Tlangval kum 27 mi ka ni a, ka nu nen hian khawpui daifemah mi in luahin kan khawsa a. Kum 7 mi ka nih laiin ka pain min boralsan tawh a. Ka nu chuan a theih ang angin min enkawl a, ka zirna a ngaipawimawh hle bawk. Hostel-ah kum tluanin ka awm ṭhin a, kan in lamah hian ka haw ngai meuh lo; ka nu hian a khât tawk hian mi rawn tlawh fo thung . In lamah ṭhian kawm tur mumal ka neih chuan loh avangin hostel hi ka in ang maiin ka ngai rum rum ṭhin a. Hrehawm tih chang awm ve bawk mah se, ka khawsak tamna hmun a nih miau avangin leh, ka nu hian chhuah zen zen a phal loh avangin duh thlan tur dang ka nei chuang lo bawk a. Ka khawvel zim te neih ve chhun chu, chu in zimteah chuan ka hmang ral ta ṭhin a ni.
College pawh hi Shillong lamah kalin hostel-ah bawk ka awm leh char char a. Ṭhian ka kawm tam lo va, ka zirnaah chuan theih ang tawk tawkin ka insawrbing ve ṭhin a. Ka nu min duh dan leh min fuihna te chu ka thinlungah a thar reng ṭhin a. Ka neih chhun, ka khawvel leh ka chhungkua ve chu ka nu hi a ni bawk a. A thu hi hnial ka tum ngai lo va. Ka zah a, duh thlan tur dang nei lo leh hre chuang lo na na na chu, ka nu thu ang zel chuan awm ka tum tawp mai ṭhin a ni.
Shillong hmuna ka college kal tawp ni ber tur chu huphurh angreng tak, phur ru tak chung siin ka kal a. Compound ka thlen hma deuh chuan restaurant pakhatah chuan ka chawl zawk a. Ka ṭhut fel hnu lawkah chuan Mizo hmeichhe pahnih hi an rawn lut ve a. “Ṭhianpa, kan rawn zawm ve thei che ang em?” an rawn ti a. Kei chuan, “Umm, thei lutuk e a, lo ṭhu rawh u. Order ka lo siam hman chiah asin, ka order-sak dawn che u nge...” ka tih mek laiin pakhat zawk chuan, “I ei ang kha kan lo ei ve ang. Min lo chah kep mai,” tiin, lai deuh tak, inthiam loh hmel deuh hian a rawn ti a. A hmel aṭang chuan a zak tak tak tih a hriat a, a hmai a sen ṭawn ṭawn miau a.
Kan ei duh zawng kan order rawn thlen hma chuan kan lo titi pah mai mai a. Kan hming leh kan awmna hmun te kan inzawt a.
“Zonunsangi, Sangsang tiin min ko mai ṭhin a. Aizawl Tlangnuamah kan awm a. Hei ka ṭhiannu hi Lalrinpuii, Puipuii a nia, Champhai lama awm a ni ve thung a,” tiin Sangsangi chuan a han sawi siam siam a. “Chuan, nang engtin nge kan koh dawn che?” a ti zawm zat a.
Engtia min koh nge in duh ang aw!” tiin Sangsangi chu ka en a. Puipuii chu ka va mit sir zeuh pah a. An nui hak hak a.
“Sawi mai mai teh! I sawi duh loh chuan kan phuah chawp thiam tho a nia,” an ti a, an nui leh hak hak a.
“Tak tak a na, ka hming chu Zonunmawia a ni a, in duh dan danin min ko mai r’u. Kei chuan hming puma koh hi ka duh ber a,” ka ti a.
An rawn hawi rual ṭhawt a. Kei zawk chu ka lo lai lek lek a!
Puipuii chuan, “Engati nge hming pum kher chu?” a ti a.
“A, eng ni lo ve. Ka sawi duah chuan inti eng emaw nih ka hlawh leh mai mai dawn sia,”
“I va,n sual tak! Sawi mai mai teh,” an ti rual ṭhawt a.
In inthurual phian bawk sia!” ka ti a, kan nui ho leh hak hak a.
Thil hriat chhuah thut nei ang hian, "E! Tak a, ka hrilh ang che u; mahse, eng teh vak a ni chuang lo. In duh dan danin min ngai mai dawn nia. Naktip maiah khian ka haw daih tawh dawn tho va, min hre zui tawh kher chuang lo ang,” ka ti a.
“I haw dawn maw?” an rawn tirual leh ṭhawt a.
“Ummm, haw dawn e. Kei chu tih tur ka nei tawh lo alawm. Vawiin hi ka kal tawpna ber tur ni a ni tawh a. Hming pum khera koh ka duh chhan chu, ka pian hlim khan ka lai ah hming turin ka pu (ka pa pa)-in min sak-sak a. Zo nun ze mawi tak kha chhawm nung zel turin leh kan Mizo nun mawi tak tak te kan hriat thar fo theih nan Zonunmawia ni rawh se min ti a. Mi min koh dan tur leh mi min hriat ka nih ve theihna tura pawimawh tak pakhat a nih ve avangin hming pum ngeia koh hi ka duh a ni,” ka ti a. An lu an bu nghut nghut a, eng mah an sawi zui lem lo va.
Ka thil chah chu a rawn thleng a, kan ei nghal mawlh mawlh a. Kei hi thil ei chak thiam lo chi ka nih avangin ka bula ṭhute pahnih chuan min ei zawh khalh a. Thil ei kar lakah chuan kan titi pah zel a.
“Tum ṭum chu kan vawi khat inhmuhna a ni bawk a, in felin kawm in nuam bawk a, ka lo treat ang che u. A lehpek a awm ngai a nih chuan min treat ve thung ang,” ka ti a. Ṭan an tum deuh na a, ka ti tak tak a ni tih an hre thiam ni ngei tur a ni, an ṭang ngam ta bik lo va.
Thlasik boruak a rawn nam ṭan a, boruak nawm hun lai tak a nih avangin zing ni chhuak pawh a mawi ngang mai!
Aizawl pan tur sumo chhungah chuan ka ṭhu ran a. Tarmit (Sunglass) ka vuah a, tlar hnung ber kilah chuan rilru hlim sawi hleih theih loh nen chuan ka nu, min hmangaih em em tu leh ka hmangaih awmna lam pan chuan ka kal dawn a ni a. Kum khat deuh thaw inhmu lova awm tawh kan nih avangin ka phur hle a ni. Ka chuanpui turte pawh chu an rawn lut nak nak a. Vai panga leh Mizo pali kan chuang a. Vai hla hlui deuh deuh min ngaihthlakpui a, lunglen a hnem fahran lo khawp mai. ‘Kawng tluana ngaithlak tur chuan a huphurhawm khawp ma’ tiin, rilruin ka phun neuh neuh a. Mahse, mahni khaw lam pan ka ni bawk a, ka rilru erawh a phur veng veng tho.
Muthluk nen fawmin kan tum ram Aizawl chu kan thleng a, ka nu chuan Zarkawtah min lo hmuak a. Taxi kan la a, kan veng lam chu kan pan nghal a. Kan inhmuh lohna a rei tawh bawk a, ka nun nen chuan kan inkuah vawng vawng a. Min chhuan thu sawi mawlh mawlh a. Chutia dam taka kan inhmuh leh avanga chuan a biangah lawmna mittui a luang ngiai ngiai a. Kei pawhin insum harsa ka ti khawp mai. “Ka pa khan min boralsan hma lo sela chuan pianpui unaute ti-a sawi tur ka nei ve ang a, ‘Ka Pa’ ti-a koh tur ka nei ve ngei awm si a...” tiin ka suangtuahna khawvel chu her danglamsak ka ni a. Ka mittui rawn luang chhuak tur tih tawp tuma ka mit ka khap sak sak chuan awmzia a nei chuang lo. Mittui parawl ṭeuh chung chuan ka nu nen chuan kan inkuah veng veng a. Ka neih chhun a ni a, a tan pawh a neih chhun ka ni. Kan khawvel chu zim hle mah se, tu dang kan ngai bik lo.
Ka nu chuan, “Chhun lamah hna ka thawk hah deuh sia, ka mutsan mai ang che aw,” a ti a.
“Aw le, ka nu, tui deuh khan muhil rawh aw. Kei pawh lehkhabu ka la chhiar lawk ang a. Nakin deuhah ka mu ve ang,” ka ti a. A room lamah chuan min luhsan ta a.
Zan dar 10:30 a ni a, ‘Aizawlah Aizawler’ tih lehkhabu Lalhruaitluanga Chawngte ziah chu ngaihnawm ti takin ka chhiar melh melh a. Chumi lai tak chuan ka khum piah deuha ka phone charge mek chu a rawn ri ral ral a. ‘Tu nge maw ni le? Tun ang zan rei tawh hnuah lehnghal’ ti nauh nauh pah chuan phone chu ka pick up a.
“Hello”
“Hello. Zonunmawia i ni em?”
A aw chu hmeichhe aw a ni tlat. Tu nge maw ni dawn le? Tun ang hunah hian phone call ka dawng khat hle a. Hostel lamah hun ka hman tam zawk vang hian ngaihzawng tia han sawi tur tak ngial pawh tun thleng hian ka la nei lo.
“Aw, ni e. Tu nge aw, Ka va’n hre mai lo che ve?”
“Umm, min hre lo maithei; mahse, kei chuan ka la hria che.”
“Eng thil nge ni ta? Tu nge i nih ka hre thei ang em?”
“Min hriat duh te chuan hre thei teh reng e a! In thleng tluang maw?”
“Imm, thleng tluang e.”
“A va’n lawmawm ve. Puipuii ka nia. Hman nia restaurant-a mi kha.”
“Eeee, a ni maw. I va’n fel ve. Engtin nge ka number i neih theih a?”
“Mamawh te chuan neih dan a awm zel mai alawm. Hehe...”
“In felin kawm in nuam ngawt mai. Nangni kha lamah in la awm rih dawn em ni?”
“Awm rih lo ang. Ti ila, kar leh Monday-ah hian kei chu lo chhoh ka tum a. Ka chhungte’n Aizawl lamah dawr an siam thar ve a. ‘Kan indaih lo em mai, lo chho mai rawh’ an ti a. Chu bakah kei pawhin ka duh zawk a.”
“A nih chu, a va’n ṭha ve. Rawn dawr ve ṭhin tur che a nih chu a. I rawn haw hunah chuan vawi khat tal te chu kan la inhmu leh ang chu, ti raw?”
“Vawi khat chauh maw i duh a?”
“Haha. Ni lo ve, vawi tam tak hmuh che pawh a châkawm alawm,” ka ti a.
“Hmmmm, ka awih tawh chiah lo e! Vawi khat tal i tih zawh chiah kha aw,” a ti a, a nui hak hak a.
“Chutiang chu ka sawi tum pawh a ni hlei nem. Vawi tam tak hmu châk che mah ila, i duh ve si loh te chuan a nuam dawn lo asin. Chuvangin, khati khan ka rawn sawi ta mai a nih kha.”
“Awi! Ṭawngkam i intithiam vel lutuk aw! A nih chuan ka ngaidam mai ang che. Hehe. Ka rawn haw hunah chuan i lo len loh vaih chuan aw! Ka vui viau ang,” nuih har har pah chuan a ti a. Mahse, a ṭawngkam aṭang chuan a fiamthu chiah lo hian ka hre ta tlat pek a.
Kei pawh chu ka zam ru angreng ve viua mai. Eng emaw boruak chuan mi rawn tuam deuh chiai chiai hian ka hria a. Sawi fiah thiam loh leh sawi fiah ngaihna awm lo hian, ka chhungrila ka thisen zungzam te chuan engtin emaw tak hian min fan delh delh a. Ka hmulthi a ding sung sung a, ka hlauh vang erawh a ni hauh lo. Ka thinglung khawhar tak chuan a la tawn ngaih loh a tawn vang a nih ngei ang; mahse, chutiang lam thil eng mah ka ngaihtuah thiam si lo. Ka taksa chu zàng vah hian ka hria a, ka lungphu chu a phu dup dup a, chhungrilah chuan ka hlim ru veng veng a; mahse, eng thu vak mah ka la sawi der si lo! A ṭawngkam chuan ka thla a timuang a, ka nun a tihahdam a ni tih chu ka ngaihtuah thim lo na a, engtin tin emaw chuan ka hre thei tlat thung.
Ka suangtuahna khawvelah chuan ka lo lut hman pek nge, keia ṭawngkam thiam lo lutuk chuan sawi tur ka van zawk pawh ka hre thiam lo, ka ngawi deuh vang vang a. Puipuii bawk chuan inthiam loh hmel tak chuan, “Hehe, ka tihpalh aw, hmelhriat fe tawh che ang maiin ka lo ṭawng leh luam ṭhin a. I duh loh zawng ka sawi palh a nih chuan ka tihpalh lutuk aw, u Zonunmawi. Hming pum khera inkoh kha i duh bawk sia,” a rawn ti leh a, a nui hak hak a.
Chu a ṭawngkam rawn hman avang chuan min tihrilhhai leh zual a. Ka sawi tur zawng zawng pawh chu a bo leh duak mai. Mahse, ngawih reng zawng thil tih chi a ni lo tiin sawi tur chu ka ngaihtuah a.
“Puipui chutiangin ti mah ta che. Ka rawn leng dawn alawm. Min ning zawk hial maithei asin. Ka rawn kal ngun leh lutuk palh ang tih ka hlau sia, in-control dan tur ka ngaihtuah lawk alawm,” ka ti a. Kan nui dun ker ker a.
“Ka rawn haw chak tawh e! He lai hi chu ka ning tawh; chu bakah, ka thla a muang thei lo. Ka la awm ṭhang lo bawk sia.”
“Kei chu ngaiah ka neih a, hrehawm han tih vak ngaihna pawh ka hre hlei nem. Kum li dawn chu ka awm a, ka thei viau mai,” ka ti a.
“Hmmmmphh! Nang te chu a hiptu i nei ṭha a ni ang chu! Haw pawh i haw ngai mang lo an ti a nia aw. Vawiinah pawh i ṭhian kawm ṭhin pakhat nen kan inhmu a, kan rel vak che a nia aw,” a ti a, a nui leh hak hak a. Mi hlim thei tak zawng a ni ngei ang.
“E khai aw! Engati nge min lo rel vak ni! Chutiang hiptu an awm pawh ka hre lo ve! Ka zirlai kha min hiptu chu a ni mai,” ka ti a.
“Dawt sawi suh aw, ka hre vek a nia. I chanchin ka zawt ṭeuh alawm,” a ti a. A nui kar kar a. Ka ṭawng ve leh hma chuan, “Tak tak a, ka rawn haw hunah hun i neih chuan rawn leng ngei ngei rawh aw. Inbual a, mut mai ka duh e,” a rawn tih zawm zat a.
“Teh reng mai! Kan dam ang a, ka rawng leng ngei dawn nia,” ka ti a, kan inmangṭha ta a.
Sumo-ah khan ka lo muhil tam deuh nge ni, han muthilh ka tum ngial pawhin ka muhil thei ṭhak lo. Mu chung chuan thil eng eng emaw hi ka ngaituah neuh neuh a. Puipuii aw tham ṭiak, zàng vah leh ngaihnobei zet chu bengah chuan a ri nawn tlut tlut mai. Vawi khat chuah kan la inhmu na a, amahah chuan mipa te duhthusam chu a kim ni hian ka hre ber mai. Hmai bial lam deuh, mitmeng lian lam, a sam hmawrin a nak nêm vel zuk hawlh pha, hmui chhah deuh tap mai, heh sen no chêk, khabe zum lang lutuk si lo... a hmaifang invuah dan chu sawisel bo. A âwmbawr pawh pahmei chhung tlai zet tur, chhing kawh lah mai, thau lutuk lo, 5.6 ft vel zet tur hi a ni reuh a. Fiamthu duh ve tak leh nuih peih ve tak niin ka hria. Kan inhmuh vawi khatna aṭang khan a mizia tur àwm tlangpui chu ka hre nual hman chuan ka hria.
Puipuii rawn chhoh hun tur mawlh chu ka nghakhlel tawh a. Kan inhmuh huna ka ṭawng dan tur vel te, engtin nge ka inthuam ang tih te ka ngaihtuah neuh neuh a. Ka rilru chu a zàng vah hian ka hre. Chhungrilah min mawlhtu awm ang mai hian ka hria a. Ka ngaihtuah nasat poh leh ka zàm a. Mahni chuahva mu e ti lo chuan ka lai vel titih hial!
Ka suangtuahna chu ka lo kawmtui deuh a ni ang, mut chhuak chuan mi rawn tuam chiai chiai a. Ka muthilh dawn lai vel tak chuan ka nu phone ri chuan min tiharh leh zawk a. Sana ka en chuan dar 12 a lo ri der tawh a. Phone chu a pick up a, eng nge a sawi phei chu ka hre lo na a, rei lo te hnuah chuan a off a, a muhil zui leh nghal ni ngei tur a ni. Ka tân theih tawp a chhuah a, chhun lamah mi inah te hna thawkin a theih ang angin a inhlawh a. Ka tan eng mah tih hreh a nei ngai lo. Ka dinhmun ka en a, zahthlak tih chang tam ṭhin mah se, kan duh thlan a nih bik miau loh avangin he dinhmun hi lungawi taka ka nunpui a ngai tlat si a ni.
Ka muhil thei lo chu ka inlet ka inlet mai a. Phone-ah hla play ila muthilh tum teh ang tiin ka phone chu ka ban a. Hla play tur ka zawn kual lai chuan number lawng aṭang hian message a rawn thleng nawlh a. Ka open nghal var a, a dp pawh a lang lo.
P: Hi, mu tawh em ni, ka muhil thei lo va.
K: Muhil lo ve.
P: I va’n meng rei ve, engati nge a?
K: Ka mut a chhuak vak lo va, ka harh laklawh alawm maw le. Tu nge aw? Ka va’n hre mai lo che ve.
P: Hmmmpphhh! Ka tih sual a nih dawn chu. Muttui.
Thil ka hre chhuak zawk, Puipuii bawk kha a nih ka ring leh si. Call log ka en nghal, a lo ni chiah. A number ka lo save theihnghilh chu niin! WhatsApp-ah chuan ka lut leh nghal a.
K: Puipui, i thimrim em ni? Ka fiam che nih kha.
A rawn seen nghal. Min replay lo. Ka nghak vang vang. Eng mah a rawn thleng zui lo.
K: Puipui, ka tih palh aw. Fiam i nuam ṭhin em a, ka lo fiam na deuh che a, min hre thiam dawn nia. A nih muttui mai aw.
P: I sual lutuk
K: Nia, ka tih palh
P: Biak tur i nei ṭha deuh a ni maw. I va’n meng rei.
K: Haha, teuh lo lutuk! Tu mah biak tur pawh ka hre ve lo.
P: Hmm, ka awih lo. Mipaho hi chu heti hian in tia, pali/panga vel chu biak in nei ziah tho.
K: Imm, nia, a dik maithei. Kei chu a rual pawl lo chi hi ka ni ve a. Tun thleng hian ngaihzawng takngial pawh ka la nei lo. Mahse, i mipa sawi ho zingah chuan lungawi takin ka lo tel ve mai ang e.
P: Hmmm, over thei sia! Tak tak a, ka uang mai mai nih kha, i fel tih ka hriat vangin alawm zah pawh dawn lova ka rawn biak che.
K: Ka va’n lawm ve. I ṭawngkam ṭha mai mai pawh ni mah se, ka hlim veng veng mai.
P: Chimawm viau ṭhin suh. Ka seh nawk mai ang che... hehe
K : Eng nge... Star ruk deuh te’n mi han biak ve duh hi chuan a nuam em alawm.
P: Tak a, bialnu chu i la nei lo tak tak em ni?
K: Min duh vetu awm hek lo.
P: Hmmm, an awm ang. I hnar zel zawk a ni lo maw?
K: Chu zawng, i ngaih dan ni mai teh se.
P: I thinrim em ni?
K: Rim lo ve. Sawi tur ka hre lo va.
P: Umm. A nih, engtin nge ka koh ang che, hming puma in koh tawp hi chu ka lai deuh tlat a, ka ko ngam lo che a.
K: Ka chhungte hi chuan Nuna te min tia, Zonun te min tia, i duh dan dan khan a ni mai.
P: U Zonun ka ti mai ang che aw...
K: Imm le, I fel hle mai.
P: Hawh, kan mu tawh mai dawn em ni? Ka mit a thip deuh tawh a. Pawi em?
K : Pawi lo ve. ‘Nih mu mai ang aw. Tui deuh khan muhil la aw.
P: Aw le. Nang pawh tui deuhin i muhil dawn nia. Ka duh pa...
Ka seen-a ka replay tawh lem lo. Ka lukham bulah chuan ka phone chu ka dah a. Mut chhuak chuan mi rawn zem chiai chiai a. Tawnmang rama leng turin ka chhingmit kawngkhawr chu ka khar ta riai riai a.
Thawhṭanni chuan interview tura kohna ka dawn avangin Insurance Company office-ah chuan ka kal a. Ka rin aiin ka confi phian a. “Chanchin lo ngaichang la. Call thei list-ah hian pathum kan dah che u a. A vannei ber a ni mai,” tiin tlang takin min hrilh a. Ka beisei lem lo na a, a nuam veng veng tho mai.
Ka nu bulah pawh chuan ka hun hman dan vel chu ka hrilh a. ”Bawiha, Pathian thu thu a nia. Kan tâna hun ruat a rawn thlen chuan pumpelh theih a ni ngai lo. A chhe lam emaw a ṭha lam emaw pawh ni se, lungawi thiam hi kan zir zel dawn nia,” tiin min fuih nghalh mawlh mawlh a.
Ka nu bulah chuan, “Nu, zanin chu scooty ka hmang duh e. Vawiinah ka ṭhiante an rawn haw a. Inkawm khawm ang u an tia,” ka ti a.
“Fimkhur la. Chak lutukin tlan ṭhin lo la. Fimkhur a ngai a nia. Mahni kan fimkhur viau pawh hian a fimkhur lote zâr kan lo zo leh thei bawk si a. Zan thilah phei chuan fimkhur zual a ngai a nia,” a ti a.
Puipuii thlenna Chanmari West lam pan chuan ka inkhalh chhuak ve rawih a. Kan inbe pah zel a. Vawi thum vel ka bo zak zak hnu chuan kan inhmu thei hram. A ṭhian, unau pahnih, in luah-ah chuan a lo thleng. A nutei chhungte’n chhiat an tawh leh thut avangin Kolasib lamah an kal leh thut si a, a ṭhiante inah lo awm rih mai turin an ti hi a lo ni a. Kan inhmu chu kan hlim duh hle mai. Mahse, ka zam ve hle chuan ka hria. Ani pawh a lai deuh nge maw ni, a ṭawng bahlah nuai ve tho a. Kan inen a, kan nui dun leh tawp zel a.
Kawmthlang lam balcony chu thla hian a rawn chhun eng phut mai a. Chutah chuan kan ṭhu a, kan titi mai mai a. Fiamthu te thawhin kan nui dun hak hak reng a. A ṭhiannu Sangpuii chuan, “Puipui, ka mutsan dawn che a nia. Naktuk zing thawh hma ka ngai sia. Khum chhak lamah Rintei (Sangpuii nau) mutna bulah i mu mai dawn nia,” a ti zung zung a. Min rawn melh zeuh pah chuan, “Tu nge i ṭhianpa chu a hming ni a? Ṭhian i va’n nei chhe lo ve,” a tih zawm zat a.
Puipuii chuan, “Zonunmawia a nih hi, u Zonun tiin ka ko mai ṭhin,” a ti a.
Sangpuii chuan, “Zonun, ti khan nuam ti deuh khan lo inkawm rawh u. A khua har tawh ang, leng ve reng rawh. I duh chuan a riah theih tho a nia,” tiin a nui ar ar a. “Naktuk zingah tih tur ka nei si a, ka musan mai ang che u,” a tih zawm leh zat a.
“Aw le, tui deuh khan i muhil dawn nia,” ka ti a. Room lamah chuan min luhsan ta a.
Puipuii chuan, “Boruak a vawt tawh e! Ber thla a nih tawh hi chuan kei chu vawt tawrh hi ka thei lo ṭhin lutuk a, ka peih lo ngawt mai, thlasik a rei thei bawk sia,” a ti nuah nuah a. Mi rawn ngheng talh chuan a ṭhu a. “U Zonun, i rawn kal nal nal a, ka va’n lawm tak! Vawiin lam eng nge i interview-na te?” a ti a.
“Ka hre lo le, ṭawngkam ṭha chuan min thlah phawt mai chu a nia. Pathian thu thu a ni ang chu.”
A lu a bu nghat a, “I tlin chuan lawm ang aw?” tiin a nui ar ar a.
“Lutuk e a! Kan lawm dawn nia.”
“I hawna tur a peihawm tawh lo sia, riak ve daih la?” a ti a.
“Ka nu amah chauhin a awm siam, ka ngaihtuah alawm,” ka ti a.
“Phone la. Kan inhmuh ve chhunah ka ngai ve che sia,” a ti leh a.
“Mutna pawh a indaih ngawt lo ang,” ka’n ti leh hram a.
Mi rawn kuah chawt a, “U Zonun, zak thei lo min ti em?” a ti phawng a.
“Eng vang ngawt chuan maw?”
A kun deuh ngaih a, “I mizia ka en hian nang chuan eng tikah mah min hrilh ka ring si lo va, min huat phah a nih pawhin pawi tihna ka nei lo. Ihh maw, u Zonun, kan inhmuh hmasak ber aṭang khan ka star lutuk che a. I ṭhian kawm ṭhin tur àwma ka rin ho i chanchin ka zawt tawp a. I number pawh ka neih phah a. Eng tik lai pawh hian ka ngaihtuahnaah i awm reng ṭhin a. Ka hmangaih che,” a ti ta hnàp a. Ka mur sung sungin ka hre thei.
Ka lawm lutuk chu sawi mai tur pawh ka hre lo. Mittui parawl kiang chunga ka âwma bei thlawp chunga min kuahtu chu nghet takin ka kuah ve a. “Puipui, kei pawhin ka ngaina chein ka duh lutuk che. Mahse, ka dinhmun hi min hriatpui ni la chuan min hlat i duh hial zawk ang. Ka...”
Ka thu sawi lai chu rawn pawt chatin, “I pa’n a boralsan tawh che a. I nu nen chauh in awm a. I nu tan chuan a fapa rangkachak i ni a. I tan pawh i nu chu rangkachak tluk zeta hlu a ni tih ka hria asin,” a ti a.
“Puipui...” ka tih lai mek chuan a kutin ka hmui chu a rawn hup a. “Min hmangaih ve thu chauh ka hre duh, i chanchin tam tak chu ka hre tawh alawm,” a ti a. A mitmeng bial kalh mai chuan ka khap miah lovin ka mitah tak chuan min en kalh a.
“Puipui, kei paw’n ka hmangaih che. Ka duh lutuk che alawm,” ka ti ve ta ṭhuai a. Ka inrin hma chuan ka hmuiah chuan min rawn fawp thut a. Ka chhâng lêt lem lo. Ka tan chuan a vawi khatna a ni miau sia!
Puipuii chuan, ”Ka lawm e aw. Kei paw’n ka duh lutuk che a, chàn che ka duh lo a ni,” tiin ka hmuiah chuan a hmui no chhah tap, lum ther ther chuan mi rawn fawp leh chiah mai chu ka inring hman bik lo. Duhthawh zet chuan ka fawp let ve ta miah miah a. A lei chuan ka kâ te chu a rawn liak dawk dawk a. A va han nuam chiang tak em! Kan inthlah phal lo hi a ni ber mai.
“Bawih, i nu chu phone la. Zanin chu riak ve mai rawh. Naktukah chuan ka Nutei te in lamah ka insawn tawh dawn sia. Dawr lamah buai a ngai ṭhin dawn sia,” a ti niap niap a.
A vawi khatna atan ka nu chu dawt ka hrilh a ngai dawn ta. Ka thil sawi tur ngaihtuah neuh neuh pah chuan ka nu chu ka call a. <<Contd>>
~Author: Anonymous