NGHILH LOH RUATI - Zanlaithlifim

Thla khat vel lek ka la kawl ka motor lei thar nen chuan kan pu-te in lam a kan chaw eikhawm zo chu zan dar-11 velah in lam pan in ka haw mek a. Vanapa Hall kawt ka thleng a, ka Phone a rik avang in ka motor ka ti ding a, Phone chu ka chhang a. Ka U in ka lo haw tawh dawn keh dawn loh vel min lo zawt a, ka haw mek thu in ka chhang a. Chutia phone ka hmang zo chu Vanapa Hall kawt lam aṭang hian thawm ri deuh nek nek ka hria a, anmahni chu hmu chiang chiah lo mah i la an thawm aṭang chuan sum lamah an inti buai a ni tih ka hre mai. Mi buai na mai mai te ka lo buai ve na tur a awm lo tiin han kal leh mai ka tum lai tak chuan ka aw hriat ṭhan zet mai, kum tam tak ka lo hriat tawh ṭhin aw hi ka hre tlat in ka hria a. Kan ngaithla chiang a, a ni ngei e. 

Ka hmangaih em em, kum tam tak liam ta a min kal bosan tu Ruati aw ngei a ni. Ka motor aṭangin ka chhuk a, thawm chu ka ngaithla chiang a, a va mak em! Ka hmangaih em em ṭhin Ruati chu KS a lo ni, a hmangtu ten a sum tur an pek loh avangin an lo inti buai a ni. A thim chin lai aṭang chuan rilru na tak chungin ka lo thlir ngawih ngawih ringawt mai a ni. Engtin nge a nih theih? Engvang nge?... zawhna chhan sen loh a lo lut zawt zawt mai. An inhnial nasa ta mai, ka khawngaih lutuk chuan engtik laiin nge a banah ka va chelh a, ka motor-a ka hruai luh ka hre hauh lo. Motor chhungah chuan kan ṭhu ta vang a, min hmu chu a kun ngal a, min la hria a ni mahna. Kei chuan," Ruati, min la hria em?" Ka ti a. Mahse, min chhang thei lo. Ka zawt nawn leh a, inhnit faih faih chungin," Ka tih palh," a rawn ti a, ka hmel a en ngam lo a ni ang a kun tlat a. 

Ka khawngaih hle mai. In inah ka hruai haw ang che ka ti a mahse, a duh tlat lo. "In a i haw duh loh paw'n kan inah i riak dawn nia," ka ti leh a, a duh lo nasa mai. Mahse, ka hmangaih em avangin khang mihur ho bul a a awm tur kha ka hmu phal lo a ni. Chuvangin, a duh lo chung pawh chuan kan inah ka hruai lui ta tho a. Mission Veng-a kan inah ka hruai a, motor aṭangin kan chhuk a, kan in chu a en a, mak a ti ve hle a ni ang," Hei hi nangma in a mi?" A rawn ti a. Kei chuan," Aw, ni e," ka lo ti vat a. Naupang tet aṭanga rethei tak a sei lian ka ni a, mahni inhlawh chawp in lehkha ka zir chhuak a, tunah chuan Department pakhatah Asst. Director ka ni hial tawh a ni. 

Ni e, mak a ti pawh chu a awm e. Khati ang naupang rethei tak, tunah Concrete in lian leh ropui ve tak a ka han awm te leh motor nen a ka chhuak ta ṭhin chu mak tih loh rual a ni lo ve. " Lut i la?" Ka ti a, mahse a inthlahrung nge ni a ṭang deuh ṭung a. "Tunge inah awm?" A ti a, kei chuan," ka nu leh pa te an boral tawh tih i hriat kha, tunah chuan ka U hmeichhia nen chauh khan kan awm, inthlahrunna tur a awm lo, lut ang le," ka ti a, ka kai a. In kan lut chu ka U in min lo hmu a mak a ti ve hle niang a meng pawng deuh hawk a. Ka U chuan zawh duh tam tak a nei tih ka hria, mahse engmah sawi lo tur a ka tih avangin a ngawi ve mai a. Ruati chu inbual turin Bathroom-ah ka luh tir a, chutih lai chuan ka U nen kan ti ti a. 

Ka U chuan," Engtin nge i hmuh leh theih a?" Mak tih hmel tak hian min ti a, kei chuan ka hmuh leh dan velte chu ka hrilh a, ka U chuan a khawngaih hle a ni. Ka nu leh pate hian naupangte kan nih laiin min boral san a,ka u hian sikul pawh kal lovin tun dinhmun ka thlen theih nan hian min enkawl sei lian a, a nuamah leh a hrehawmah pawh engmah sawi lovin, a sur a sa hnuaiah pawh nu leh pa nih fawm in min chawi lian a. Hmeichhe dangte angin lehkha zir ve thei nise ka U hian I.A.S nih a chak ber ṭhin. Mahse, ka U hi I.A.S pawh ni lo mahse hmeichhe ṭhenkhat, mahni tawk a thiam inti leh chapo em em, feng chhing tak tak ho ai hian ka U hi a ropuiin ka ngaisang daih zawk. A ni chuan Pathian thu leh hmangaihnaa khat in min zirtir a, he khawvel miropui kan tih te, thusawi thiam tak takvte ai hian a Pathian thu min hrilh ṭhin te, thil ṭha tinreng min hrilh ṭhin te kha a ropui zawk a, tun thleng hian ka nun hial a la theihnghilh lo a ni. Ka U ka lawm e, ka tana i thil tih zawng zawng avang hian... Ka U nen thil tam tak kan sawi hnu chuan Ruati inbual zo pawh a lo chhuak ve ta a. Ka U chuan hmangaih leh lainat takin a lo kai a, a hak turin a ma thawmhnaw a pe a, engmah sawi lovin a eitur a siam sak leh nghal a. "Le, ei tawh rawh le," tiin ka chuan Ruati chu a ti a. Mahse, Ruati chuan a ei thei mai lo, a kun reng a. Ka U chuan i duh ber ka siam sak che hi, ei tawh la tiin nui sang chungin a han ti a. 

Mahse, Ruati chu lungchhe takin a ṭap ta mai a. ," Tinge engmah min zawh loh? Tinge eitur min siam? Tinge ka kal na min zawh loh? Tinge min la hmangaih reng a...?" Tiin Ruati chuan tap chungin ka U chu a ti a. Ka U chuan hmangaih takin," Ka nau i nia, kei pawh i U ka ni lawm, i inah i lo haw a, engmah zawh i ngai hleinem," a ti a. Sitting room aṭangin ka lo thlir reng a, ka rilru te te chuan ka U hi a lo va'n fel tak em, heti ang hmeichhia hi an piang leh tawh dawn em ni? ka lo ti a. Mittui nen chaw te chu an han eikham ve ta a, kei chu kan hotute in lamah zanriah ka ei tawh vangin ka puar hle tawh. Mut hunah chuan ka U chuan Ruati chu a room-a riak turin a ti a, mahse Ruati chuan inthlahrun hmel takin," Ṭhutthlengah ka lo mu zawk ang," a ti a. Ka U chuan ṭhutthleng te chu ṭhut na tur lawm tih pahin a room-ah chuan a hruai lut daih a. Kei pawh ka inti fai a, mu tur in ka room lam ka pan a, ka U leh Ruati chuan thil an sawi tih an thawmah ka hria, min lo rel mai ang a te ka tia. Mahse, an pahnih a an awm chuan min rel ngai lo tih ka hria. Ka muthmunah te chuan Ruati chanchin te ka ngaihtuah a, kan tunhma lam chanchin zawng zawng te ka chhui kir a, ka muhil thei mai lo...

Pathianni ( Sunday ) a ni a, inkhawm turin ka insiam a, ka U chu Sande Sikul lamah a ṭan dawn avangin a kal tawh a, ka nu leh pate pawh inkhawm turin an chhuak a, kei pawh kan Department lam pan in ka chhuak ve nghal a. Biakin lam pan a ka kal lai chuan kawng chhak step aṭang hian hmeichhe tleirawl pakhat hi a lo chhuk a, ka lo en reng a a va hmelṭha teh lul em! A chhelo em em a, a thawmhnaw inbel te chu inkhawnaa hak atan a zahpuiawm ni lo, fai leh nalh tak a ni. A hmelṭhat zia te chu, khawi lam Vantirhkoh lalnu nge tih hial khawp a ni, mihring ṭawng hian a sawi fiah zo awm lo ve. A hmelṭhat chu thu hran, apian te hlei hlei chu a va dik em! He nu lakah hi chuan Miss World Contestant te chu nepte an ni. Rose-par ianga a heh sen mawi tak te, a vun nung sar leh var nalh tak te chu mipa ti tuiral tu atan chuan a aia iai awm loh a awm chuang lovang. Kan sawi uar thiam lo zawk hial awm e.... ka zawn a rawn thleng a, ka lo en nasat em avang chuan mak a ti niang," Tinge min va en nasa ve?" Nui sang chung hian a rawn ti a. Ka harh deuh zawk mai," A... en tur dang a vang em a..." ka ti ta in ka hria. 

Khawi Department-ah nge i inkhawm dawn tih min lo zawh chuan," Intermediate Department-ah," ka lo ti vat a. " E, kei pawh Intermediate Department tur ka nia, mahse tumah hmelhriat ka nei lo va, hostel aṭangin ka chhuak chiah a, a zahthlak ngem le?" Tiin min zawt a, " Zahthlak lo ve, kan kal dawn nia," ka ti a, Biakin lam pan chuan kan kal ta a. A fel em em a, biak a nuam bawk. Hmeichhe dang bulah chuan pangngai takin ka awm thei mai a, mahse a ni bulah hi chuan ka By-heart sa pawh ka theihnghilh vekin ka hria, sawi tur ka haihchham hle. Mahse, a fel em a, a hawiher a zangkhai a, tlem chuan a ziaawm deuh. Biakin kan thleng a, hmeichhe ho ṭhutna ka kawh hmuh a, fel takin a ṭhu ve mai. Kei pawh ka ṭhutnaah ka ṭhu ve nghal a. Ka Department-a mite chuan min enduh hle mai. Ka ṭhut pui pa pakhat phei chuan," Tunge a, a va chhelo ve?" A rawn ti pek a. Kei chuan," lo kal thar a nia, Chuti ang lam sawi na hun ni lo..." tiin zai hruaitu in-a a hla sak chu ka zawm san daih a. 

Inkhawm banah chuan ka bulah a lokal leh a, ka ṭhiante chuan min en duh viau mai, ka zak zawk hial a ni. Kan haw rual leh a, thil engeng emaw kan sawi a, ka be ṭha ve ngam deuh tawh bawk a insit tak chungin a hming kan zawt tawp mai a. A ni chuan Vanlalruati a nih thu leh Ruati tiin an koh ṭhin thu min hrilh a. Ka hming min zawt ve a, kei chuan," Lalhmangaihsanga ka nia, Sangte tiin min ko ṭhin," ka ti a. Engeng emaw kan sawi hnu chuan Inkhawm kal dawn a kan inhmuh na step-ah khan a peng chho leh dawn a. An in a leng tur in min sawm a, mahse in lamah lehkha zir a ngaih thu leh thil dang tih tur ka neih thu te ka hrih a, remchang hmasa berah ka la len tur thu ka hrilh a. Tichuan, in bye-bye chungin mahni in lam ve ve chu kan pan a. Zanah te chuan ka ngaihtuah neuh neuh a, ngaihzawng ka la nei ngai si lo va, nei dawn pawh ni i la kan chhungkaw dinhmun in a zir lo em a mite zinga mahni mawng hlim ang lek ka nih ka hlauh avangin ngaihzawng ka nei ngai lo a ni. Mahse, Ruati erawh ka ngaihtuah tawp thei lo. Kei hi hmangaihna lipuiah ka zuang lut ve ta em ni te ka tia, mahse kei ni ang te chu min duh chuang lovang te ka tia, ka rilru a insual vel a ni. Ruati chu ka lo ngaihtuah nasa lutuk a ni mahna lehkha zirtur a ka ṭhu pawh, ka lehkhabu reng ka lo la keu hleinem.

Ruati nen chuan kan sikul kalna a inang a, mahse a ni aiin pawl khatin ka sang hret thung. Kan veng a inang lo va, mahse kan veng ṭhenawm lawkah an awm thung. Biakin lamah te, sikul lamah te leh a ṭul hunah chuan in lamah te in kalpawh tawn in kan inkawm nasa em em a, ṭhian dang reng kan ngai lo. An inah te chaw ka ei a, a ni paw'n kan inah a ei ve fo ṭhin. Ruati pa hi Doctor a ni a, a nu hi Higher Secondary School-ah Lecturer a ni. Unau pathum an ni a, Ruati hi an milai niin an unau a hmeichhe awm chhun a ni bawk. A chhungten an duat em em a, kehthei dawm tak meuh meuh an dawm a ni. Mahse, chumi avang chuan Ruati chu a pangchang chuang lo va, a puitling em em thung. An hausak avangin midangte a enhniam chuang lo va, a khawngaih zawk hle ṭhin. Kei ni chhungkaw rethei tak pawh hi min hmusit hauh lo va, hmihsit a hnekin kei ngei pawh hi a ṭhianṭha berah min ruat hial zawk a ni. Ruati nen chuan kan inkawm nasa a, phone ka nei lo va, mahse a ni chuan a nei a, phone-a inbiak a ngaih chang chuan ka nu phone ka hmang mai ṭhin. 

Ka nu hi Bazar-ah chawhmeh zuar in a ṭhu ṭhin a, ka pa hian kan huanah ka nu chawhmeh zawrh tur a la ṭhin a, ka nu chawhmeh hralh na aṭang a kan sum hmuh chu kan chhungkaw ei ber a ni. Mahse, chuti chung chung pawh chuan vawiin ni thleng hian tuma buhfai nokhat pawh puk ngaiin kan la awm lo thung. Puk ngai lo tur a ka nu leh pate thawhrim zia chu sawi fiah chi a ni lo. Kan chhungkaw dinhmun avangin ka U pawh pawl riat thleng chau sikul a kal a, mi dawr nghakin a inhlawh ṭhin a,kei ina ṭha tak a lehkha ka zir theih nan an tih vang a ni. Ka chhungte hian min lo va hmangaih tak em... Pathian zarah pawl-12 pawh ka zo ve ta reng mai. Lehkha ka zir lai zawng hian hna harsa leh hahthlak te chu ka chhungten min thawhsak zel a, chuti ang avangte pawh chu a ni mahna pawl-12 pawh Mizoram pumah pasarihna ka ni ve hial a. Kei aiin ka chhungte an lawm zawk hial a ni. Passed lawm nan tiin ka nu leh paten nidanga kan la hmeh zen zen loh Vawksa chu an chhum a, Ruati pawh chaw eitur in kan sawm a. He mi zan hi kan hlim hle a, chhungkua kan hlim ber ṭum a ni hial ang. Chaw eikhamah Ruati chu an inthleng ka thlah a, inthlahlel tak chungin a tuk a inhmu leh tur in kan inmangṭha a. In ka thleng a, ka nu leh pate chuan naktuk lamah huan a kal a chawhmeh lak an tum thu te an sawi a, keiin College kal ka duh thu te ka sawi ve bawk a. A chang leh kan nui a, ka ri deuh huk huk reng a, kan hlim hle a ni. Mahse, a tukah ṭahna a thleng dawn tihreng kan hre si lo...

Zing khua a lo var a, chaw eikhamah ka nu leh pate chu huanah feh tur in an chhuak nghal a, ka U pawh dawr nghak turin a kal ve bawk a, kei chu in lam tifai turin in ka nghak thung a. Chutia ka nu leh pate feh tur a an chhuak chu khua a rawn dur nghal viau a, ruah a sur nghal a ni mai. Ka nu leh pate chu thlamah an awm a, chutih lai chuan thlam chhak a lei chu a rawn min ta thut mai! In ral rinna hun a awm tawh si lo, tichuan chu lei hlawm chhah tak chuan ka nu leh pate chu thlam chawp chuan a hnawl ta. Kan huan piah a lo nei ve pu Muana te chuan chanchin an hriat veleh veng chhungah an hriat tir nghal a. Kei pawhin ka hriat veleh kan huan lam panin ka liam ve nghal a. Ka nu leh pate delh tu chirh hlawm lian tak chu ka hai nghal char char a, ka nu leh pate ka ko bang lo. Rei fe hnuah chuan tlangval ho chuan ka nu leh pate chu an hai chhuak ta, mahse minung ni lovin mitthi an hai chhuak thung. Ka nu leh pa ruang chirh nen a inpawlh chu ka ka kuah a, ka ṭap zawih zawih a, tih theih reng ka nei si lo. Tichuan, ka nu leh pa ruang chu kan inah zawn luh a ni a, ka U pawhin a hriat veleh a lo haw nghal a. 

Ka U nen kan inhmu chu kan inkuah a kan ṭap dun char char a. Kha mi ni a ka u ṭah nasat zia kha, mihring ka nih ve chin aṭangin ka ti em em a tam mittui tla kha ka la hmu ngai lo. Ka nu leh pa a hmangaih avang a ka U mittui tla kha, daiper tham hial a ni ngei ang le. Tichuan, a tukah ka nu leh pa ruang chu vui liam a ni a, kei aiin ka U hian a tuar zawk hial ang. Ruati te chhungkua pawh kan lungngaihna min hnem a min tuarpui turin an lokal ve bawk a. Ruati pa chuan ka U bulah kan pachhiat lutuk loh nan sum ṭhahnem tak pek a tum a, mahse ka U chuan ," A ngai hleinem, hna kan thawk thei a, kan rethei lutuk bik lovang, in mi duhsakna avangin kan lawm lutuk," tiin ralna atan a sum an dah bak chu a lak belh duh lo a ni. Ka U hi chu a ropui thlawt a ni. Mi ṭhenkhat chu ni se an thawh theih reng lai pawh in thawk hmasa si lovin sum hmuh an duhawm tho si a. Ruati te chhungkua khan min enhniam vang leh min hmuhsit vang a sum min pek tum an ni lo va, an miṭhat leh an fel em vang zawk a ni. Mahse, kan thawh theih chhung chu kan thawk ve tur a ni, chuta ṭang a kan thawh chhuah chu kan ei ve chauh zawk tur a ni, keini aia mamawh zawk an awm ang a tih vang chauh a ka U khan la duh lo mai a ni. Ruati pawh chuan min tawrhpui em em a, min hnem ve nasa a ni. Ka U chuan min kuah pahin," Bawih a, lungngai reng reng suh, kei ka awm a hna ka thawk angnga, ka chawm zel ang che. Lehkha hi ṭha takin zir la, hna ka thawh theih chhung chu kan rethei hauh lovang," tiin min thlamuan a, ka U hi chu thlamuan pui tham a ni reng a ni.

Ka nu leh paten min boralsan aṭang a thla thumnaah chuan College ka kal ve ta a, ka U in hna a thawk a, Class kal loh niin ka thawk ve bawk a, ka U chu min enkawl tu ber a ni ta. Ruati pawh pawl-12 a ni ve ta. Hun leh nite an liam zel a, Ruati paw'n pawl-12 chu a zo ve ta. A zo satliah mai ni lovin, tuma tluk rual loh in Mizoram pumah pakhatna a ni. A passed lawmnaah min sawm ve a, ka U nen kan kal a, kan hlim tlang viau a ni. College a kal ve ṭan a, Science lamah a kal a, kei chu Arts lam a ni thung. Kan Semester leh kan Class, Subject-te nen inang lo mah i la, a bang hmasa zawk in kan innghak ngei ngei ṭhin. 4th Sem ka zirlai a ni a, ṭumkhat chu kan College restaurent-ah thingpui in in ka ṭhu a, ka bulah chuan kan class a mi hmeichhe pakhat a lo ṭhu ve a, thil kan sawi a, kan nui nasa mai. Chutih lai chu Ruati Class bang chuan min lo hmu a, a lo ṭhu ve duh lo va, mahse kei chuan ka lo hmu hauh lo. 

Tichuan, class banah Bus kan chang leh a, mi an tam lo bawk a Ruati bulah chuan nidanga ka tih dan ngai bawk in," Vawiin class a nuam em?" Nui chungin kan ti leh a. Mahse, nidang pawh a hlim tak leh ka zawhna bak hial chhang ṭhin kha, tunah chuan a rul tawk lek in min chhang thung. Thil ṭha lo a awm a nih ringin Ruati lehlam hawi chu ka kuai her a," Ruati, thil dik lo a awm mi, min hrilh la?" Ka ti a. " Bialnu i neih rengte chuan tinge min biak reng," tih pahin lehlam a hawi leh daih a. " Bialnu ka nei lo reng reng, nangman min duh te nih loh chuan," fiam deuh ti tih hian ka ti a. Ka lam lo hawi pahin ka mitah min en a," Sangte, ka hmangaih che," a ti a, min kuah nghal a, a inhnit faih faih bawk a. Ka nui hmel a tawp chawt a, ka thinlung lawmna in a rawn zui nghal a. Kei pawhin hrilh ka lo chak em em, mahse ka sawi ngam si loh kha, chutia a hmeichhia zawk in a sawi takah chuan kei paw'n lungchimte'n ka ṭangah pawm in hmangaih biahthu ka hlan ve a, kan inpawm vawng vawng a, inhmangaihte tih danin in-kiss chuan a chhunzawm ta a. Kha mi ni aṭang khan Ruati nen kan inngai zual emaw tih tur in kan inzui nasa em em a, Ruati chhungte paw'n kan inhmangaih tih an hria.

B.A 2nd Year ka zo ve ta, Ruati paw'n Bsc 1st Year a zo ve ta bawk. Mahse, Ruati'n 1st Year a zawh hnu lawk hian ṭumkhat chu City Park-a leng turin min sawm a, he mi ṭuma thil thleng hi ka nu leh paten min boralsan hnu a ka mittui ti tla leh tu hmasa ber a ni. City Park-ah kan ṭhu a, Ruati chuan min en pahin," In ṭhen ang, phaiah ka awm dawn a min lo zawng suh," tiin thutak zet hian engmah pawh ka sawi hma chuan a ti nghal hmak a. Sawi tur pawh ka hre lo, min ṭhawng thut a ni ber mai. Ka duh lo, inṭhen ka duh lo... tiin ka ngen ṭhin a, mahse a ring a ti khawng tlat si, a kal a, kei chu lungngaih avangin ka la indawm kun thung. Engvang nge? Min hmangaih thu min hrilh tu kha engtin nge heti ang hi a tih theih zawk? ... Mahni leh mahni chhan theih loh zawhna ka insiam a, ka rilru a na takzet a ni. 

Inah ka haw a, ka U ka hrilh a, min khawngaih hle. Ka U hian Ruati nen a kan chanchin zawng zawng a hria a, heti ang a min kalsan ta mai hi min khawngaih em em a ni. ," Bawiha, lungngai reng reng suh, an ni chu kan tan chuan an sang lua a ni, Pathianin kawppui ṭha tak a pe leh dawn che lawm," tiin Ruati sawi chhe miah chuang lovin ka U chuan min hnem a. Ka u hi chu ka thlamuan pui ṭhin asin. Ruati tel lo va hun ka hmang ta chu mal riau hian ka inhria a, midang chuan hmeichhe pakhat ve mai mai... an tih laiin ka tan chuan engkim a engkim a ni si. Lungngaiin awm mah i la, ka U in'a min hnem ṭhinna te chuan min chhawk ve hle a ni. Hun leh ni a liam zel a, B.A pawh ka zo ve ta reng mai. Tichuan, M.Z.U lamah University zawm turin admission-te ka tifel a, ka thinlungah chuan Ruati a reh thei chuang lo, nula leh tlangval inhmangaih tak a an kal dunte ka hmuh hian kan hlim lai nite kha ka ngai ṭhin hle. Hun leh ni a lo liam ve zel a, M.A pawh ka Graduate ve ta. 

Tichuan, kum khat chhung Certificate Course zirin hun ka hmang leh a, tunah chuan Department pakhatah hna ka hmu ve ta hlauh mai. Mahse, hun leh nite an liam pui ve loh ka hmangaih em em Ruati chanchin erawh hriat tur a awm lo thung. Ṭum khat chu Ruati te inah ka va leng a, khaw dangah an lo insawn tawh a. An insawn na lamah chuan ka va kal a, Ruati nu leh paten min lo hmuh chuan min lo lawm thiam khawp mai. An fanu chanchinte ka zawt a, anni paw'n sawi tur reng an hre bik lo. " Phai lamah ka awm dawn a tih hnu khan tun thleng hian tumah min rawn la be lo, tihngaihna kan hre tawh lo," tiin Ruati nu chuan lungchhe takin a sawi a. A lan danah chuan an fanu chu a ruang tel lovin an vui a ni ber. Ruati nu leh pate pawh in kan inhmangaih zia an hria a, heti ang a a chanchin hriat tur a awm lo ringawt mai hi an tiar hle a ni...

Ṭing... Ṭing... Ṭing... Ka alarm a lo ri a, ka harh hlawl mai, sana ka en a zing dar-5 a lo ni a. Nizan lama ka thil ngaihtuah kha ka lo mutthilh pui a ni ngei ang. Ka inphih fai a, ka U leh Ruati chu an la mu a. Tichuan, ka tih ṭhin dan pangngaiin zing exer la tur ka chhuak a. Dar 6-ah ka haw leh a, an lo la thawh loh avangin breakfast ka buaipui nghal a. Breakfast ka siam lai chuan ka U a lo tho va, Ruati a thawh leh thawh loh ka zawt a.," A la mu nih kha, nizanah ka pum a na a ti deuh reng a, zing lamah khan a mu nghet ve deuh chauh a," tiin ka U chuan min chhang a. 

"A pum a nat leh chuan damdawiin lamah kalpui i la a ṭha ang," ka ti a, ka U pawh chuan a ṭhat thu a sawi a. Ka u a intih fai hnu chuan eirawng a bawl chhunzawm a, chutih lai chuan Ruati pawh a lo tho ve ta a. Ka U chuan mikhual mu rei lutuk mai a lo tifiam a. Tichuan chaw ei turin dawhkan kan kil a, mahse Ruati chuan a pum a nat thu leh chaw a ei chak loh thu a sawi a, a pum chu a dawm deuh vawng vawng a. A pum chu na a tih em avangin damdawiin lam chu rang takin kan panpui nghal a. Nachhawkna in an lo chiu a, tlem chuan a ziaawm deuh. Doctor chuan test hrang hrang hmangin Ruati natna chu a han en a, chuta a result min hrilh chuan ka rilru a ti na takzet a ni. Ruati chu thisen leh pumpui Cancer a lo ni a, HIV positive a ni bawk... ka U nen chuan sawi tur kan va vai chiang em! Doctor chuan," Heti ang hi chu phai lamah pawh tih vak ngaihna a awm tawh chuang lo, a nasa tawh em a ni, Pathian thu thu a ni tawh," tiin beidawn hmel takin a sawi a, min kalsan a. Ka U nen chuan a rukin kan ṭap a, ka U chuan a khawngaih takzet a ni. Ruati chu engmah kan hrilh duh lo thung.

Chhun lamah chuan Ruati chu ka U in a awmpui a, kei chu Office lamah hna pawimawh tak a awm avangin hnaah ka kal thung. Ruati nu leh pate pawh ka U in a lo call-a, a rang thei ang ber a lokal an tum thu an sawi a, mahse an awmna ṭang chuan naktuk zing velah bak an lo thlen loh hmel. Office banah chuan in lamah ka intifai phawt a, tichuan damdawiin lam chu ka pan leh a, Ruati tan a chhang duh ber ka ken sak bawk a. Ka U chu zan inkhawmah Kohhran lamah chanvo pawimawh a neih avangin a haw a ngai a, kei man Ruati chu ka riahpui a ngai a ni. Ka U chuan a haw hma in Ruati chu a ṭawngṭai sak leh a, tichuan a haw san ta a... " Ruati, vawiin engnge i an?" ka ti a, a ṭhat thu in min chhang a, mahse a taksa a chau tih erawh ka hria. Ruati chu kan en ṭhin a, a taksa a cher tawh tak zet a ni. Thil tam tak zawh duh ka nei a mahse, ka zawh hma hma chuan ka rilru a hria nge ni ka zawh duh te chu a man a sawi nghal vek a... A inthiam loh thu te a sawi a, khatia min kal bo san chhan chu ka tan a thianghlim tawh lo va a inhriat vang a lo ni. 

Zan khat chu a ṭhiannu Birthday lawmnaah a kal a, zu a lo in chhin ve a ni. Duhaiin a lo in tam ta hret a, mahni in control zo ta lo chu, chuta awm ve mipa ṭhenkhatte nen chu a ma duhthu ngeiin mipat hmeichhiatna an hmang a, a inhriat chhuah meuh chuan a tlai zo ta. Ka tan a thianghlim tawh lo tih inhria in ka hlat thei ang ber a awm a tum a ni. Ka tan a thianghlim tawh lo va a inhriat avang chuan hmeichhe dang nen a bul ṭan leh turin min duh a, min kal bo san dan a ngaihtuah a, a chhungte lakah pawh a kiltawih a, a kal bo san ta a ni. Chutia mahni a awm ta chu sum thawhchhuah a ngai a, a taksa hmang chuan a lo sumdawng ta ṭhin a, mi motor-ah te riak in hun a lo hmang kual ṭhin a ni. Ka chanchin a ngaihtuah reng a, min ngaih ṭhin thu te a sawi bawk a. A mittui a tla a, a chauh em avangin ṭawng tawh lo tur in ka ti a, a inthiam loh thu a sawi reng bawk a, ka rilru a na takzet a ni.

Zanah chuan Ruati bulah naktuk zingah a nu leh pate pawh an thlen tur thu ka hrilh a, a mittui a tla leh rih a. Mu tur a kan inbuatsaih lai chuan Ruati pumna chu a zual ta thut mai a, rang takin Doctor leh Nurse te an lokal a, I.C.U -ah an dah lut nghal a. A dinhmun a ṭha lo hle a, ka U pawh ka hrilh nghal a, a ni pawj a zan a zan in a lokal nghal a. I.C.U -ah chuan zankhua in a awm a, kan unau pawh kan mu bik lo. Zing khua a lo var a, Ruati nu leh pate pawh an lo thleng ve tawh a, an fanu chu hmuh an duh a, mahse I.C.U-ah luh an phal loh avangin pawnah kan ding a. Ruati nu leh pate chuan lawmthu min hrilh mawlh mawlh a, keiin kan inhmuh leh dan te chu ka hrilh ve bawk a. Zing lam dar-7 a lo rik chuan Ruati chu a zual ta thut a, Doctor leh Nutse ten theih tawp chhuan in an bei a, Ventilator hial an hmanh chung pawh in Ruati nunna chu chhan hman a ni ta lo! Ka hmangaih em em ka lo nghah reng ṭhin, ka duh em em leh ka engkim a engkim chuan mual min liam san ta. Ruati nu leh pate ka en a, an fanu ruang bula an ṭap thawm chu ngaihthlak hrehawm tak a ni. Ka U pawh a ṭap nasa kher mai. Nu la fel a an sawi ṭhin, an hausak avanga midang en hniam ngai lo, nitin sa hmeh thei rengin kan in a chaw a lo ṭum a Dal chhum leh Maian bai chauh kan hmeh ṭum pawh a puar tak a min ei pui thei leh midangte sawi chhe ngai lo, hmeichhe inngaitlawm tak kha a ni sin. Kum tam tak hnuah kan inhmu leh a, reiloteah khawvela in hmu leh ngai tawh lo turin min liam san ta si. Ka ring thei lo ni, ka rilru buai takzet a ni. Ka U nen kan inkuah a, kan ṭap dun ringawt mai a ni.

Ruatin min boralsan aṭang a a thih champha vawikhatna a ni a, ka U nrn a thlan a pangpar dah turin kan kal a. Pangpar kan dah zawh chuan ka U chu ka nu leh pa thlan lamah a kal a, kei chu ka la awm thung a. Thlanlunga inziak chu ka en a, ka phun sep a," Ruati, tunah chuan kan Department-ah Director ka ni tawh sin, min lawmpui ang tiraw? Thil tam tak min hrilh tur i nei tih ka hria, kei paw'n hrilh tur che ka nei sin... Tinge engmah kan sawi hmaa min kal san?... Pathian in rem a tih chuan, hei aia zua zawk a in hmangaih tur in min lo nghak rawh aw...? Ka theihnghilh ngai lo ang che... Ruati..." tiin...

" I kawng zawng zawngah amah hre reng la, i kawng te chu a kawh hmuh zel ang che..."

( 'Based on true story' a ni a, hming hi chu fiction a ni e. Chhiar tute, in nun uluk ula, in inchhir na tur leh in tisa chakna ti puitlin turin eng thil mah insiam suh u... Like leh feedback ṭha tak tak te hian phur na min siam ṭhin...Min chhiar sak avangin ka lawm e... )