ZOBIAKSANGI(Episode - I) Ziaktu: Toni Râlte
Ka mit a hupna chu ka la thla a, a perfume rim atang chuan tu nge anih ka hre nghal.
"Vawiin tlai chu chaw ka rawn ei dawn a, nu Sangi vawksa rèp vaipaden ka ei châk a" a ti liam puat a. Ka thil khawih lai chu ka khawih chhunzawm a. Ka hma zawnah tak rawn thuin, "Heii.. Vawiinah Jenny ka hmu ania aw" a rawn ti leh a. Ka dar ka lo san âk ringawt. A laka ka tihtauh changa ka tih thin dan a nia. Nia, ka best friend Zobiaksangi lakah ka titau tlat. A chhan pawh ka thianpa Freddy a lo hnar vangin. Freddy hian theihtawp chhuahin a ngaizawng a. Care dan chikimin a care ve bawk. Inkawmho vek kan ni a, kan inpawh tlang bawk. Mahse, freddy a lo hnar avang hian kan thianho chu eng emaw chen kan kehdarh phah dawn niin ka hria.
"A mak! Titau lo teh. Bér búr a che" a ti leh nghat a. Min en reng tih ka hria. Ka melh duh miah lo va.
"A chhan tal i sawi a ngai" nem deuh zawkin a ti leh a.
"Freddy-a hian eng nge tlin lohna a neih? " ka ti ta a. Ka thil khawih lai chu ka dah chhunzawm a. A khabe dawm chungin a han chhing diar diar a. Eng emaw a ngaihtuah chiam ni.
"Thian ngaihzawn ka duh lo alawm. Kan inthen hunah kan inthian thei tawh dawn lo asin" a ti a. Ka lo ner sâwng ringawt.
" Tak tak alawm. An sawi mi paw'n.. Thian tha chu ngaihzawn loh tur, inthen hnuah ahmaa inthianna kha a awm leh thei tawh lo an ti vek" a ti leh niap niap a.
"Thian anih vang ringawt chuan ami i hnar? Thil dangah chuan i duh ve tho tihna mi?"
"Ih.. Mmm.. Àaa ka duh vak lo hrim hrim. Ninawm. Nge Freddy pawh chu i va tan ve" a ti ta hlak hlak a. A thinchhia a chhuak leh tih ka hai lo.
"Tikhawp hian a duh ve che a. Chhan ve mai tur nia. Kan bulah pawh a awm duh tawh nang" ka ti hmarh hmarh a.
"Awm lo se ni mai lawm, a tel lo pawn kan hlim tho a.. Nge i buai vak"
Huiham.. Mawli hi chu a.
Class v kan zir lai atang tawha inkawma inzui kan ni tawh a. Kan in leh an in chu in 3 chiahin a daidang. Kan pa te ve ve hi nupui an neiha in thian an ni a. Kan hnampui an ni bawk. Chhungkhat ang maiin engkim kan inban tawn thin a. Unau ang chiahin kan inchenchilh bawk. Kei aiin kum khatin a naupang bawk. A tetlai chuan patil ang deuhin a khawsa thin a. A nu hi a mangang thei viau. Unau mipa pathum kara hmeichhe awmchhun a nih vang pawh aniang. Kei erawh unau pathum kan ni a, ka nauah mipa, ka ú hmeichhia a ni thung. A pa hi High School zirtirtu anih laiin ka pa erawh Doctor a ni thung. Middle school atanga college thleng kan kalho a. Tunah hian final year kan zir leh mek a ni. Aniin Education a lak laiin keiin Political Science ka la thung.
Kan thianho hi paruk kan nia, amah leh Freddy tih loh hi chu inngaizawng kan ni. Thianho bikah rau rau pawh ani leh kei chu kan inhnaih zual a, chu chu thiante pawn an hai lem lo. Zobiaksangi chu ngo vir ver, te taktè a ni. A te fel ât kan tih ang chi kha a nia, a hmel erawh a tha ver vawr hle. Ka palen deuh avang hian kan insan hleih ve khawp mai. Car ka neih hma chuan bikein kan inphur nitin thin a, a lawn dawn apiangin bike tihhniam a ngai ziah bawk.
Zanriah kan ei kham chuan ka roomah kan lut a, khuma thuin laptop ka chawi phei a, movie kan en leh dawn a ni. Kan tih thin dan a nia. Freddy chungchang eraeh ka sawipui duh tawh lo, a bak hlar reuh sia. Ka ning.
Kimi'n min lo be zuai a. Ka bialnu a nia. Ani erawh Zoi letling a ni. A hleitling a, háng ngaihnobei kan tih ang hi a ni thung. A hmel pawh a tha ka ti. Kan inngaihzawn hnuah a thiante leh ka thiante an ni zui ve a. Tihian kan inkawmho ta vek a ni. Zoi a thu ber thin, a te ber thung.
"Kimi hi neih i tum em?" A ti sup a. A zawhna kher kher chu..
"Hre lo, kan nih zel chuan neih mai lohin"
"Thianah min hmang dawn em? "
"Tu chuan, kimi chuan maw? "
"Aih, nangman"
"Mawli" kan nui vak vak a. Thianah hman theih nise ka hmang hreh miah lo.
A haw hnuah Freddy chuan min rawn bia a, a rilru a na ve deuh a ni ngei ang. Hnawl a ni miau sia! A hmelthata an hausak nen. Zoi chu a â ngawt mai. A tuka kan thianho kan han inhmukhawm chu pakhat a kim lo ta phawt. Mak kan ti lem lo va, zawhna pawh kan nei lo. Canteenah kan lut leh dial a.
"Zo, saw pa sawn a en reng che mawle.. " Lucy chuan a ti sar sar a. Kan va hawi rual thup. Thing thei.
A lo ni lah taka, chu pa chu ka la hmuh pawh ka hre lo. Sa ngeht tlet tlawt, mitmeng na deuh mai hi ania. A nelawm loh hmel.
"A chhiat loh saw" Zoi.
" ve a, nang hian tumah i duh tak tak lo. " ka lo ti nghut a. Vawi khatmah ngaihzawng a la nei lo tlat alawm. A zei lo ngawt ang.
"Saw pa saw chuan min bem se ka tlu sa" a ti ve har har a. Kan nui tawp.
Kimi patea, cancerin a tlakbuak mek kan turin Durtlangah Kimi ka kalpui a. Chawhnu class kan kal ta lo. Dar 5 velah in ka thleng a, ka inbual hmain phone ka check phawt a. Zoi msg a lo awm a.
"Ess, enteh, kha pa khan min bem a tum tak takin ka hria. Ka number te a lo dil a" tih hi. Ka nui sak. A duh ve chuan a tha. Ngaihzawng nei lo va hei chen awm hi a ni em em tawh lo. Zanah an inah ka va phei ve thung a. Chaw an lo ei kham deuh chiah a. An chakai bawppui lian deuh deuh pahnih ka va kheh hman hram kha.. A roomah kan inzui lut a.
"Kha pa kha duh ve tawh la" ka ti a.
"Chu chu lawm.. Enteh, ka ngaihtuah ve reng anih chu. Mak tawp" laih hmel deuh hian a ti a. Ka lo nuihpui a..
Kar khat a ral a, Zoi paw'n bialpa a nei ta. Ka lawmpui takzet. Bsa pawh kan thian zingah a tal ve tan a, freddy pawh a rawn mawm leh tawh. Tin, bialnu a nei bawk. A bialnu erawh Zoi te ei loh chi tak a nia, kan bulah a awm ve ngai lo. An sual thei siah.
Zoi bialpa nei chu kan inhlat phah deuh. Inkawmho reng mah ila, Bsa a ngaihsaka a kawm tam a lo ngai tawh a. Pawi ka ti hran lo. Bsa chu Kolasib khua a nia, hetah in luahin a khawsa ve a. A felin a changkang ka ti. Kawm a nuam viau bawk. A in luah pawh kan hmang tangkai tan khawp mai. Ni khat chu an pahnihin class an rawn off ve ve a. An leng dun ve anih ka ring. Zanah min rawn call a, an ina phei lawk turin.
"Ess, vawin khan kan leng a, ih maw, Bsa hi a hur tawp" a ti tawng a. Ka tui in lai ka phuh tep.
"Khatin min melh suh. Kan inti lo hrim hrim. Ka duh teuh lo, mahse, min fight nasa tawp. A zei sia e.. Ka tlu tep a ni" a ti ham ham a. Ka thla a muang ta deuh. Virginity hlutzia te ka sawipui ta chiam a. Kan sawi dun khât nen. Ka nau ang anih vangin hrilh hriat kha tha ka ti hrim hrim.
Exam kan hmachhawn dawn ta reng mai. Engkim a la tha a, kan la kal tluang ve zel e. Kimi nen pawh kan inzawmna a nghet tawh takzet a. Min ngaihsak a, min duat a, a bula awm hi ka kham hleithei thin lo. Ani pawh Lunglei khua daih ania, a nuteii te bulah a rawn khawsa ve a ni. A nuteii hian a duat bawk a, nufa tak tak ang chiah an ni. Ka leng ve fö a, kan inpawh tawh khawp mai.
Exam nan ni 2 chiah hun kan la nei tihin chaw eikhawm an rawt leh tlat pek a! Hahthlak thei. Bsa inah bawk kan tihtluk leh kha. Ani hi a inhuam thei a, bakah mahnia awm anih vang hian kan free ve bawk nen. Chhunah hmeichheho an bazar a, chawhmeh chi hrang hrang an rawn hawn a. A kawp te tein rawng kan han bawl suau suau a. Nuam ve tak a ni. Roomah a sehhmeh kan va lem zeuh zeuh bawk a. Hmeichhiain beer an dawm far bawk. Zoi erawh mi danglam ngang a nia, "In beer ve hi ka thengthawngah a kal ve lo" a ti mauh mai a. Kan in ang a in ve leh tak mai kha. A tih than dan ania, ngaiah kan nei tawh. A dose a sang reuh zèk! Chaw ei hmain Card kan deng a. Kan bengchheng ve kher mai. Ka thiante hi Hlima leh Lucy, Bena leh Dami te an ni hlawm a. Kei leh Kimi leh Bsa leh Zoi. Mahni tawkah chuan kan hlim ve takzet.
Zanriah ei khamah pawh tumah hawn hrih loh tur tiin chhungte kan be lawk diam tawh a. Zoi phei chu ka bula riak tur angin ka sawi vek tawh. Zu a in miau a. A heti ziah alawm.. Zai kan play bur bur bawk a. Thenkhat kan lo lam thul. Exam hmabak kan ni tih kan theihnghilh hmak.
Hlima leh Lucy te roomah an awm a. Kei leh Kimi erawh bathlar thlang lamah. Bena te chu eitur leiin an chhuak lawk a. Zoi te chu sitting roomah an awm thung. Kan titi mawlh mawlh laiin inhau thawm kan hre ta tlat! Hlauthawng deuhin kan lut a.
Hmeichhe pakhat kan la hmuh ngai loh hian Bsa te chu a lo dinchilh ran mai a. A hnungah a thiannu niawm tak a lo ding bawk a.
"Hetiang i nih ka rin vang ania ka lo kal. Ka rinhlelhna che hi a rei tawh mai" a ti bawrh bawrh a. A ngaihna ka hre lo angreng. Zoi erawh chuan chu nu chu a en uluk khawp mai.
"Thiannu, eng nge a awmzia? Eng nge thleng a? " ka ti ta tawp a.
"Biaksanga bialnu hi ka nia. He lai hmuna in nawmchenna chu tawk tawh rawh se, min hawnsan tawh ru" a ti!
Bsa chu ka va en a. A kun ngal mai. Zoi erawh a zah hmel kher mai.
"Chuan nang hian ka bialpa hi lo be tawh ngai suh. Ka ta a nih hi. I hria maw? " tiin Zoi chu a dinchilh a. Ka chet hmain Kimi a rawn tawngchhuak ta a, "Enteh, thiannu, i bialpa a lo nih pawhin tha takin a sawi theih. Kan thiannu hian thiam lohna engmah a nei lo. I bialpa hian a zar hneh èm a. A bum thlu ta anih kha.. Chuvang chuan khatiang vak vak kha chuan rawn tawng lo teh" a ti ve ta hmiah a. Bena te pawh an rawn thleng tawh a. A ngaihna an hriat loh hmel hle.
Bsa ber a ngawi tlat bawk si. Zoi chu kan kai chhuak a. Ngawi rengin kan chhuak ta dial a. Kan thin a rim tlang angreng. Ngaihzawng nei ngai reng reng lo khan a duh ve em em a tawng a, tha takin an inzui a, tunah exam dawnah lehnghal a bialpa chuan a lo kawp reng tih a hrechhuak ta chu a ni sia. Zoi chu a ngawi tlat reng a. Kan hnem mawlh mawlh bawk. Thla 5 chhung lai an inzui chhung khan Bsa hi rinhlelhawma a awm kan hre ngai lo. Mak tak a ni. Zoi lahin tihtakzetin a lo hmangaih tawh lehnghal.
"Zo, mipa pakhat chauh an awm lo ania. Bsa aia tha leh fel i la tawng dawn chiang lutuk" Dami chuan a ti a. Kan lo e aw tliar tliar bawk a. Ka han en thin, nâ a ti tih a lang reng mai si. Tah èm chu a hreh ve tih ka hria. A mittui erawh a tling piau reng a. Zu a lo in ve kher bawk nen. Kha nu rapthlak deuh lah khan a vin hrep a, zak takin a siam a ni si a.
Kan in kan thleng a, kan ina riak tur anga ka ngaih avangin garageah motor dah ka tum a. "Min thlah haw rawh" a rawn ti tham chhel a. Tap lo turin a insúm nasa tih ka hre thei. Nawrluih chi nia ka hriat loh vangin a thu chu awihin ka thlah haw ta a.
"Zo, sawi dun i duh em? " ka ti a. Car kawngkhar hawn pah chuan min rawn melh sawr sawr a, a mitmenga hliam thúk tak chu hmuh a va hrehawm èm. Nui lui tih hriat zet hian, "Ka tha alawm.. Ka tha mai ang" a ti sap a. A chhuk ta a. Ka thlir zui vawng vawng mai. Ka thiantha ber tinaa phatsantu Bsa chu ka haw lutuk.
Mut hmunah te chuan Kimi nen whatsappah kan sawizui nasa a. A khawngaih ve ngang aniang, Bsa va biak te a tum thut thut mai. Ka remti lo thung a. Ka tlaivar thelh a ni, ka thiannu ka khawngaih luatah. Ani lah a online miah lo va, ka call ngam hrih lo. Tuar phawt rawh se, amaha awm a duh rih ka ring.
A tukah chuan zing karah ka va kal a, a lo la mu. Kaihthawh ka va tum chu a khua a lo sik nasa mai a! A pang a lo sa vûr nia! Rang takin a nute ka hrilh a. Damdawiin lamah kan inphur chho ta a. Thiante ka hrilh kual zung zung a, tukthuan ei khamah chuan an rawn lang sap sap mai. Malaria anih ringin thisen an la a, an hmu thei bawk si lo. Ani lah a harh hleithei tlat lo mai a. A khua erawh a sik tawh hrih lo. Bsa chu hrilh ve hrim hrim a tha angem tih kan sawiho a. Bena chuan hrilh a phal tlat lo. Tlawmah a la tlat! Bsa hi hmuha hnek a chakzia a sawi chamchi! Naktuk tuk leh maiah kan exam dawn bawk si. Rilru a va tibuai reuh tak.
Nilengin kan awmpui a, anu te pawh an lawm ve khawp mai. Zan lamah chuan kei leh Lucy nen kan han kal leh a, thian dangte erawh lehkha zir a hun ve tawh bawk nen, kan phút ngam lo. Lucy hi chu kan venga awm tho anih vang leh lehkha thiam lutuk, pass ngei ngei tur ania. Zoi chu a lo harh ve tawh a. Kan lawm ngei mai. A lo nui ver ver a. A hmel a dáng nghal bai mai. Rilru lam tawrhna hi chu taksa hian a va haw tak em aw.
"A thing rim ka la namin ka hria" a ti sur sur a! Lucy nen kan nui hawk hawk. Rin aiin a zangkhai ta phian a. Amah leh amah te a insawisa thul, a dam lo ber chuan min tihlim ta phian.
A tukah exam hmabak anih avangin chhuah an dil a. An chhuak thei hram. Exam chu a tum nghet ve bur niin ka hria. Zanah lehkha zir tur nen ka va inchhawp phei a. Kan zir dun ta a. Bsa lam reng reng kan sawi lo. ka haw dawn erawh chuan, "Ess, mi dang ta ka lo duh ve hi chu ka thiam lohna a ni bik lo tiraw? " a ti sap a. A lu-ah ka chul a. "I thiam loh engmah a awm lo, bumin i awm a ni mai. I rin èm vang chauhin alawm a bum theih che" ka ti a. A nui seih a. Kan inmang tha ta a.
Exam zawh ni a thlen meuh chuan kan chau nghuai mai. Exam chhung zawng khan Zoi chu lungngai deuhin a awm ka hre lo. A hlim loh kan hlauh luat vang nge tuar awm lo deuhin ka hmu tlat mawle. Bsa erawh a hmel hmuh tur a awm lo. A zak nge kha nu khan kal a phal tawh lo zawk.
Exam zawh tukah Zoi chu a ni, Lungdaia awm te bulah a zin nghal. A mamawh tih ka hria. Zin khawthawng teh se. Mahse, a khawharthlak. Kimi pawh a haw ve zuai a, kawm tur ka vân, Bena leh Hlima lah kan veng a inhlat hlawm si a.
"Hello, ess, Bsa te kha an inru a mi? " a rawn ti a. Ka call hmasak loh chuan min lo call a tum lo va, ka titau ve deuh a, ka call duh ta bik lo kha a nia.
"Ka hre lo reng reng. An sawi mi? "
"Aw, hei Adini tehoin an sawi a. Ka zawt mai mai che"
"I thÃk a mi? Nge innei mai mai teh se"
"Nia, innei rawh se.. Ho lutuk" ho a ti tak tak lo tih ka hai hauh si lo.
A rawn hawn zan chuan ka va leng nghal a. Thei tui deuh deuh min lo hawn a, chungte chu ei pahin kan titi mai mai a.
"Ih maw, Ess, mi dang chu hrilh chuang lo la, kei chu ngaihzawng neih ka duh tawh miah lo. Na ka ti è mai. Bsa khan engtin nge khatiang kha ka chungah a tihtheih tih hi ka la ngaihtuah thiam lo" a ti ta hlawl a.
"Ka hrethiam alawm.. Mahse, ngaihzawng dang neih loh phah nan chuan a ho ka ti" ka lo ti thung.
"Aa.. Mipa hi ka rin leh theih pawh ka ring lo" ka hrethiam lutuk. Mahse, hun a la ngah a. Engkim a that leh theih ka beisei.
Hun chu a kal liam ve zung zung a. Result a lo chhuak ve ta hial mai. Zoi chiah 2nd div ah a passed. Mi dang chu 1st ah vek. Tuman kan dem lo. A chhungte pawh an lawm hle zawk a. Result chhuah tlaiin an inah chaw kan eikhawm nghe nghe.
MZU ah bawk luh leh kan tum fur a. Mahse, Zoi chuan a duh ve ta tlat lo! Delhi-a a û te bula awm a tum a ni. Kan dan zawh rual a ni bawk si lo va, kan kim dawn ta lo a ang khawp mai. A tel lo chuan kan thianho hi kan keh darh mai angem ka hre lo. Min huikhawmtu ber a ni si a. A chhuk dawn zanah chuan thlahna hun kan hmang a. Kan inngai dawn lutuk tih chu kan ngui nghiai danah a lang vek mai. Kei phei chuan ka ngai fâl hle ang. Mi bengchheng leh tawng tam ber kha a awm tawh dawn lo miau a.