KAN VENG NULA "RUATI"

Kan vengah hian nula pakhat a awm a,a hming chu RUATI a ni. Amah chu ngo lampang, sam sei, heh sen vâm ham mai, rualpawl tawka hleitling, mi vantlang chunglam chhungkua ațanga seilian, Pathian țih mi, nula te entawn leh tlangval ho star rawn, pa valai ho mit fukna ber a ni. Ruihtheih thil laka fihlim a nih mai bakah nula sawisep kai lo, Sunday School zirtirtu ngat a ni bawk. Motor pawh pali lai an nei. Dinhmun chu sawi loh, hmel leh vun rawng hrim hrim pawha ka phu loh leh ka cho rual loh a ni. He nu nena kan chanchin hi a ni ka hrilh dawn che u.

Kum lamah chuan keini ai chuan a naupang fé a, he khawvelah hian, he khawvel êng hi a rawn hmuh ve hma thangkhatlian zet lo tâlpawl tawh ka ni a, a naupanlai pawh chiang taka ka hriat a ni, dik taka sawi phei chuan ngaihzâwn enin min en miahlo mah sela vui thei dinhmuna ding ka ni tlat lo. Kan kum inthlauhzia ngaihtuah chuan. Mahse, rei ve tawh hlein, an naupanlai ațang daiha lo awm tawh pawh ni mah ila, la hmuhzawh ve miau loh avanga a hminga tlangval nihna TITLE, uanthuanpui chi hauh loh leh chapopui tlak eih loh ka la kawl ve miau avang erawh chuan midang ta ni turah ka dah phal bik teuhlo mai RUATI chu.

KȚP kan over dawn tawh lama rawn inhmang ve țan chauh ni mahse, a tel lova inkhawm leh hla zir te kha a rei ka tihtheihzia kha, a hriat miah lohvin a tel ve loh avangin ka lo ning ve em em țhin a. Vâl senior kan lansarhna YMA lamah, kohhran ang êma a inhman loh avangin, a kum rualpui tho, inhmang lo ve tho te enkhûmin, a lakah thikthu ka pe chhe bik țhin. A tel ve lohna leh a awm ve lohna chu nuam ka tih tlat țhin loh avangin. Chu chu a ni RUATI laka ka rilru puthmang chu.

ZANLAITHLIFIM.IN

Facebook-ah min la rawn add miah lova, kei lahin ka add ngam bik si loh avangin kan in-friend lova, ama'rawhchu a profile ka luhchhuah zin em avang erawh chuan ka profile pawh a tlawh ve zeuh zeuh ka'n ring ringawt a. Chumi anih avang chuan Status leh photo caption-ah te, amah ka tihchhan a ni tih a inhriat theihna turin ka duhzia leh amaha ka luanliamna,thu thlum, ril leh ùn tak tak ka post kûr ngei nguai a. Mahse, vanduaithlak nge vanneihthlak kan ti zawk dawn.... han inhmuh nikhuate hian, ka thu leh hla, amah avang liau liauva kei pawhina ril ka lo intih ve țhinna te leh a lairil a chhun ve ngeia ka rin te khan amahah awmzia a neih leh ngaihbel tur thil erawh ka hmu ngai hauh thung lo. A chang leh amahah nghawng engemaw tak a neih ve ringin ka'n block a, ka'n unblock leh vei thul. Chuti chung pawh chuan, "Ngatinge min block kher a?" tih message takngial pawh a lak ațangin ka dawng ngai hek lo. Amah avang hian alawm Spam link, 'Last profile visitor' te kha ka lo click ni. Mualphona khua a sei thlawn e.

Whatsapp-ah erawh kan veng Group pakhata kan awmdun avangin a number ka nei hlauh. Mahse chutah pawh chuan kan inbe ngai chuang hek lo. Ka number a save ve kher ringlo mah ila a number, HMELȚHATEI ti-a ka save ngei mai khan, group-a kan awmdun miau avang erawh chuan ka last seen ni lovin, ka DP tal chu a en ve țhin ngei ang tih erawh ka ringhlel phal hauh lo. Chumi a en ruala ka status, mi mawl ber pawhina inngaihbel theih tur khawpa chiang, thu khuh mawi em em maia amah ka tihchhan thu ngei kha a chhiar ve țhin ngei awm si a. Ka ngaihtuah ringawt pawh hian remhria leh fing hi ka va inti țhin tak em !!! Inbe lemlo mah ila group-a ka thil post leh copy paste te, a hmu ve ngei a, a chhiar ve ngei a ni tih ka hriat te khân ka va hlim țhin em... chumai a ni lo, similey leh thumbs up sign a rawn tihpir ve vã changte khan nuam ka va ti țhin em. Delete pawh delete phal lovin ka ennawn tlut tlut țhin a nih kha. Ka online veleh hian a last seen en turin amah ka'n hmetchhuak hmasa ber phawt zel a, mahse, a last seen a off daih zel avangin a sulhnu hmuhtur erawh ka nei ngailo. 

Kan Online rual a ni tih ka hriat ringawt te khan, Țhuami te hovin, "I dam maw, i va ngaihawm ve?" tih min rawn thawn ai pawh khan a letin ka hlim zawk țhin zu nia. A ni lah taka, Țhuami te, Kungi te ve êm hi zawng, an dp an change ve țum te hian, an hawi pir leh vû anga, an nui lip leh duai dawn a ni tih ka hriatsa avangin en pawh ka en peih ngailo. An status te lah hrethiam ûk lovin English-in an han dah ve ngei a, fb-a mi, mi photo caption ruk ching ropui si, an lanțhat ve deuhna lah a to hun an nghak emaw tihturin hneawm khawpin a thla-a-thla te an han hmang ve leh lawi si sateh a...Photo editor an hmang chung pawha heti an nih teh vù chuan a nungchung phei chuan an laktlak loh dan tur chu ngaihtuah pawh ka ngaihtuah peih lo. RUATI erawh hi zawngin,"a la lum thar thar" hi a tithei deuh reng mai a, en hi a khamawm hlawl țhin loh alawm...

Țumkhat erawh a dp thar en ka tumna lamah call button zawk ka hmet palh hlauh mai a, mahse ka phone-in whatsapp call a full support loh chu thuhran, 2G-ah chuan a clear lo hlauh kha ka vanneihna a ni. "Ka tihpalh lutuk aw, min ngaidam hram dawn nia," tiin tihchhan nei lutukin status ka'n change nghal kha, hmu ve tak ang maw, lo hmu ve ta se amah ka tihchhan tih a hrethiam ve angem, lo hrethiam ta se engtinnge min ngaih ang le...???

Chutia amah check reng ta chu, HMELȚHATEI tihah chuan kan click leh zeuh a, a dp a change leh tawh a ni ngei ang, ka phone-in a load tlat. Minute thum vel a virkual pap pap hnu chuan RUATI ngei mai chu khuma muin, dam loh hmel tak hian blanket a lo sin hlûn a, ka ngaihbel vang nge ni, peihlo chung chung leh min thlahlel em em hmel pu siin min rawn melh ni tlat hian ka hria a, ngaihtuahna a kal khawlo mai dawna ka hriat avangin ka enrei phal lo. Ka tan chuan Sualna neilo Angel ang maia thianghlim a ni si a.Ka phone chu ka zut tawlhthla a, a status ka hmu chiah chu...Karei !!! Ka mitvai em ni, nge, ka suangtuahna kalsualin kan DUHLIAN ȚAWNG hi min chhiar sualtir zawk ??? "U Rinsang, ka ngai lutuk che, ka damlo bawk sia," tih hi a lo inziak a.Aw...Van mite u, min pui lul teh u. A thlalak nen ka'n entawn a, ka mitvai leh hmuhsual lah a ni der si lo. Ka va han hlim em...Ka fb profile te, whatsapp last seen, dp leh status zawng zawngte min lo check-sak ve țhin a ni tih ka ringnghet nghal hmiah.

A dp leh status chu ka thil thiam thar, nizana FACEBOOK ACCOUNT HELPLINE-a Ruatin a lo hmu ve ang tih hlau ngawih ngawiha zak ru taka ka zawh(min hmusitin min nuih ang tih ka hlau a, tun thleng thlenga hetiang pawh ka la thiamlo hi) Screenshot hmang ngei mai chuan ka'n shot ri ta khap a. Ngaihțha tak leh lawm avanga thinphu inthumrawn tlut tlut chung chuan Gallery-a photo thar chu mit siai vang vang chung chuan ka'n ennawn sak a. Nakinah, țhianpa Hlira te ho, tun ang Smart Phone Age tawh pawha Nokia 1600 la hmang ho ka'n entir anga, awilo theilo khawpa hriatthiamna tlachham lutuk leh ngaisang taka min en dauh dauh tur hmel chu nui suk chung chuan ka'n mitthla paw riai a.

A tuk zanah chuan ka huaisenna zawng zawng sawmkhawmin, a tana ka luanliamna zawng zawng hlim taka a chhiarlai hmel leh, ka photo screenshot mitthla chungin, "Hello, enge i tih a, i damlo tih ka lo hria a, enge i an tawh a?" tih ka va thawn a. Ka vanneih a kaltluang nge ni, ka thawn zawh rual chiah chuan a lo online ve nghal a. Ka message send ka en a, double tick mark a awm tawh, mahse a la pâwl tlat lo, minute sawm a online hnu pawhin a la read tlat lo. Ummmm...ka hrethiam e, a phone screen rotation a on a, a phek zawngin Notification bar ațangin a chhiar tih ka hre mai. Beiseina chhimbâl mai ka beisei a nih ringin hlauhthawnna leh zahna, zâmna chhumpui inlet but butin min rawn tuam a, ka tiril a khûr a, lawm vang ni lovin inchhirna tuifawn so ri bulh bulh ang maiin ka thinphu chu mu leh mal nei lovin a ri dup dup a. Mahse a dp leh status te ka mitthlaah a rawn lang leh a, chu chuan phurna thar leh ruahmanna thar min rawn pe a. Zahfâkah lu em a chhum lovang chu tiin,"I status ami hi ni ila ka va ti ," tih caption-a hmang chuan a thlalak ka sreenshot chu ka va thawn leh a. Hei pawh a dawng leh ta ngei mai, "Hmelțhatei is typing..." A hnu lawkah chuan,"Sorry, group-ah ka lut laklawh lutuk a." Min rawn reply ve hrim hrim vang ringawt pawh chuan ka hlim viau nain, a thupha rawn chawina erawh 'thudik a ni angem' tih erawh ka chiang ngam tlat lo. Thlalak ka thawn pawh a pawl ta vá mai, mahse a hnu lawkah HMELȚHATEI tih hnuaia Online tih inchhu kalh chu a reh ta daih a, a out ta a ni tih chu lunghnûr tak chunga ka pawm a ngai ta si.

Darkar chanve vel a liam leh hnu chuan ka message tone chu a rawn ri ta kauh kauh a. Phûr lutuk chuan whatsapp ka hawng nghal, amah ngei a lo nia...

"Ni maithei asin..." tih tê mai hi a lo nia.

"Eng maw...???"

"Status ami hi..."

"Awi...!!!"

"Enge...???"

"Ka phu lo..."

"A enga chu maw i phu loh...???"

"Status-a hming i ziah khi..."

"Engvangin maw i phu loh a..."

"Keimah ni turin ka phu lo ka tihna a nih chu..."

"Hmnnn...keimah nge i phu loh status-a hming ka ziah khi "

"A pahnihin ka phulo ve ve...dddd"

"Min va hmusit..."

"Ka va bo, engvang chuan maw..."

"Min phu lotu ka vawikhat hriatna, nih chuan kei pawhin ka phu biklo che tihna a nih chu..."

Ka phûr lutuk tawh, ka nu inkhawm bangin,"E he...inchhung chu a va khu nasa ve, enge i chhuan hi. Ka kal dawna ka Maipawl bai chhuan kha i lo la off lo a ni maw. Phone ringawt hi in atchilh a, hei a ût vek tawh alawm, bel mawng pawh i chhuang chhe vek tawh ang ka ti," a rawn ti lut bawrh bawrh a. Ni e, ka theihnghilh chiang lutuk, RUATI vang vek. Pawilo, Maipawl te mai mai, huanah mi â lu tiat tiat a la inkhai paw var veu vo alawm.

"Dik tak sawi chuan maw Ruati, ka ngaihzawnna che hi a rei lutuk tawh, ka phu loh em che avangin engmah ka tilang ngamlo țhin a..."

"Tak tak maw, ka va lawm. Lalmami nen khan in inngaizawng reng amaw ka tia..."

"Teuhlo mai, mi chu a try nasa lutuk, mahse ka type a ni lo...(hihi...dawt vek, a nihna takah chuan aman min duhlo zawk a ni reng sia, mahse inlak Hero a ngai tlat rih)"

"Nia, nangni chu in hmelțha a, luck pawh in luck alawm. Kan vengah phei chuan a duh duh a thing thei an tih che kha..."

"Hmnnn...chimawm lo mai teh aw, min duhtu chu tam viau mahse duh pakhat chiah ka nei..."

"Min lo hrilh ve plizzz..."

"Tuna ka biak mek hi..."

"Dawt i sawi lo tak tak em...???"

"Dawt ka sawi ve ngai lo..."

"Ka lawm e, keipaw'n ka duh che..."

"Ka va lawm, ka mumang chu a nilo tiraw..."

"Han insik chhin la."

Ka'n insik chhin a, ka phu zawk mai, ka mumang zawng a ni love.

"Ok...Ka mumang chu a ni love, naktuk tlaiah inhmuh tum ila..."

"Nia, ka mut a chhuak tawh, ka mu dawn. Mangțha aw..."

"A la hma alawm, awle, mangțha, tui deuhin i mu dawn nia..."

Ka hlim lutuk chu ka muhil mai thei tlat lo. RUATI nena kan inbiakna te chu a bul ațangin ka chhiarnawn ka chhiarnawn a, tum miah lovin ka by-heart ta vek nghe nghe. Fb leh whatsapp-a a thlalak ka download ho te chu ka thlir vawng vawng a. Ni e, ka hlim a ni. Hun kha leh chen duhthusam rama ka lo chenpui tawh, țawngkhawlo ni lo se, Angel te dai ngam loh ram thleng thlenga suangtuahna lipuia ka lo vir luhpui tawh, kan veng nula chhuanvawr nen Chatuan daih thu nung kan sawi miau alawm. Khuantevîk arkhuang ka chhiar a, RUATI ngaihtuah chungin hun a kal duak duak a, Varțian arkhuangin a zui a. 

Vâl senior erawhin RUATI vangin chhingmit chhîng si lovin laikhum a zal zankhua thung a. Leilung a rawn lang a, Chawngzawng zing tho inchhaih ri chil chel ina inchung rangva an thai rik rak rak karah chuan mutchhuakin min rawn zem chiai chiai a, suangtuahna mitthla hnutiangchhawna tawnmang rama RUATI tawng leh turin ka mit ka chhing ta riai riai a.

"Sorkar hnathawk lo tih takah zing dar kaw pelh tawh hnu-ah pawh in la hnar thlurh thlurh zel mai. Tho rawh, Vawkin eitur an nei lo," ti bawrh bawrh chungin ka nuin min rawn sawi nawk nawk a. Mut khamlo tak chung chuan ka'n meng duar duar a, Ni a lo tlangsang vû tawh a, mutthilh leh tuma ka inlehthawk rual chuan ka rilruah RUATI a lo lang zawk a. Ka phone ka en nghal. Dar 09:35 a lo ri tawh a, RUATI message erawh engmah a awmlo thung.'A tho har ve deuh anga College a kal nghal aniang' tiin ka inhnem a, a nihna takah chuan ka lungawi chiah bik lo. Mahse vawiin tlaiah kan inhmu dawn tho alawm.

Tlai dar 04:00 a ri a, fai takin ka inbual a,ka best dress nen RUATI College bang lo hmuak tur chuan dawr lam ka pan a. Rei pawh ka țhut hmain ka HMELȚHATEI ngei chu a pa Car ațang chuan a rawn chhuak paw ta pheu mai. A va hmelțha lehzual em !! Min rawn melh zawk a, lâi takin hnuailam a bih leh nghal. Tleirawl chhuak țantir chauh a la nia, chutia a lâi viau pawh chu ka dem lemlo. A bula nepnawi zawrhna dawrah chuan a lut a, kan pahniha nizan lam chanchin sawi paha thil eitur a lei dawn a nih ka ring. A duh ringin a eilai ka hmuh ziah, rilțam tak chung pawha thingpui in na'na ka hman phal loh, ka pawisa neih zawng zawnga ka leisak Popcorn ngei mai chu a rawn eichhuak țãlh țãlh a, ka leisa pek tuma ka lo phawrhchhuah, thuhruk leh ka tum lai takin min rawn hmu hman si, ka che lâi lutuk hmel tur leh a nuihza insum lutuk hmel mawlh kha. Ka zahzelah, tlai dar 04:30 ah, "In va bang hma ve," ka'n tih laih rût kha. 

A ni lah lai ve bawk, engkhaw sawi set set lovin,"U Rinsang, nizan khan à u Mama'n ka phone a lo khawih a, message pawh kha ama lo thawn vek a nih kha. Chu lovah, U Rinsangi ka tihte kha chu ka cousin ania, kan tet laiin min duat thei lutuk a, i hming ka sawina a ni pît lo" a la ti ta deuh duah zui a. Awiiiiii, tum dan loh lutuk leh beisei loh lutuka beiseina sâng tak kan neihte chunga kan beisei ang leh kan rin loh anga thil a kal leh si hian ZAHTHLAK tih țawngkam pawhina a hrilhfiah zawh loh khawpin ka ZAK a ni. Khuarkhurum mawng nei lova tlak pil vawng vawng ka va châk tak em.... Ka mit sulh a, ka bula thil awmte chu an vir muai muai a, chutihlai kara hrilhhai taka ka nu mengphawk hrú chu chianglo takin ka va hmu phe ruai a.

A hnu-a ka hriat leh danin RUATI u Mama leh Lalmami te chu an lo inngaizawng a, min lo bluff lêk chu lo niin. Han hnek hrep dawn ila kan mualphona khua a sei mai mai dawn si a, inhmuh changa rum taka melh bak tihtheih ka nei si lo. Kan inhmuh apiangin ka ngei tawk lek turin min la nuih ziah lehnghal. Engnge maw a chhan ni dawn ni.... Khami tlai ațang khan RUATI online lai ka tawng fuh thei ta lova, a dp leh a status pawh tun thlengin ka la hmu leh ta lo. Fb-ah lah ka zawng hmu zo tawh bawk si lo. Mahse, midang phone ațang erawh chuan kan inhmuh hnuhnun ber hma chiah-a ka phone-a ka hmuh theih ang tho khan a la hmuh theih.... A pawi love, Țhianpa Hlirluliana te bul tala insawitheihna tur thil pakhat ka la nei tho alawm le.... Hahaha