kawngka chu a hawng a, ka tlan lut ruak a.. ka pasal chu tukverh lam hawiin, a wheelchair ah chuan a lo thu a, ka kuah chawt a "Duhtak"
Ka aw a hria chu a phu zawk a, mak a ti hle tih ka hre thei.
Ka nu chuan ka fanu leh min zuitunu buaipui tur chuan min chhuahsan a.
"Duhtak, ka lo kir e, ka kalsan tawh lovang che..." ka tap ta..
Min rawn kuah let a.
"Linda, i lo let hi ka ring reng thin asin, min kalsan tak tak lovang tih ka hria a, ka ring che asin, ka hmangaih, inthen tawh lovang aw, a hrehawm em mai.." a mittui a dang zo bik lo.
Kan inkuah a, kan infawp a, kan tap dun a, kan hlim ru veng veng bawk si.
Hun a liam a, ka chhungte pawh an reh ta hmak a, hlim takin hun kan hmang chho tan a, ka pasal chu beidawng lovin ka enkawl a, excer ka laktir thul, ka zut thul, kal ka zirtir a, kal tir ngei tumin ka bei a, a chang chuan amah zawk hi a beidawng fo thin.
Mahse, beidawnna hi hnehtir ka tum ngai lova, ka theih tawp ka chhuah a, tichuan in chhung dung chu amahin, a ke ngei chuan a kal ve thei ta sawih sawih a, kan va hlim tak em!!
Mahse, ka hlimna ka duh khawp lo, ka bei uar zel a, hma a sawnin a tha chak em em a, amahin khawlai te pawh a kal thei ta hial mai.
Hun a ral zel a, chutiang chuan beidawng lova kan beina chuan rah duhawm tak neiin tunah chuan Office kalin, amahin motor pawh a khalh leh thei ta.
Chhiartu Duhtak, Pathian hmaa Kohhranho hriatpuinaa i thutiam kha i nupui/pasal lakah i hlen ve em?
A nih leh i natna te, i tawrhna te kha i inhnehtir mai nge keimah ang hian chhel taka tuarin, i bei let zawk?
Ni e, inhmangaihnaah chuan tih theih loha an sawi pawh hi a tih theih fo asin.
Hmangaihna dikin i kawppui kha hmangaih la, beidawnna erawh lo inhnehtir ngai suh aw.
Zing ni chhuak chu a mawi hle mai, ka pasal bianga fawp zeuh pahin, vawiin chu Motor khalh min zirtir rawh aw tiin ka tho kang uaih a.
"KA HMANGAIH CHE". tiin ka biangah min lo fawp let a, kan inen a, kan innuih sen sen a.... ♥