“Lo ding lawk teh, biak lawk che ka duh a ni” a tih ri avang chuan, ka ke pen lai chu ka tawp chawt a! min hmachhawn zawng chuan a rawn ding a, a hnar chu a tawk lek lek a, zu a in nasa tih a hriat, a mitmeng chu a thip ram mai a! a hmuihmul pawh a to khawng fur mai. A thau lo a, a vun chu a uk khak mai. “Puii, min hre tawh lo em ni?” a ti tham chhal a, a aw chu a ngenngawl angreng hle.
“Ka hria che lawm; ka damchhungin ka hrereng tawh ang che” ka ti sap a. A kut chu a rawn lekchhuak a, a khur der der mai.
“In chibai ila, i dam thin maw?” a rawn ti leh hnuhnawh a! keipawh chuan “Dam thin e, nang zawk?” tih pahin a kut chu ka vawnsak ve a. A kut lum ther ther chuan ka kut chu nghet takin a hum a, ka lo mamichhing ta ngawt a!
“Kum 5 lai a liam tawh a nih hi; i pasal fanaute an tha maw?”
“Aw, an tha e” dawt chiang taka ka sawi avang chuan, amitah ka en ngam lova; a nui suk a.
“Ka hmanhmawh deuh a, ka kal tawh mai ang, kan la inhmu leh dawn nia” tiin ka kal ta a, lehhawi chak em em chungin hmalam ka thlir lui tlat a.
Darthlalanga ka hmel lo lang chu rum zetin ka melh kul a, a chang leh keimah leh keimah chu ka innuihsawh thul! Nep leh tlawm hi ka inti ngawih ngawih a; ka inhmusit a ni ber mai. Room-a ka fapa rawn lut pawh chu ka lo hmu lawk lova, “Nu, ka ril a tam” a tih ri-ah chuan ka harhchhuak ta chauh a. Inthiamlo ru takin ka fapa eitur siam sak tur chuan choka lam chu ka pan a, min rawn zui ve zel a, “Nu, vawiinah Thantea’n “i pa hi ka van hmu ve ngai lo; khaw nge a awm?” a tia, Nu, hmana ka zawh che khan, ‘A zin, kha i tia, a va’n lo haw har tawh em em’ a ti a, ka thin chu a phu zawih zawih ringawt.
“Bawiha, i pa chu alo la haw dawn hrih lo a lawm; nghak fan fan rawh” ka ti a, ka thinlung erawh chuan,“Thudik hrilh mai rawh, dawihzepnu” a ti mawlh mawlh thung. Mahse, ka ngam ngang si lo.
Zanah chuan, ka u hmeichhia leh a fanu Bawiha aia upa hlek hi an lo leng a, kan titi a, naupangte chu room-ah an inkhualtelem a.
“Rema chu be tha rawh, ani anga mipa tha leh rintlak i tawng tawh lovang, nang a kara nuthlawi leh nghal, a duh ve phawt che chuan lawm hle tur i ni zawk asin” a ti a.
“U, vawiinah Bawiha pa ka hmu a sin” ka lo ti daih a!
“Eng nge a sawi a?”
“Engmah, kan inchibai a, ka kalsan daih, Rema chu maw ka iai hran lo; mahse, ka hmangaih lo, ih e, tumah hi ka hmangaih theih tawh pawh ka ring lo” ka ti a.
“Theilo emaw i inti anih kha, kha mihring ang vek kha an nilo tih hi hre rawh”
Ni e, kha mihring ang vek kha chu anni lovang tih ka hria a ni. Mahse, ‘ni leh tase’ tih ringawt pawh hian min thunun hneh kher mai. Kum 5 liam ta-ah khan ka thinlung chu a kehsawm tawh a, tunah chuan ka mihringpui te hnena hlan tur thinlung pawh ka nei tawh lo, kehsawm leh tur chuang pawh a awm tawhlo a ni.
KA PASAL
Kum 1 leh thla 3 kan inngaihzawn lai khan amah vanga tawrhna hmachhawn ka nei ngai lo; kan hlim dun a, engkimah kan inlungrual thin a, ka chhungte pawn an ngaina a, an ring a, kan inah pawh tlangnel takin a che tla ngam thin. Kawnpui khua anni a, Aizawlah hnathawh tur zawngin a rawn awm a, Graduate lai chu ni ve mahse, hna a vang tawh a, tunlaiah chuan BA hna hmu lo chu thil pangngai a ni. Mi inzir peih taka ni a, IGNAU-ah MA a zir chhunzawm leh a, kan thenawmpa te school-ah thla khata cheng 8000 hlawhin a thawk ve a. Kan inngaihzawn dan hi a nuihzatthlak angreng a, ka phone ka ti bo a, ani hian a lo chhar a, min rawn pe vang vang mai a! khatianga tlangval tlawmngai leh rinawm kha ka la hre ngai lo a, ka lawm chu thuhran, ka hmuh tirh phat atangin ka ngaina nghal a ni.
Chuta tang chuan kan inbe chho a, a putea te inah a awm a, vawi hnih lai chu min lenpui ve tawh nghe nghe. Kawm anuamin a tawng duh a, sawi tur a hre hle thin. Kan inah pawh a rawn leng fo a, engtiklai khan nge ka lo duha ka thinlung chu ka lo hlan ka hre bik lo, zankhat chu a haw tur ka thlah a, “Puii, ka rilru hi hria ka la ti khawp mai; ka duh che” a ti ta. Diktak chuan a sawi har ka lo ti tawh lutuk zawk a. Mahse, ka ngawi reng a; min rawn kuah a, hnai takah min en a, ka lo nui tawp. Mahse, ka sawi kher ngai lovin ka rilru chu a manthiam vekin ka ring.
Mi tha tak anih vangin ka chhungte atang paw’n dodalna kan tawk lem lo; zantin deuhthaw alo leng a, hna nghet a neih hun hunah inneih kan tum a, keichu Hindi class ka kal thin a, “Hna ka neih phawt chuan, nang chuan hna neih ve hi tul ka ti lo, in lamah fate enkawl leh inchhung enkawl kha i tihtur a ni” a ti thin. Mahse, Hindi chu ka la zir chhunzawm tho a. An khuaah a haw a, kan inngai thei khawp mai, anu te min biaktir a, anu pawh a fel hmel khawp mai. Kum khat kan inngaihzawn champha kan lawm tum in inring lawk lo takin kan chesual ta hlauh mai a! ka virgin hawngtu a nih chu, chuta tang chuan kan inkarah engemaw neuh neuh a awm ta fo mai! Inrinhlelhna in kan pahnih nunah bu a khuar tan a; kan inhau deuh ta fo mai a, kan inhauh apiang lahin inthen ka rawt ziah thin.
“Sex kan hman vang kha a nih hi, hetia innghirngho reng hi a hrehawm, innei vat ila a tha ang” a ti thin a; sex chu kan hman chhunzawm tawh chuang lo. Tichuan, zankhat a rawn leng chu ka pate pawh an la men laiin, “I thawmhnaw va pack la, min zui haw mai rawh” sms in a rawn ti tawp a! ka va melh kawk a, thutak deuhin min lo mitmei a. Diktak chuan ka rilru ala puitling vak lo bawk nen, khatia kan han inhau fo kha a hnua ka ngaihtuah hi chuan ka inchhir a, ani hian min then tak tak ang tih ka hlau hnuhnawh fo thin. Mahse, inthen ka sawi chang chuan, a ngawi reng anga, a chang leh thildangte min sawipui a tum daih thin.
“Inthen hi i duh tak tak lo tih ka hria, min rinhlelh vangin i sawi ve mai mai thin a nih kha, ka then dawn lo che, ka nei dawn che” ka thinrim reh hnuah hian a ti thin. Tichuan, chumizan chuan ala len reng laiin ka thawmhnaw chu bag-ah athen a zar khungin ka va insiam ta thuai thuai a. Ka pate chuan ngaihngam takin min mutsan a, an muhil ta maw tih awm velah kan chhuak ta ringawt mai a ni. Lehkha them kan hnutchhiah ve ngei kha.
Kan inruk hian kum 26 chauh ala ni a, keilah kum 22 lek bawk! Amah hi unau zinga upa ber anih vang pawh a ni maithei, a puitling riau a! a tawngkam leh chetphung hrim hrim chu a patling thei khawp mai, kei erawh ka puitling lova, ka ni huat huat a, ka ngaih a sam a, ri phawng phawng thin mi ka ni.
“I mizia hi nangmahah chuan ka duh ber, i rilru a thianghlim a; huat zawng i nei vak lo te hi ka ngainat chhan che a ni” min ti thin. Mipa sang lam, hmeltha vura sawi tur chu a ni lova, mahse, “A man tawp” an ti thin. Ngaizawngtu a hmu thei riau a! sex kan hman hnu atang phei kha chuan ka thikthu a chhe thar a, fb-ah te hian a a/c ah ka lut anga, amah lo ngaizawngtu te chu ka block loh leh ka unfriend vek thin. A nuih a za thin a, mak ve tak chu min dawhthei em em a, min zahder thiam bawk. Keipawn ka hmangaih a, atan ka rinawm ve thlawt a ni.
A putea te ina kal ka ngam loh vangin a thianpa, amaha inluah kan pan a, alo mu tawh a, a in chu a zim nasa mai si, puanthuah a nei bawk si lo; tihngaihna awm tawh hek lo le..kan pathum chuan, a khum zim te-ah chuan kan mu ta a. Min rawn kuah a, min rawn fawp a, mahse, a danga pakai ka remti lo; a thianpa chu ka zah ve bawk si, ani pawn kan dinhmun hriain min tilui bik lo; inru ve e ti lo in kan inruk zan chuan sex kan hmang lo. Mahse, ka la naupang bawk a, ka thla hi a muang ve tawp! Ka hlim ru veng veng mai.
“Aaa, ni e, an la puitlin loh vang a ni pakhat a, amaherawh chu, an lo induh a, hei chen an lo kal ve tawh avang in keini chuan rei rial lovin palai kan rawn tir dawn a, nangni lamah pawh remlohna a awm loh hram ka beisei” Mamawia putea chuan a ti a. Mamawia chuan room-ah min kai lut a, “Haw chu i duh ami? Kan innei thei lo ange aw” a ti a, a mangan hmel hle a.
“Ka hre bik nang, haw lo mahila nakinah haw tho tho a ngai dawn a, kan inneih dawn pawn” ka ti a.
Tichuan ka haw ta phawt a, ka haw atanga kar khat na-ah palai hmel kan hmu ta a, kan inruk vang khan ka chhungte chuan min hau nasa a, Mamawia an duh loh vang nilovin khatiang tut tuta hmanhmawh tur khan min ring lo a, Dan thianghlima inneih kha min duhpui vang zawk a ni, mahse, engkim ka sawi ta vek a, Dan thianghlim kan tlin tawh loh thu te leh sex kan hman hnua kan inhauh zin zia ka sawi a, ka chhungte pawh chuan thudik ka sawi avang chuan min tih vak ngaihna an hre tawh bik lova, chhungkaw inpawh leh lungrual tak, thian anga inkawm ho bawrh bawrh thei kan ni a, “Pasal ka neih chuan, kan inchhung angah hian ka lawi duh” ka ti thin reng a ni.
September-ah kan innei ta a, a hautak lo thei ang berin. Kawnpui lamah kan awm ta a. Ka chhungkaw tharte chu ka chungah an fel hmel hlein ka hria. Mamawia nau nula leh naupangber mipa, ka nu leh pa leh ka ni (Mamawia pa farnu, nuthlawi), chung zawng chu kan ni a, ka ni hi an pa nen an inthen a, a fate chu an pa ten an awmpui a, a lung a leng thei hlein ka hria. Min ti tlangnel hmasa bertu a ni nghe nghe a; a tawng duhin nuih te a heh a, a bula awm a nuam ka ti hle, hmeichhiate hi kan lo huaisenin kan lo chhel khawpin ka hria, kan la hriat ngai miah loh te inchhungah kan va cheng ve tawp chu a nia! Mahni inchhunga lal tak leh nuamsa taka awm ve theite pawh pasalte avangin mi hrang kan han hrawn ta thin chu a nia; mipa te hian min zah der ve tur chu anni chiang a lawm.
Ka pasal chu ka chungah a tha em em a, min duat a,min tihlawm a thiam takzet a ni. An chhungkaw khawsak a sang lutuk bik lova, ka pa chuan huan a nei a, ka nu chuan kan inbul maiah eichawp dawr a nghak ve thin, Mamawia farnu chu Hotel-ah a thawk a, a naupangber erawh Aizawlah college a kal a, weekend-ah alo haw thin. Ka ni leh ka pa chu an feh thin a, Mamawia pawh a hna a zawm tawh loh hnuah a feh ve zeuh zeuh, kei erawh ka pa in feh a phal ngai lo.
SIPAI
Kan inneih atanga thla 3–na velah sipaiah kan pa chu a intlar ve a, vaneihthlak takin a tling ve hlauh mai a! Assam Regiment a ni a, lehlamah chuan ka lungngai lawk angreng, min kalsan daih anga, ka khawhar dan tur leh hrehawm ka tih dan tur ka hmu lawk vek. Mahse, ka nu ten kal ngei se an duh si a, a kal dawn zanah chuan, ani pawh a lungleng ve deuhin ka hria, kan han mu chu mutthilh a har viau!
“Zep loh chuan ka peih lo lawk e, ka ngai dawn che sia” a ti sar sar a.
“Ni reng e, ngah nge i tih ve kher?” ka lo ti hlur a. Ka dul a rawn chul a, “Tah hian naute awm tawh se ka ti; i khawhar alo hnem thei anga” a ti a. Chu chu ka duhthusam a ni.
“Sipai nupuite hi an uire duh riau anti a! Mahse, nang chu ka ringtawk che” a ti leh a, a vei zawng chu ka hre nghal mai. Ka nui deuh a, “Sipai nupui an nih vanga uire kher an ni bik dawn mi? sipai lo pawh nei se, reilote inhmuh loh lek chhungin an uire tho vang, chutiang hmeichia chu ka nilo tih i hriat kha” ka ti a. Ka sam a zut heuh heuh a, “Nia, ka ring che a lawm, mahse, ka awm loh chuan ila naupang ve sia; hrehawm i tih ka ring, i duh leh I nute bulah te i han awm zeuh zeuh dawn nia” ati a, ka chhungril hi a lawmru veng veng mai, chutiang taka min ngaihtuahtu pasal ka nei chu vannei ka inti khawp mai. Mahse, alang apau chuan, “Hrehawm mahse, hei hi ka in a ni tawh lawm, i chhungte hi ka chhungte anni tawh a, i ai ka lo awh a ngai a ni” ka ti ve a.
Min rawn fawp a, duhthawh zetin ka lo chhanglet ve nghal a, chumizan chuan kan inneih atanga vawikhat nan thawm bengchheng tak kan siam ve ngei a ni! ka nuten an hriat loh hram ka beisei.
A chang chuan kan inbe lo vang vang a, a chhan chu ama lamah harsatna a neih thin vang a ni. Kan inbiak tawh chuan phone kan dah phal tawh lo thin a, kan titi a, kan nuidun a, kan vawiin chanchin inhrilhtawnin, a chang leh min ringhlel der anga, kei ka lo titau anga..chutiang reng reng chuan hun kan hmang thin. A kal tirh khan ka lunglen em vangin ka pain ka chhungte bula zin hrih turin min ti a, ka lawm ru kher mai. Kar 3 dawn ka han awm a, lunglen pawh a ziaawm ta deuh; mahse, ka paten, “Zuk chhuk tawh rawh, i cham rei thawkhat tawh alawm, i pate pawh an tul lai a nia, puih te pawh an ngai ang” anti a, ka phur lem lo khawp mai. Ka nuta in min zuk thlah a, tichuan ka khawvel chu alo danglam tan ta.
Ka nu (Kan pa nu) hi mi khak fek fek ching a ni a, ka pa erawh ka pa tak tak nen ka ngainat dan a danglam vak lo, a tawng tam lem lova, mahse, min ngaihtuah em em a, ka nu in min hauh chang paw’n ka thlavang a hauh vat thin. Kohhranah rawngbawltu a ni a, ka nu pawh SS–ah junior Department zirtirtu a ni, khawtlangah pawh MHIP treasurer ni lai a ni. Ka ni erawh a inhmang vak lova, khawm pawh a inkhawm khat viau! Mamawia kal hnu hian ka nu chuan min hmu mawh riau ni hian ka hria a; keichuan huat nachhan tur ka hre lo, diktak chuan khawpuia seilian, ram hna thawk ngai lo ka ni a, ram lama hnathawh chu ka chak lo em em, mahse, ka inthlahrun a vangin ka pa leh ka ni chu ka zui ve thin. Ka pa leh ka ni chuan an phallo thin lutuk, mahse, ka nu in engmah a sawi ve ngai loh vangin ka zui lui fo.
Ram atanga hawn lahin eirawng bawla phet leh char char a ngai thin a, hahthlak thei ve tak chu a ni. Ka chhungkua an nih tawh vangin ka tihtur reng a ni tiin ka infuih ve nasa thin. Zankhat chu zanriah kan ei laiin, ka nu chuan, “Puii hi hotelah sawn thawk ve se a tha ang, ram hnathawh a zeihawi vak si lo a, mami hian an hotela thawk pakhat a ban thu a sawi a” a ti a. Ka ngawi reng a, “Nia, thawk ve rawh se, kan hnathawh hahthlak zia te pawh hi hre ve se a tha ang” Mami chuan a ti hlawng hlawng a, a tawng chuan mei a nei tih ka hria.
“Hotela thawh te chu a hahthlak tho naa in awl laite chuan nuam intih thin em kha” ka ni chuan alo ti vat a.
“Ka thawk hreh hleinem, Mami chuan an Manager lo bia sela, ka thawk ve anga ni mai lawm, nia, ka nu sawi ang khan ram hna chu ka thawk zei lo lutuk a” ka ti a.
“Tunlai thangthar inti khawpui mi ho hi chuan ram hnathawh thiam loh te hi uanah an la a, changkang sawtin an inhria mawni le” ka nu bawk chu! A tawngkam hman dan chuan ka thin a khei ve hle, mahse, a hma pawhin mei nei deuh deuha tawng a chin vangin menah ka thlak mai zel a, tun tum pawh hi ka ngai thutak duh lo lui tlat a. Inti khawpui mi ka ni lova, khawpuia cheng leh seilian ka nih miau avangin han intih khawpui mi vak dan pawh ka hre lo; chutih rualin a sawi thenkhat kha chu a dikna chen pawh a awm ve mahna. Nula thenkhat inti no lutuk te chuan ram hnathawh thiam loh chu changkanna emaw an ti fo ve thin reng a! mahse, ram hnathawh ngai miau loh chuan thiam taka thawh bawrh bawrh kha a awlsam biklo tih ka nu hian a hre lo a niang e.
Ka pa chuan ka nu melh rawlh pahin, “Awww.. engemaw Puii chu in han phut viau le aww, a thawh theih tawk chu a thawk ve bawk a lawm” a ti nghat a. Mahse, engmah an sawi zawm tawh lo. Kan pa nen kan inbiak chuan ka hrilh ve a, ka rinloh deuhin, “Thawk tak rawh, i khua te pawh a har lo deuh ang chu” ati ta daih a! ka sawi zawm ngam tawh lo. Ni hnih hnuah Hotel–ah chuan ka hna thar chu ka thawk ve ta a. Thleng ka sil thin a, eitur siam lam chu ka la ti lem lo; buai lai chuan buai thei map map tak kan nia, motor an rawn tlan khat deuh chuan kan awl leh veng veng zel a, hnathawkte an fel a, kan inkawm thei ta phian a, ka khawhar pawh a ziaawm ta deuh.
“Lal pi, he nula hi ka va hmu khat ve; ava chhelo reuh ve a” Driver phawkphawhraw deuh te hi chu tiang hi anni chawk zel a! ka lo nui mai a.
“Nula a ni tawh lo, kan nau nupui a nih kha” Kan hotel neitunu chuan alo ti a. Lal-pii hian min duhsak a, a nuam ka tih phah hle.
“Va uiawm reuh ee, Bawihi, tu nge i hming?” ati leh a, ka lo sawi ve mai a, he pa hi heta rawn chawl thang tak a ni a, Truck bangsang a khalh thin a, la naupan hmel tak, hmeltha reuh zet hi a ni a, hotela thawk nula te chuan an star tih ka hria, ka nau Mami ngei pawh alo lan tawh chuan a danglam thin a, a phi chung zel thin a nih khaa. Chutia kan inbiak lai pawh chuan min lo thlir reng a, a mitmenga thikna chu ka hmuh hmaih bik lo. Ka kalsawn ta daih a. Hotel atang hian tlai dar 5 dawnah te kan haw thin a, ka nu hian eirawng lo la bawl loh chang a nei thin, chutak chu a ni hrehawm ka tih a ka chauh phah em em thin. Ka pa pawh chaw ei hman lova a inkhawm a awm fo thin.
Zanriah kan ei laiin, “U puii chu mipa in an ngam thei che ee” Mami chuan a rawn ti ta phut a!
“Ngati maw?” ka lo ti vat a.
“Midang an biak loh pawn Driver ho hian an be duh bik che ee” mei nei deuh a a tih lai chuan, “a ho mai mai e, hmeltha anti a niang chu mawle,saw hotela thawkte chu in chhe ve hlawm em alawm; mithar alo ni bawk nen, hotela thawk tur chuan mi biangbiak thiam te hi a ngai ve lawm” ka ni chuan alo ti sawk sawk a, ka lawm thin e.
“Pasal nei tawh i ni tih hre reng rawh, mipate hi chuan mitmei hmu lovin min pawng ngam ngawt ngailo a nia” ka nu chuan alo ti hlak a, an tawng duh dan chu ka ngei hle.
“Driver ho chu min an besawm peih thei em a, lo biak that loh kha a mawlthlak bawk sia, mahse, pasal ka nei tawh tih ka hrilh vat zel, lo lungngai lutuk suh u” ka ti ve ta ngat a! ka thinrim ve tawh chuan tu hmai eng mah ka zah ngai lo; mahse, thinrim lo turin ka insum thei em em thung, ka duh phawt chuan.
Thla tharah Mamawia alo haw dawn tih ka hriat chuan ka hlim kher mai, mahse, ka cher viau mai! Ka thawkrim ve em bawk a ni, ka pasal tan chuan nalh taka lo awm ka duh hle. Ka nu leh ka nau chuan min do char char ni mai hian ka hria a, Sunday tuk khat phei chu, ka kawr hak chu “A hur herh kawr tawp” min tih sak a, chutiang kawr design chu an uar hle in ka hre sia; ka rilru pawh a na tel ve ta deuh. SS banah ina haw nghal lovin ka pazawnte inah ka lut kawi ve a, ka nuzawn chuan chhangban alo chhum a, kan ei a, ka len khat em avangin min lo hau fiam a, an felin an zau em em a, an fate nen pawh kan inrual khat a, kan inkawm thei viau; ka leng khat em bawk lah taka, kan buai vang a ni pakhat, lenna hun hi ka nei hlawl lo a ni; zanah chiah ka awl ve a, zana len duk duk lah ka duh bik si lo. Tlaiah chaw ei turin min sawm nghal a, ihe lovin ka lo remti ve tawp a.
“I nu saw a khirh phian lo maw? “ An fanu keimah ang rual vel chuan ati a, ka nui ringawt, pasala chhungte rel hi ka duh ngai lo; ka nu leh pate min zilhhauna tam ber pawh a ni reng a, mahse, zinga ka kawr hak an sawisel dan chu ka sawi ve a, mak an tih hmel khawp mai, thil dang phei kha chu sawi vek phei ila chuan min khawngaih ngawt ang.
“Ka nu, vawiin tlai chu ka pa Tluanga te inah chaw ka ei dawn a, min sawm nasa ve sia” ka ti a.
“Min rawn hmasa lovin ilo remti ve ngawt a ni maw? saw mite chhungkua saw mi rel hrat an nih saw, keipawh hi min rel nasa ngawt ang” ati ta daih a!
“Va ei rawh, a tlawh pawh i tlawh khat lutuk reng reng” ka pa chuan alo ti thung a.
“Tlawh vak an ngai lo, min rel anga, chu zawng chu a ni mai” alo ti leh hlawih hlawih a, a rilru hi a mak ka ti.
“Ka nu, ka rel ngai lo che u, anni pawn an rel che u ka hre ngai lo” ka ti a, room-ah ka luhsan ta daih a. Amah ang tura min ngai chu ka thinrim ru teuh a, amah zawk hian min rel chamchi a, kan thenawmnu phei chuan, “Inpa hian i nu hi a hlau sia, in inneih hlen pawh ka ring lo” min ti hial tawh a ni. Min relna te chu min hrilh lehzel thin si a, “Kan mo ve hi chu aww.. engmah thiam a nei silo, thatchhe bawk si, in chhung te hi mami tihfel vek a nih hi; a tho tlai thei si, a inti no em em ringawt a, hotela a thawhna hlawh te hi pakhatmah kan hmu ngai reng reng hleinem” tiin dawt ngial ngan lutukin min rel thei a nih chu!! A tir phei chuan ka awih lo hial zawk; min hrilhtu te pawh hian ka nu thusawi chu an rinloh em vangin min hrilh thin, ka hah ve zia leh ka mo atanga kan inchhung fai theih zia chu thenawm khawvengte hian an hai bik lova, ka lawi tirh kha chuan nula awmna in ve si a tawp lutuk kha ka awih lo hial zawk. Mahse, inchhung tihfel chu ka thiam ve zawng tak a ni bawk a, phur takin ka tifai a, parda thar ka nute ka chah a, ka zar tha a, bungraw bal uk khak lutuk te chu ka nawtfai hlarh a, ka chinglet nasa khawp mai.
“Kan in chu a thar ava ang ve mawle” ka pa paw’n a ti ve hial a nih kha. Kohhrana inhmang leh khawtlangah pawh nihna pawimawh tak chelh si ka nu chu mak ka ti thin hle, Mamawia awm lai kha chuan min be tha huam a, nelawm tak a ni thin.
“Ka pasal chhungte kha ka chungah an sual thei lutuk a, mo ka neih ve pawn keichuan ka hrehawmna tawrh ang kha tawrhtir ve ka duh miah lo” ka ni thung chuan ati thin, ani hi chu a fel tawp hi a ni mai, mahse, a thu lo ve em a, engmah hi a sawi vak ngam lo zawk a, Mami hi a lal em em a, nula dulkiar deuh, hang lam, sam sei zet a ni a, a hmel chu chhe fahran a ni lo a, make up a hman loh erawh chuan phungpuinu a nih duh hmel thei tawp! Ka make up te hi min tawm vek thin a, thawkkhat lai phei kha chuan, ka wardrop hi a duh duhin a hawng a, ka kawr te hi a ha chhuak hmiah hmiah zel a, mahse, ka nau a nia tiin engmah ka sawi ngai lo, lerh ve tak a ni a, tawngkam pawh a thiam khawp mai.
KA NGAI CHE
Mamawia chu Aizawlah ka han hmuak a, hringtu nu te meuh bulah chuan pangchan alo awl ve bawk nen, ka nute min tih dan chu ka hrilh vek a, min lainat hmel hle na a engmah a sawi zawm duh lo. Ka u hmeichhia erawh chuan min rel pui hrep a, kan han nui leh rih a. Kan pa nen kan inah zankhat kan riak a, a tukah kan chhuk leh a, kan inngai tawh bawk a, kan insi reng hi a ni mai e, ka chhungte pawn min fiam duh khawp mai.
“Lo nghahhlelh ve tawh tehreng che nen, han riah leh vel kha a ngai em maw ni le” ka nu chuan alo ti nghal bawrh bawrh a! kan ngawi reng a. Zanriah kan ei lai chuan, “U pui, Lawma nen khan inla in be ngai em? A number ka delete palh a, ka va’n duh” mami chuan a ti a.
“Tu Lawma maw?” ka lo ti hu a!
“Aww, Driver kha, ngaizawngtu che kha” ati a! ka so bulh bulh hian ka hria, ka pasal awmlaia chutianga dawt hmanga min han bei chu na ka ti ve khawp mai. Kan pa chuan maktih hmel deuhin min rawn melh a, hrilhhai hmel takin ka lo melh let thung.
“Kan in be ngailo, a number pawh ka nei lo, chuan min ngaizawng lo bawk, nangmah nen in inngaizawng emaw ka tia” ka aw chu a chang mah mah pawh a ni maithei, pawi ka ti bik lo.
“In nu hi a luck riau a nia aw, Driver ho in an chhaih nui uar uar zel an tih chu” ka nu chuan a rawn ti ve leh a. Ka thinrim takzet tawh, mak ka ti bawk, Mamawia pawh chu nuamlo tih hmel deuhin a awm a, chaw chu ka lem thei tawh lo, ka tho a, thleng ka dah tau sawk a, “Ka nu, tu sawi nge? Ka chhuah chhal dawn” ka ti leh ngat a.
“Mi zawng zawngin an sawi a lawm, pasal nei lai nisi, ava za reuh ve te an tia, hnar a lian thin khawp mai”
“Thani, a tawk, ka awih miah lo; an pa alo haw a, hetianga han intih hi nuam i ti bik ang em? Khatiang dawt chiang lutuk kha sawi tawh suh” ka pa a ni.
“Mamawi, in nu hi maw Driver ho in hmeltha anti thei lutuk a, an fiam ve thin alawm, mahse, pasal nei lai ka nia a ti vat zel a, Driver ho chuan an ngaihsan thu an sawi an sawi zawk a sin, i nau Mami hian Lawma kha a ngaizawng a, mahse, Lawma khan innu hi hmeltha ati lutuk a, a ngaizawng chuang lo, chu chu Mami hian a thik a, an sawichhe ta ngawt a nih kha” ka ni pawh a thin a thawk ve ta aniang e.
Boruak nuamlo tak kalsan nan tiin mut hma ka rawt a, kan pa chu enghelh nei tih hriat zet hian a ngawi ngal a.
“I nute thusawi khan a tibuai che em ni?” ka ti a. A kut chu ka la a, ka pawm a.
“Awih leh awih loh tur pawh ka hre chuang lo; ka ring che ka tih kha, mahse, Hotelah chuan thawk tawh lo la a tha ang” a ti a.
“Chu chu ka duhthusam a ni zawk, ka ning lutuk zawk asin, ka pa leh ka nite nena huana feh kha nuam ka ti daih zawk” ka ti sam et a.
“Ka bula i awm reng chung pawh hian ka ngai che, duat” a ti sap a, a lungawi leh hmel tawh khawp mai.
Kan nupa hian kan inpawh a, kan inkarah chuan zahna tih vel hi a awm lem lo; lehkhabu te ka chhiar ve nasa a, pasalte tihlawm dan tur te hi ka apply hreh ngai lova; sex-ah ngat phei chuan zah hi ka duh lo; ka pasal a nia, zah kual vel kha tul ka ti vak lo, chuvang a ni ve pakhat ang, kan pa hian min thlakhlelh em em, sex hi inneihna tinghettu ber chu a ni lo na a, hmangaihna lanchhuahtir nan chuan a pawimawh a, a duhawm a, a hmantlak bawk a ni. Chu chu ka hre ve tlat!
Sipai tih takah nupa nun kan hmang pawh chu a fit lutuk nge, min zawh san daih a! mahse, ani pawh hi a fing ve a, “i la zo ve si lova, start leh mai ang” a rawn ti sur sur a, inchawhthawh tawn hi chuan engkim hi a dik vel vek zel mai a ni.
Thla khat erh awrh chauh chawlh a neih vangin kan hun neihchhun chu am takin kan hmang a, Hotela thawh a phal tawh loh vangin huanah kan feh thin. Mahse, ka hmangaihber bulah chuan hah ka hre ngai lova, ka bula alo nuih ver ver tawh chuan engkim a nuam a ni mai, min duattu neih hi a nuam ve em bawk a ni.
“Tun tum chu naute siam tawh ang aw”
“A theih ringawt dawn ami? |awngtai hmasa ila”
“Awle, hawh tawngtai ang” ka chungah a bawk reng tawh chu a tho a, kan han tawngtai leh rih! Ka rai theih nan. Kan tawngtai zo a, min rawn kuah nghal a; “Mipa nge i duh hmeichhia?” a ti a.
“Engpawh, damtha leh fuke kim an nih phawt chuan”
“Keipawh, hehe” a bak chu ngawi rengin kan sawidun a, boruakah kan thlawk dun thin.