“Nu, i hmeltha ber” tih pahin min rawn pawm chuk chuk a, a awh ber cycle ka leisak avang chuan a thiam ang tawkin lawmthu min hrilh ve a ni, ka fapa hlim hmel chu hmuh nuam ka ti kher mai; a lu chu a kawlh deuh mal a, a mitmengah chuan min chhun, a bak chu a pa siar apa siar a ni mai; a vun erawh a ngo lam a pawl zawk a, ka neihchhun a nih tawh vangin ka duat a, ka hau phal ngai lo. Fa enkawl hi alo har a nih hi..tih lungawi tum reng rengin nun kan hmang a, a tihsual rengah pawh hau phal lo in ka ngawihsan fo! A mittui tla ka hmu thei lova, a thianten an hauh chang paw’n ka chhan thin, ka pain min hau nghe nghe, fate chhan ching nu chuan a fa chu mi tha takah a chhuah ngai lo tiin. Mahse, a han tap a, lungchhe takin. Chu chuan ka thinlung a dek a, amah tinatu te tihnat ve duhna in ka khat a, pawisak ka nei tawhlo thin.
Mahse, ka fapa hi a sual lo, fing ker chi a ni lo a, a phuang mai, chhawnchhaih nuam deuh a ni a, a thinrim changte hian a pute inlamah a tlan anga, mut dawnah min lo bia anga, “Ka ngai lo che, nangmah in riak rawh” a rawn ti anga, min ngai tih ka hriat vangin ka va lam leh nge nge thin. Apa chungchangah zawhna a nei fo a, mahse, chhanna dik pe ngam lovin ka la pehhel lui tang tang thin. A muhil laite hi ka thlir ngawih ngawih thin, ka va duatin ka va hmangaih tak em. Ka pa te in atanga hla lo teah kan inhmunah tho in ka sa ve a, ka pawisa khawl hmangin kan nufa chen theihna khawp chu ka khawr pum ve thei hram a; ka pate remti lo chung ka indang a, a chhan chu ka unau ten nupui an nei ve a, ka u hmeichhia lah a pasal in boralsan a, alo let leh bawk si, kan chhangchhe lutuk deuhin ka hria a, nitin school ka kal a, Hindi teacher ka ni a, lehkha zirtir chu nuam ka ti a, ka nun pawh a hlim ve khawp mai.
Ka fapa pawh Kan veng English medium–ah nursery atangin ka tantir ve a, lehkha lam hi a tihmi tak a ni dawnin ka hria a, ka lawm hle. Tlaiah a putea’n emaw a nupuii (ka u) emaw ten an va hruai a, ka nute inah a lo awm thin, ka school ban rualin ka lam nghal a, a chang chuan apite hian an ngai a, a riak fo, keimaha ka riah chang chuan ka ngai lutuk hi ka muhil thei lo ve ziah zel. Ani pawn min ngai a, min hmuh loh hlek chuan min lam chul thin.
“Puii, khawivengah nge pasal chu i neih a?” min hmuh tumin min lo chang a ni ngei ang. Vawiin chu a lo inmet fai vang tawh a, a hmel pawh hmuh anuam ta deuh.
“Kan vengah” ka ti mawl tawp a.
“Min biak hi nuam i tilo tih ka hria a lawm, mahse, ka be duh tlat si che a ni “
“Ti nge min biak duh a?”
“Ngaihdam dil che hi ka ba a ni”
‘A tlai tawh’ ka rilru chuan a lo ti a. Mahse, “A ho lutuk, ka theihnghilh vek tawh, kan nunhlui kha chu ka nawtreh tawh a lawm” ka ti a, ka la nawhreh loh zia erawh ka thinlung kehsawm themte chuan min hrilh luai luai ni hian ka hria a.
“Puii” a aw thawp sat chu hmanah khan ngaihthlak ka ning ngai lo a, a mawi kha ka ti thin a sin.
“Ka kal ange, nangpawn engkim kha theihnghilh rawh”
Ka fapa tuitaka a muhil lai chu mittui tling teuh chungin ka thlir a, “Bawihte, i pa chuan hmu che sela a duat ngawt ang che” ka ti chhuak hlawl a. Ti nge khapa kha ka huat theih loh a? pangngai taka ka la dawnsawn theih le..tlawm hi ka inti a ni. Thinrim taka ankhum phiar phiarte kha ka lo suagtuah ve thin si a, mahse, a taka ka han hmachahwn takah chuan ka nem suai suai a, tihnat kha ka hlau leh si..hmangaihna hi chu aww..
“Anu, Peka silai ang kha min lei ve rawh, hawh helamah hian an zuar” tiin min kai dawr dawr a; silai lem an zawrh lai chu kan enkual a, a duhzawng chu a kawk kual zut zut a, ka fapa neihchhun tan chuan atha ber ka duh thin, a man chu to engang mah se. A man pek ka tum lai chuan, “Kha ka pu, ka lo peksak ange” tiin a kutah pawisa a sik va a, silai lem zuartupa chu ava pe a. Hrilhhai takin ka va en ringawt a, min lo nuih a, “Rema, angai lo, iti zahthlak e mai” tih pahin ka purse atang chuan pawisa lakchhuah ka tum a,” Ka leisak ve duh alawm” a ti a, Bawihtea chu a kai a, min kalsan ta daih a, ka um a, Restauranat-ah kan inzui lut a.
“I ti ho ee, a zahthlak lutuk, a man a tam bawk si, ka pe leh ang che” ka ti a, ka ti tak tak, alaka bat nei anga lan ka duh lo.
“Puii, i ngaithiamlo a nih khaa, a ho lutuk, thil engmah ka la leisak lova, leisak ve ka duh mai chauh a ni, i ngaithiam lo lui tlat dawn anih chuan nuam lo ka ti viau ang” a tih takah chuan, ka sawizui duh ta bik lova. Bawihtea hian a nel em em a, alo len chang lahin an inbuan thul! Vawikhat phei chu, “Anu, apa hi alo haw har sia, apa Rema hi apa ni tawh maise ka ti” a ti reuh a! chhan ngaihna pawh ka hre bik lo.
Fa ka nei tih hrereng chung paw’n min ngaihzawn hi a thulh ngailo a, School-ah kan thawk ho bawk nen, pumpelh a har thin. Ka chhungte pawn min duhpui hlawm hle, ruihtheihthil ati lo a, KTP-ah a inhmang em em a, kan veng thenawm lawkah an awm a, an veng te pawn an fakin an chhuang ve hle, sang tha tawk tak, ria deuh lam, tarmit vuah a ni a, a ngo a, a fresh hle, a hmelchhe lo, a rilru pawh a tha, an chhungkua lah an awmthei a, a nu leh pate pawn min be tha thei khawp mai, kei a kar nuthlawi fa pawm tawh lehnghal hetiang taka min duh hi inchhuanna tham te pawh a tling ve reng, mahse, ka thinlung hi mipakhat tan ka lo hlan tawh si a! chu ka thinlung chu Rema hian thinlung thar hmangin a thlak leh thei angem, ka hre lo.
Kan nufa chuan min thlah haw a, kan kawt zawnah a ding a, Bawihtea chu a chhuk nghal a, “Lo leng lut ve rih la” ka ti satliah a, “A tlai tawh e mai, zanah ka rawn leng zawk ang” a ti a.
Ka chhuk chiah chu kan in kawta Mamawia leh Bawihtea lo inbe mek chu ka va hmu ta a! ka hamhaih vek, rang lutukin ka tlan phei a, Bawihtea chu ka va pawm lawp a, rum elkhenin Mamawia chu ka va melh a, Rema chu ka au tuarh tuarh a, a ngaihthalo chu a rawn chhuk ve mai a.
“Puii, tihnat ka tum hleinem, i fapa chu chibai ve ka duh mai a lawm” a ti sap a.
“Ti nge a? Puii”, Rema chuan a rawn ti a, a hmelhriat ngailoh mikhual chu a melh pah a.
“Rem, hei hi Mamawia a nia, ih, kan pa hlui chu a nia, Mamawi, Hei hi ka pasal chu a nia, Rema a nih hi” ka aw khur thup chung chuan ka ti zung zung a, an pahnih hrilhhai hmel chu nidang chu nise ka nuih leh khiah khiah tawh ang, mahse, tunah erawh ka nuih a za lo tlat!
An inchibai laia Mamawia hmel landan chuan ka chhungril hi a khawih tel a ni. Thuk takin a hliam ani tih hi ka va hmu thei, inthunun a tum hle tih pawh. Mahse, a mit chuan hnuai lam a bih tlat a, “Chhungkaw tha tak in din dawn nia, in inhmeh hle mai” a rawn tih rual chuan min rawn en a, tilui tih hriat zetin a nui bawk a, ka dawt sawi avang chuan ka inchhir hial a ni.
“Puii, ti nge khatianaga dawt i sawi kher a?”
“Kawng dang ka nei lo a lawm, min hrethiam rawh aw”
“Ka lawm zawk a lawm”
Zanriah kan ei lai chuan, “Nu, mikhualpa kha i pasal hlui maw?” ka thiltih pawizia ka hrechhuak chiah, kan bulah ka fapa alo ding ve reng tih ka lo hrechang tawhlo a ni.
“Bawihte, sawi tur hi a va tam em..” ka ti ta ngawt a. Makti zetin min melh kiau a!
SMS DENGKHAWNG
Ka pasalin a hna lama min kalsan leh tak avang chuan kan inchhung chu a reh in hrehawm leh tan tawh a, kan pa awmlai kha chuan, ka nu pawhin that a chhuah a, mami lah a sual vak ngam lo bawk, mahse, ka awmloh hlan hian kan pa chu eng thu nge an fah thin ka hre lo na a, ka chunga lungawiloh thut thut a ching hle, ka nghahhlelh ang hu in kan pa lo haw chu ka hmang nuam lutuk lo, mahse, hman loh ai chuan a nuam tho mai.
Tun tum a kal leh chu a hma angin kan in be tam lo a, keimah zawk hian ka be reng zawk a, fb lamah alo che na ve hle tih ka hmuh chuan ka thinrim khawp mai a; ka chhuahchhal nghe nghe a, nui huau huau chungin engmah a nih loh thu a sawi a. Hmeichhe dang kawp lamah phei chuan ka ringhlel phal lo.
Zankhat chu ka pum a nuam lo deuh a, ka pate thlai lo hawn pawh ka siamfel pui thei lo a, ka mu a.
“Kan lalnu chu a mu leh ringawt a ni maw?” ka nu chuan a ti a, ka hre phak reng a, kan thenawmpa lo len lai a nih vangin ka ngei khawp mai, a tawngkam chhe deuh deuh ho hi chu ngaiah ka nei deuh tawh a, chhan pawh ka chhang ngai tawh lo, mahse, mi awmlaia min han tiel kher thin hi chu tawrh a har ve thin.
“Hlawih hlawih thin che hian, a pum a nuam lo a, a mu anih kha” ka pa chuan a lo ti a.
Kan room-ah mami alo lut a, “U pui, i phone ka lo hmang” a ti a, ka chhan hma hmain ala a, a chhuak nghal daih a, top up hi ka chhungten min rawn thunsak reng thin a, ka nghei ngai lo. Reivaklo hnuah a rawn dah veleh mai a, kan pa ka zuk text a, min reply thei lo. Ka call tlang thei bawk si lo a. Ka nachhawkna ei in min chhawk a, ka muhil zui ve nghal a. Ka harh chuan ka phone kan en a, sms pathum alo awm a, kan hawng chu, number ka hriat ngai loh atang hian, “Mamawia nen hian inneih kan tum a! mualpho taka i chhuah hma hian then mai rawh, inpa hian thih huamin min hmangaih” tih te, “Kan inbe zo chiah, ka khawngaih zawk, min duh lutuk hi” “Inpa chu i duh leh i hrilh dawn nia’ tih te hi a lo ni a!!
Ka khur zawih zawih a, awmngaihna tak pawh ka hre lo; ka hrilhhai takzet a ni, ka awih loh viau dawn chuan a rawn confi nasa si a! ka thinlung nat zia chu sawiin a siak lo a ni ber e. Kan pa chu ka call nghal a, a pick up thei silo, ka tho a, eirawng ka bawl a, ka zawi ngawih ngawih mai, ka tha te a khur zova, din pawh ka ding ngil thei lo. A bialnu inti chu call ka tum a, a phone a off tlat bawk si.
“Mamawi, ka thu hriat hi a dik em? A va mak ve” ka ti thei tawk, ka hnuk a ulh a, ka mittui chu dan rual lohin a rawn luang zung zung a.
“Eng chu maw?” awki ngaihnobei vak lo hian a rawn ti a.
“Ngaihzawng i nei tih hi”
“chutiang engmah a awm lo”
“I bialnuin sms min rawn thawn a ni”
“Tumah bialnu ka nei lo, an rawn fiam che aniang, ka thianten”
“Min namnul tum suh aw, a rawn confi danah khan i bialnu a ni tih a lang reng”
“Nakinah kan inbe dawn nia, ka buai hrih” a ti hmuk a, a dah ta daih a! ka phone chu ka vawm darh lo chauh a ni. Ka nu leh Mami chu an inmelh hrek hrek a, roomah ka va tap ta ringawt a.
Kan pa chu ka va call leh a, waiting…!! Tu nge a biak ang le..ka call leh ngat ngat a, ala waiting ngat ngat, a bialnu inti kha ka call leh ngat a, a lo busy ve chiah! A chiang e.. Mamawia chuan min rawn call ngei ka ring a, mahse, nilengin ka phone chu a ngawi ta veng veng a! puahdarh vek hi ka va chak tak e.
Zanah chuan, ka theihnghilh tawh ngai loh tur leh ka damchhung ka thinlung tina leh thin tur sms ka dawng a, Ka pasal hnen a tangin, “ Puii, i uire tih hi dawt nise ka ti ngawih ngawih, mahse, min hrilhtu hi a daw lovang tih ka ring, chuvang chuan ka rawn haw hmain, i bungrua te kha lo la fel la, nang leh kei chu mi hrang kan ni tawh tih i lo hre dawn nia; tih mualpho che ka duh lova, tihian intha then tawp mai ang, min lo be tawh suh ang che, chuan bialnu ka nei a ni, rawn betu che kha ka bialnu chu a ni e” ka phone chu ka thlauh tawp a! inawhhlum mai hi ka rilruk hman hial a ni. Ka buai nuaih nuaih a, eng nge ka tih ang ka hre lo.
“Khawngaih takin ka thusawi hi ngaithla rawh, ka uire lo a sin” ka ti lawm lawm a, ka tap bawk a, thil thleng chu a rang lutuk a, ka hamhaih takzet a ni. Ka pate anlo tlan lut a, Thil awmzia chu ka sawi a, Mamawia chu min biaksak turin ka ngen ngawih ngawih a, ka ni chuan a call a, mahse, a pick up duh silo. Ka pa chuan min pawm a, ka tah khum ta zawih zawih ringawt a! mak hi ka ti lutuk em a ni, a chhuk atangin thla hnih ala tling lo deuh a, khami chhung lek khan ngaihzawng alo nei hman a maw? nge a hma khan a lo nei tawh zawk? Bum ka lo ni reng tawh tihna em ni? uire tih chungchang kha chu thiamchan nan a chhuanlam a ni tih ka ring thlap.
Ka khua a sik vut vut a, ka pum lah a na ngut ngut reng bawk a, ka luak reng bawk nen, chumizan chuan ka tlaivar chiang hle. Ka pate pawn tihngaihna an hre bik lo hle, Mamawia lah biak theih a ni silo. A bialnu kha ka call a, a lo la mial a! “Khawngaih takin Mamawia khan ka call la turin min lo hrilh sak hram ta che, reilote biak ka duh a ni, ka chhuak dawn, mahse, vawikhat chauh biak ka duh a ni” ka ti ngawih ngawih a! chutiang khawp mihring tlawm chu i hre ngai bik lovang tiraw?
“Ka bulah a awm hleinem, mahse, ka lo hrilh ang” a ti a, a dah ta hmak a, a aw chu nula puitling ve thawkhat aw a ang.
“Tu in nge uire min ti? Chu tal chu min hrilh la, chuan ka chhuak ang, uire chhuaha chhuah hi ka duh lova, thudik hriat ka duh, a tul anih phawt chuan Court thlen hial pawh ka duh” ka ti a.
“Driver Lawma khan min rawn hrilh a ni, a tawk em? Nang biak nan hian hun ka nei tawh lo, tunah pawh ka bialnuin min ngen vang chauha bia che ka ni” a ti a, a tawp leh ta..ka thinlung na chu huatnain a rawn thlak a, ka intifai sawk sawk a, ka khawsik pawh ngaihthah luiin Hotel lam ka pan ta nghal a, ka niin min rawn zui a, ka nu leh Mami khan khatia ka awm lai khan hmuhsit hmel zetin min en a, an tawng lova, mahse, ka uire ang tih chu an ring hmiah tih a lang reng.
Vanneihthlak takin Lawma chu a motor atangina lo chhuk mek a, ka va pan a, mi an awm em awmlo em ka ngaihven hman tawh lo, “Lawma, ka pasal bulah ‘ka uire’ tiin i lo sawi em ni?” ka ti nghal thawr a! a tir chuan a nui deuh a, mahse, hrilhhai hmelina rawn thlak nghal a, ka thutak zia a hmuh chuan mak tih hmel zet hian, “Ehee! Eng nge i sawi? “ a ti hu a!
Ka ni chuan felfai takin a lo sawi fiah a, ka kut chu ka humruh tlat a, a tul phawt chuan tualthah pawh ka hreh hauh lo.
“Ngawi teh u, in thusawi chu engmah a awmzia ka hre lo, i pasal pawh ka hre ve mang silo a, a number neih te chu khawilamah, chubakah ka la mutpui lo che a, hmuh pawh kan inhmu ngai tawh bawk si lo, a mak hle mai, keipawh hetianga puh hi ka duh miah lo, khawi i pasal chu ka lo bia a nge” a ti a, a thinrim ve hmel kher mai, Mi chuan min thlir thup a, ka zak lo; thudik hi a hlu a, uire a puh nih ai chuan ka uire loh zia fiah ka duh zawk .
“|hianpa, Lawma ka nia, hei innu in min rawn chhuahchhal a, engtik laiin nge i nupui hi ‘ka uire’ tia i bulah chuan ka lo sawi? Hetianga inpuh hi ka duh lo tih hre rawh, i nupui hi vawikhatmah ka la mutpui lova, mutpui ka tum hek lo, kan inkarah engmah a awm lo bawk” a sehchilh nawk nawk a.
“A ni tak ka hre tawh lo, “Lawma ka nia, i nupui thawh thinna hotela chawl thin kha, i nupui hi vawithum lai ka mutpui tawh tih lo hre ve mai mai rawh” tiin sms min rawn thawn kha mawle, ava mak dawn ve; chutia a i tan der leh si a!”
“Eee, khawi chu number chu min rawn pe rawh le, ka lo fiah ange, thudik chu haichhuah zel tur”
“Awle,” tiin number chu a rawn sawi a, Lawma chu amengphawk kher mai, “Khai a! ka number anih chu! A va mak ve leh, engtikah maw alo thawn, han en tha teh”
“Ka delete tawh ka tih kha, i number erawh ka la save a nih kha, a chiang em?”
“Pathian hmingin keimah ka nilo tih i lo hre dawn nia, i nupui nen hian sex kan la hmang lova, kan hmang ngai bawk lovang”
“Hahaa, i duh leh nei rawh, ani aia tha kha ka hmu tawh” a rawn tih ri chu ka hriat phak ve a vangin na tiin ka lo khur ngawt ngawt a! Lawma chu hrehawm tih hmel em em in a chal a dawm a, dawt a sawi ka ring lo, tu emawin a phone atangin sms kha an thawn tih a hriat mai, tudang nilovin Mami a nih ngei ka ring bawk.
Ka pasalin min duh tawh loh miau chuan awm ve reng ngaihna a awm lo a, ka pa pawn a zuk hrilhfiah thin a, mahse, bialnu a neih miau vangin ka chhuah tho chu a ngai ani. Ka chhungte ka han bia a, ka lungchhiatna chu ka thup hram hram a, an lo thleng a, ka bungrua te chu kan hlang fel a, ka pasal te in chu ka thlir reng a, ka pa leh ka ni chu ka ngai hle dawn tih ka hria, ka nu leh Mami chu engthawl hmel fahranin an kal lawh lawh a!
“Bungrua kha lak hmaih palh te in lo nei ange, uire bungrua kawl chu an tluang ngai lo an tih kha” ka nu in a tih chuan, ka puakkeh ve ta a, ka chhuahsan tawh dawn tho a lawm.
“Ka nu, ka uire lo tih chu kan khawtlang hian an hria e, nang leh i fanu min phiarrukna a ni tih pawh hi nakinah a rawn lang mai ang, i fanu hian Lawma a ngaihzawn avang leh Lawma’n a duh siloh avangin kan pahniha min tihmualpho nan hetiang hi a ti anih ka ring thlap; chuan maw, ka nu, ka hrilh ve mai mai ang che, SS zirtirtu a tang hian bang ngam la, MHIP Treasurer i nihna pawh hi inhnukdawk ngam ang che, i tling lo, i piangthar lo, mi dawthei leh mo te rel hmang, mo pawh ngeih thei lo, sum ringawt atchilh i nih kha, i chenpui kei hian i mizia chu ka hrechiang lutuk, i thusawi te kha tuman an ring lo; a rukin an hmusit zawk che tih lo hria ang che, vanram i kai a nih chuan tumah hremhmuna tla tur an awm lovang, ih maw, ka nu, ka hmusit lutuk che, ka nuihzat che, nu rapthlak tak i ni” ka ti ve ta hrep mai a! min chhan ngaihna a hre lo nge a zak ve zawk? A ngawi ta reng a.
In chhungah ka zuk lut a, Mami room-a Laptop ka zuk la a, “Khate chu ka u in min pe tawh, ka ta a nih kha” a lo ti a.
“Zak theilonu, ka ta liau liau, ka rawn chhawm luh a nih hi, uire bungraw kawl in duh silo a, ka la mai ang” nui lui chungin ka ti a, ka pa bulah ka va kal a, “Ka pa, mitha tak i ni, demna tur che ka hre lo, i fapa in ka chunga a thiltih hi ka tana a nat zia erawh min lo hriatsak rawh aw” ka ti a, ka ni lam ka hawi a, mittui tling piau in min lo en a, ka tan a tha a, a awm ve avanga ka nun nawm phah zia ka hria ani, “Ka ni, engemaw tak ka la tihsak ang che, min enkawlnaah khan ka lawm e aw” ka ti sap a. Lehhawi tawh miah lohin Kawnpui khua chu ka chhuahsan ta a ni.
Ka nun chuan mu leh mal anei lova, ka awm tawp ani mai, ka chhungte pawn min hrethiam em em a, min duat khawp mai, kum khat leh thla 8 chiah kan innei anih chu! Ka la naupang a, pasal chu ka hmu leh em em ang, mahse, phatsan leh bum nih leh ka hlauhna hian englaipawhin min chenchilh a, khawvel chu hlauhna nen ka hmachhawn a ni ber, ka chhuah atanga kar1-na ah nau ka pai thu k’n hre zui a! ka lawmna leh natna chu a inzatthuak awm e, mahse, beiseina min neihtirtu a ni ta thung a. Thinlung na chungin ka raipuar a, phuba lak chakna leh duhthusam inchawhpawlh in ka mu a, min phatsantu chu ka ngai fo a! min tihnat avanga na ve se ka duh laiin na ve tak tak se ka na ve tho dawn tih ka hre bawk! Ka be chak a, ka ngam silo, Fb-ah te chuan, a bialnu nen chuan an inrelate a, engkim chu ka hmuh ve zel thin avangin ka tawrhna chu a kiam nep thin hle, mahse, thutlukna ka siam a, “Ka fa hi chu ka ta a ni anga, ka fa avangin ka damkhawchhuak ang” tiin.
Nau ka vei laite chuan phatsantu ngai in ka tap a sin.. min hmu ve se min khawngaih ve ang em le..ka uire emaw a tih vanga a rilru natna vangin bialnu alo nei pawh a ni thei, a khawhar lungleng lutukhian amah ngaizawngtu chu lo be tha ve in a lo lutthuk ta pawh a ni thei..chung zawng zawng chu hmangaihna avang chauh pawn hriatthiam ka la tum thei ang, mahse, min hmangaih ta miah lo em ni? min hmangaihna te kha a bo zo ta vek em ni? hei hi a ni ka damchhunga ka hriatthiam ngai loh tur chu..engtin nge min hmangaihna te a phumbo vek theih? !!
Fapa ka hring tih ka hriat chuan, kan inthen atanga a vawikhat nan Pathian hnenah lawmthu ka sawi ve a ni, a hmingah pawh ROHLUPUIA tiin ka sak kha.
KA NUI ASIN
Ka fapa chuan ka mittui luang chu a rawn hru fai a, min rawn kuah a, “Nu, tap suh,” a ti a.
“Bawihte, ka tap lo, ka nui asin, nang hi awm lo la chuan i nu hi khawvelah ka awm tawh lovang, nang hi ka damchhan i ni” nghet zeta kuah pahin ka ti a.
Zirtawpni a ni a, school chawlh a nih vangin ka fapa nen inah kan inawm a, chhang ka kan sak a, kawngka kik ri a hriat chuan ava hawng a, min rawn koh vak vak avangin ka va tlan phei a, ka fian ken lai chu ka thlauh bawl a!
“Puii, reilote, khawngaihin” Mamawia a ni.
“Bawihte, i pite inah va kal lawk ta che” ka ti a. thuawih deuhin a chhuak ve mai a. kawngka ka khar a, gas ka va off a.
“Hun ka ngah lova, i sawi duh chu sawi nghal mai ta che” zangkhai vah hian ka ti a!
“Puii, min ngaidam rawh”
“Ka ngaidam tawh che ka tih kha”
“Ka hrehawm takzet a ni”
“Keipawh ka ni thin a”
“Engkim kha ka thiam loh a ni, engkim kha, mahse, ti nge dawt min hrilh kher? Pasal ila nei si lo a”
“Pasal chu pakhat chu ka nei tawh a, mahse, ani chuan min bum a, min phatsan a, uire hnawhchhuahin min hnawtchhuak a ni”
“Ka farnu rilru chhiat lutuk vanga kan pahnih tawrhna hi ava namai lo em tiraw? Mami kha a piangthar a, ka bulah a inpuang a, atir chuan vuak hlum ka rilruk hial a! mahse, anih tur ang a ni tawh si a, ka inthunun leh ta zawk ani”
“I bialnu kha”
“Puii, bialnu ka nei lo, ka thinlung na leh kehsawm khan phuba lak chaknain min siam a, khanu kha ka thiannu a nih kha; min khawngaih vangin min pui ve mai a ni, thudik a hriat hnu phei chuan ngaihdam dil che hi a duh ve em em zawk a sin”
“Awih tur chuan min ring lo la, khawngaihin”
“Nia, i tan chuan awih a har ang tih ka ring, mahse, vawiin thlenga nupui aia zu ka thlan zawkna hi chuan a rintir theih che ka ring “
“Fiahna awm miah lova uire a min ngai thei kha chu vawiin thleng hian mak ka la ti”
“Nia, mipa ka tling lo a ni, ka nep em a ni; khatia sms ka dawn atang khan ka danglam vek a, hrilh che kha ka duh a, mahse, khatianga ka na chung pawh khan zak tak leh mualpho taka i awm chu ka la phal chuang lo, uire anga ka hriat hnuah che pawh ka la be tho che a, tihian ka ngaidam mai ang ka ti hman hial! Mahse, ka zu rui lungpuam ka inngaihtuah leh a, ka thiannu kha sms ka rawn thawntir a, min biak i chak ngawih ngawih laite khan mittui tla chungin i call kha ka reject thin a sin, sipai ka nih vangin i bulah ka awm tam thei lova, i khawhar lungleng hi i uire anih ka ring a, dem loh hram che pawh ka tum, mahse, ka thinthawk leh thut khan engkim ka ti tawp ta ngawt anih kha.
In i chhuahsan zan te khan ka tap tlaivar a sin, patling meuh tahna chu a ho lovang tih i hriat ka ring, mahse, khatia i ngawih tak hmak danah khan i uirena nen chuan in innei ta ah ka ngai a, ka nu ka zawh lahin, an inru an tih thawm chu ka hria a rawn ti bawk si! ka thinrim rilru na khan zu ka in ta nghek nghek a, kanhotuten warning min pe hial a, mahse, ka inbunruah ve theihna awmchhun a nih vangin ka sim thei lova; min ban ta hial a ni. Mizoramah ka rawn haw a, kan khuaah pawh awm rei thei lovin ka zin kual reng a, hlimna ka hmu lo, englaimahin ka theihnghilh ngailo che a, nikhat chu kan khuaa ka awm laiin Lawma nen khan kan inhmu a, i chanchin ka zawt ta rawih a! engmah a hriat loh thu leh nupui a neih tawh thu te a sawi ta a, pasal i la nei lo a nih ringin hmu tur chein ka rawn kal a, mahse, min haw dawn em a ka hriat vangin a rukin ka enthla ta zawk che a, hmanni khan ka insum thei ngang lova, ka be ta che a nih kha.
Kan inthen atang khan tu hmeichhia mah ka la ngaizawng lova, fawh pawh ka la fawp hek lo; hmannia i pasal niawma i chhal kha a tukah ka hmu a, zak chung chungin nangmah enkawl tha tur leh hlim taka siam tur chein ka chah a, mahse, ani khan thudik min hrilh ta vek a, mi tha tak a ni”
Rema hian min rawn tlawh tawh ngai miah lo tih ka hrechhuak chiah! Kar 2 lai a ni tawh a. Mamawia thusawi atang chuan ka hrethiam nghal, ni e, mi tha leh lainatna ngah tak a ni tih ka hmuthiam ta e.
Ka pasal hlui thusawi chu ngawi rengin ka lo ngaithla ngat ngat a, a mak lutuk, a thusawi chu ka ring vek! Dawt a sawi ka ring lo.
“Puii, i tan chuan engmah ka ni tawh lovang tih ka hria e, mahse, thil pakhat chiah ka zawt ang che aw, i fapa hi tu fa nge?”
“Ka fapa hi sawn a nilo, a pa chu sipai a ni a, nitin hian, ‘anu, apa chu alo haw dawn tawh em?’ tih thu hi min zawt thin” ka tih lai chuan a hmai a hup tlawk tlawk a, a tap ta a! kei erawh ka mittui a hul hlauh thung.
“Ka fapa chuan ka lo haw hun tur alo thlir thin a maw? kum kha leh chen kha ka lo pumpelh a, fapa ka nei tih hria ila chuan, pa tha tak ka ni ve thei tur”
“Uire fa a ni sia, apa nih i duh ka ring lo a”
“Khatiang thu kha sawi tawhlo hram rawh, min ngaidam rawh” a ti leh a, pasal tlawm tak a ni. Kum engzah nge ka lo tah tawh a, zan engzat nge muhil thei lova ka tawrhna te kha ka lo tlaivarpui tawh. Ka hrelo, mahse, hei erawh ka hria, keimah chauhin tawrhna kha ka lo hmachhawn ngai lo tih hi.
“Nuuu, ka ril a tam” ka fapa chu kawngka bulah alo ding reng a, kawngka kha ka kalh emaw ka tia, ka lo kalh lo a nih dawn hi..
“Nu, apu hi ti nge a tah a?”
“Bawihte, apu hian a fapa a rawn kan anih hi”
“Maw?”
“I pa zin kha alo hawng tawh a, Bawihte,”
“Nu, hei hi apa chu maw” a hlim hmel chuan a hmel chu a rawn kap eng a, a va hmeltha tak em…
“Ka fapa, i pa ka lo haw e, lo kal teh, ka lo fawp teh ang che”
“Apa, min zinsan tawh suh aw, ilo haw har thei si”
Min rawn melh a, mangang deuhin ka tanpuina a rawn dil a,.
“A zin tawh lovang, tunah chuan tuman ‘khaw nge i pa’ tiin an zawt leh tawh lovang che.