Diktak chuan amah ka tawntirh atang khan kata ni ngei tur in ka rilru chu tiam ngamlo mah ila,ka nihna theihnghilh dawn hial khawp in ka rilru kha amah ah kalo pe ve thin em em a, hetiang anga induhna te chu mi tamtak chungah pawh a thleng ve thin reng alawm ti in. Mahse keichu ka chungah lo thleng ve ngei mahse thleng lo ang maia enliam ka tum angai bik si.
Engatinge mìte hi nuthlawi anlo nih a, pasal tellova, Pathian lak atanga rochan fa an pawm vang hian mite hmuhsit tuar in nang ngei pawh in ilo diriam thin le.... Kha a fa ni mai tur paihbo thei dinhmuna a din lai khan Pathian pawi sawi hlau taka mualpho huam a, a rilru a siam dan te kha i hriatpuia, a hrehawm tihna te kha i tawrhpui ve em ni.
Hmangaihtu der tan a engkim, a hmangaihna, a thinlung, taksa leh a hun neih zawng zawng te hlan in alo in pumpek zo a, chu hmangaihtu chuan mualpho pui a lo hun in a kalsan leh ta si a. Engtiang taka na nge anih ang tih te. Bumna a tawh vanga a rilru buaina leh natna nasat turzia ngaihtuah a, hriatthiam pui hauh lo in tinge mite hian sawnpai tè te si an tih leh thin le.
I ngaihtuah thiam velo em ni? Nge ila tawnloh vangin atawng tawh te chu i dem mai zawk? Ka hrilh ang che aw. Kha sawnpainu khan a lo tleirawl tirh te khan "keichu sawnpai ka tum" ati bik lo asin. A nu leh pa tana fanu thatak, an mahni chawm thei tu tur nih tho kha asin a tum ve, i hrelo a ni.
Lo ngaithla zel rawh, sawnpai leh nuthlawi te hi Pathian in a duhtaka a siam, an thiltih zawng zawng a thlirpui a, an lu atanga an ke lèr thleng chiang taka a hriat mihring te ve tho kha an ni a. Bumna an tawh atanga an neih, a pa duhloh a fa a hmuh tak avanga lawmthu la sawi thei an ni asin. A chantawka lungawi thiam tuma a beihna zozai pawh i hre ve em ni? I hre reng zawk a nih si chuan tinge i la hmuhsit a, mi zingah nasa taka i diriam thin le?
An hun a liam zel a, bumna theihnghilh tumin nasa taka bei in hmalam pan a tum ve a. Hmangaihtu an lo lang a, duh in hmangaih let ve mahse nuthlawi ti a mi in an sèlna te vang chuan a tîm a. Mahni insitna nasa tak a lo awm thin. Ka hrilh duh che, mi zawng zawng in an hriatthiam duhloh chu maw nuthlawi pawh hian thinlung taka hmangaih an nei ve thei a, hmangaihna thinlung a neihloh phah lo asin. Mahse bum tum tu leh mi lepchiah a ngaih an lo nih phah zawk thin chu a nih si hi.
Enteh maw Duhtak, min hmangaihna leh ka tana i huam zozai ka hmuh in ka lawm e aw. Mahse nang chu tlangval, a nu leh pa ten duat taka an chawilen, tihsual nei velo leh hma hun èng tak nei i ni a, min theihnghilh zawk mai rawh. Kei chuan ka thinlung zawng zawng in hmangaih ve che mah ila, inu ngaihdan chuan mo tha ka ni thei ngailo anga, i pa ngaihdan chuan, a fapa, nuthlawi zuna uaitir tumtu mai ka ni si a,. Khuanu ruat kan ni a nih chuan kan tan hun ruat a la awm ve mai ang, ka ring tlat. Tunah rih chuan kei ve mai hian i hmangaihna dawng tur chuan ka insit mah mah a ni. Nuthlawi ve mai kha ka ni si a!